ވިއެޓްނާމުގައި އަލަށް ގާއިމްކުރެވޭ އިގްތިސާދީ ސަރަހައްދުތަކުގެ ކޮންޓްރޯލް ޗައިނާގެ އިންވެސްޓަރުންގެ އަތްމައްޗަށް ހިނގައިދާނެކަމުގެ ބިރުއޮތްކަމަށް ބުނެ މުޒާހަރާކުރި ފަރާތްތަކާއި ފުލުހުންނާއިދެމެދު ކުރިމަތިލުންތައް ހިނގައިފިއެވެ.
ރިޕޯޓްތައް ބުނާގޮތުގައި ވެރިރަށް ހެނޯއީއިން އެތައް ބަޔަކު ހައްޔަރުކޮށް އެހެން ސިޓީތަކުގެ މުޒާހަރާ ފުލުހުންވަނީ ހުއްޓުވާފައެވެ.
މުޒާހަރާކުރި ބައެއް ފަރާތްތަކުންވަނީ ޗައިނާއާއި ދެކޮޅު ލިޔުންތައް ލިޔެފައިވާ ބެނާތައްވެސް ގެންގުޅެފައެވެ. އޭގެ ތެރޭގައި "ޗައިނާއަށް އެންމެ ދުވަހަށްވެސް ކުއްޔަށްދޭ ބިމެއް ނެތް"ކަމަށް ލިޔެފައިވާ ބެނާވެސް ހިމެނެއެވެ.
ސަރުކާރުން މިދިޔަ އަހަރުވަނީ ބޭރުގެ އިންވެސްޓަރުންނަށް ވިއެޓްނާމްގެ ބިން 99 އަހަރަށް ކުއްޔަށް ދެވޭ ގޮތަށް ގާނޫނެއް ހުށަހަޅާފައެވެ.
ޚާއްސަކުރެވޭ ވަކި ސަރަހައްދުތަކެއް ތަރައްގީކުރުމަށް އަމާޒުކޮށްގެން ހުށަހަޅާފައިވާ މި ބިލުގައި އިންވެސްޓަރުންނަށް ގިނަ އިނާޔަތްތަކެއް ދެވިފައިވާއިރު މަނާކުރެވެނީ މަދު ކަންކަމެކެވެ.
މުޒާހަރާކުރި ފަރާތްތަކުން ތުހުމަތުކުރާގޮތުގައި ކޮމިއުނިސްޓް ސަރުކާރުން ޗައިނާގެ އިންވެސްޓަރުންނަށް އެގައުމުގެ އިރުއުތުރާއި، އިރުދެކުނާއި، ހުޅަނގު ދެކުނުގެ ތިން ސަރަހައްދެއް އިގްތިސާދީ ޒޯންގެ ގޮތުގައި ދޭނެއެވެ. އަދި އެއީ ޗައިނާއާއި ވިއެޓްނާމާއި ދެގައުމުން ސަރަހައްދީ ރޮނގު ހިއްސާކުރާ ވޭން ޑޮންގެ ކޮންޓްރޯލް ޗައިނާއަށް ދިނުމަށް ދައްކާނެ ބަހަނާއެކެވެ.
ވިއެޓްނާމްގައި ގާއިމްކުރާ ޚާއްސަ އިގްތިސާދީ ތިން ސަރަހައްދަކީ ޓެކްނޮލޮޖީގެ ގޮތުން ކުރިއަރާފައިވާ ވިޔަފާރިއަށް ފަހި މާހައުލެއް އޮތް "މިނީ ސިންގަޕޫރު"ގެ ގޮތުގައި ވާނެ ކަމަށް ވިއެޓްނާމް ސަރުކާރުންވަނީ ބުނެފައެވެ.
