ޖާންވީގެ 'ދަޅަކް' ގެ އައު ޕޯސްޓަރެއް ނެރެފި

ސްރީ ދޭވީގެ ދަރިފުޅު ޖާންވީ ކަޕޫރު އާއި އިޝާން ކައްތަރު ބޮލީވުޑަށް ނިކުންނަ ފިލްމު "ދަޅަކް" ގެ އާ ޕޯސްޓަރު އާންމުކޮށްފިއެވެ.

މި ޕޯސްޓަރ ރިލީޒް ކޮށްފައިވާކަން ހާމަކޮށް ކަރަން ޖޯހަރު ކޮށްފައިވާ ޓްވީޓްގައި ބުނެފައި ވަނީ މި ފިލްމްގެ ޓްރެއިލާ ވެސް ވަރަށް އަވަހަށް ރިލީޒް ކުރާނެ ކަމަށެވެ.

ހުދު ހެދުމެއްގައި ދެ މީހުން ތިބި އިރު ދެމީހުންގެ އަތުގައި ކުލަ ހޭކިފައިވާ ކުލަގަދަ މި ޕޯސަޓަރުން ދެ މީހުންގެ ލޯބީގެ އަސަރުގަދަ ޖަޒުބާތު ދައްކުވައިދެއެވެ.

މި ފިލްމު ޑައިރެކްޓަރަކީ ކަރަން ޕްރޮޑިއުސްކުރި ކާމިޔާބު ދެ ފިލްމެއް ކަމަށްވާ "ހަމްޕްޓީ ޝަރްމާ ކީ ދުލްހަނިޔާ" އާއި "ބަދްރިނާތްކީ ދުލްހަނިޔާ" ވެސް ޑައިރެކްޓްކޮށްފައިވާ ޝަޝަންކް ކެއިތަންއެވެ.

"ދަޅަކް" އަކީ މަރާޓީ ބްލޮކްބާސްޓާ ފިލްމު "ސައިރާތް" ގެ އަސްލަކަށް ބަލައިގެން އުފައްދާ ފިލްމެކެވެ.

މިދިޔަ ފެބްރުއަރީ މަހު ޖާންވީގެ މަންމަ ސްރީދޭވީ ކުއްލި ގޮތަކަށް ދުބާއީގައި މަރުވި ނަމަވެސް، އެހިތާމަވެރި ވަގުތުގައި ވެސް ކުޑަދުވަސްކޮޅެއްގެ ތެރޭގައި ޖާންވީ ވަނީ ފިލްމްގެ ޝޫޓިންތައް ފަށާފައެވެ.

އަންނަ ޖުލައި މަހުގެ 20 ވަނަ ދުވަހު ރިލީޒް ކުރުމަށް ހަމަޖެހިފައިވާ އޭނާގެ ފުރަތަމަ ފިލްމް "ދަޅަކް" ގެ ޝޫޓިން މިހާރު ވަނީ އެއްކޮށް ނިންމާލާފައެވެ.