އެނިމޭޓެޑް ފިލްމުގައި އުޅޭ ކެރެކްޓާތައް އެއްކޮށްލައިގެން ގެނެސްދޭ ފިލްމު ކަމް އަވޭ އަށް އެންޖެލީނާ ޖޯލީ ސޮއިކޮށްފިއެވެ.
މި ފިލްމު ކުޅެން ހުށައެޅީ އެންޖެލީނާގެ އިތުރުން ޑޭވިޑް އޮޔެލޯވޯއަށެވެ. އެހެން ނަމަވެސް އޭނާ މި ފިލްމު ކުޅުމަށް އެއްބަސްވި ކަމެއް ހާމަކޮށްފައެއް ނުވެއެވެ. ޚަބަރުތައް ބުނާގޮތުގައި ޑޭވިޑް ވެސް މި ފިލްމު ކުޅުމަށް މިހާރު ވަނީ ސޮއި ކޮށްފައެވެ.
ސާޅީސް ދެ އަހަރުގެ އެންޖެލީނާ ކަމް އަވޭ ގައި ކުޅުމަށް ހަމަޖެހިފައިވަނީ މަންމައެއްގެ ރޯލާއި ޑޭވިޑްގެ އަންހެނުންގެ ރޯލެވެ.
މިފިލްމާއި ބެހޭގޮތުން ޑައިރެކްޓަރ ބްރެންޑާ ޗަޕްމަން ބުނީ މި ފިލްމަށް އެންޖެލީނާއާއި ޑޭވިޑް ނަގަން ނިންމީ އެދެމީހުންގެ ކެމިސްޓްރީ އޭނާއަށް ގުޅޭތީކަމަށެވެ. ބްރެންޑާ އަކީ 2012 ވަނަ އަހަރު ރިލީޒްކުރި ޕިކްޒާގެ އެނިމޭޓެޑް ފިލްމު ބްރޭވްގެ ވެސް ޑައިރެކްޓަރެވެ.
މި ފިލްމުގެ ސްކްރީން ޕްލޭ ލިޔުމުގައިވެސް ބްރެންޑާ ބައިވެރިވެއެވެ.
ފިލްމުގެ ޝޫޓިން އަންނަ ސެޕްޓެމްބަރު މަހުގެ ތެރޭގައި ފެށުމަށް ހަމަޖެހިފައިވާއިރު ފިލްމު ރިލީޒްކުރާނެ ދުވަހެއް ބްރެންޑާ ހާމައެއް ނުކުރެއެވެ. ޚަބަރުތައް ބުނާގޮތުގައި މި ފިލްމު އަންނަ އަހަރުގެ ތެރޭގައި ރިލީޒް ކުރާނެއެވެ.
އެންޖެލީނާ ޖޯލީ މިހާރު ދަނީ މެލަފިޝަންޓް ފްރަންޗައިޒްގެ ދެވަނަ ބައިގެ މަސައްކަތް ކުރަމުންނެވެ. ޑޭވިޑް ފިލްމީ ދާއިރާގައި މިހާރު ކުރަމުންދާ މަސައްކަތަކީ އޮންލީ ޔޫގެ މަސައްކަތެވެ.
