ދެ ފަނޑިޔާރުންނަށް ކުރި ހުކުމާމެދު ހައިކޯޓުން ގޮތެއް ނިންމުން އާދިއްތަ ދުވަހު

ރަސްމީ ހައިސިއްޔަތުން ކުރަން ޖެހޭ ކަމަކަށް ނުފޫޒު ފޯރުވުމުގެ ކުށުގައި އުއްތަމަ ފަނޑިޔާރު އަބްދުﷲ ސައީދާއި ސުޕްރީމް ކޯޓުގެ ފަނޑިޔާރު އަލީ ހަމީދުގެ މައްޗަށް ކްރިމިނަލް ކޯޓުން އިއްވާފައިވާ ޖަލު ހުކުމް ބާތިލް ކުރަން ހައި ކޯޓަށް ހުށަހެޅި މައްސަލައިގައި ހުކުމް ކުރުން އަންނަ އާދިއްތަ ދުވަހަށް ތާވަލު ކޮށްފި އެވެ.

އުއްތަމަ ފަނޑިޔާރާއި ފަނޑިޔާރު އަލީ ހަމީދު 1 އަހަރާއި 7 މަހާއި 6 ދުވަހަށް ޖަލަށް ލުމަށް ކޮށްފައިވާ ހުކުމް ބާތިލް ކުރުމަށް ހުށަހަޅާފައިވާ މައްސަލައިގެ އިސްތިއުނާފުގެ އަޑުއެހުންތައް ނިމުނީ މި ހަފްތާ ގައެވެ. ކައިރި ކައިރީގައި ބޭއްވި ތިން އަޑުއެހުމަކަށް ފަހު އަޑުއެހުންތައް ނިންމާލާފައިވާއިރު ފަނޑިޔާރުންގެ މަޖިލީހުން އެންމެ ފަހުން އިއުލާން ކޮށްފައިވަނީ އިތުރު ކަމެއް ސާފުކުރަން ނެތް ނަމަ ދެން އޮންނާނީ ހުކުމް އިއްވުން ކަމަށެވެ. އުއްތަމަ ފަނޑިޔާރުގެ މައްސަލައިގެ އެންމެ ފަހު އަޑުއެހުން ބާއްވާފައި ވަނީ އަންގާރަ ދުވަހު އެވެ. އަދި އަލީ ހަމީދު ހުށަހެޅުއްވި އިސްތިއުނާފުގެ މައްސަލައިގެ އަޑުއެހުންތައް ނިންމާލާފައިވަނީ ބުދަ ދުވަހު އެވެ.

މި މައްސަލައިގެ އަޑުއެހުންތައް ވަކި ވަކިން ހައި ކޯޓުގައި ކުރިއަށްގެންދިޔަ ނަމަވެސް ހުކުމް ކުރުމަށް ބާއްވާ މަޖިލިސް ބޭއްވުމަށް ތާވަލުކޮށްފައި ވަނީ އެއް ގަޑިއަކަށެވެ. މި ދެ މައްސަލަ ވެސް ބައްލަވާފައި ވަނީ ތިން ފަނޑިޔާރުންގެ ބެންޗަކުންނެވެ. އެ ބެންޗުގައި ހިމެނެނީ އެ ކޯޓުގެ އިސް ފަނޑިޔާރު އަބްދުﷲ ދީދީ އާއި ފަނޑިޔާރު އަބްދުލް ޢަނީ މުހައްމަދާއި ފަނޑިޔާރު އަލީ ސަމީރެވެ.

ދައުލަތް ހިންގަން ހުރަސްއެޅުމުގެ ކުށް ސާބިތުވާ ކަމަށް ކަނޑައަޅައި އުއްތަމަ ފަނޑިޔާރުގެ މައްޗަށް އިއްވާފައިވާ ޖަލު ހުކުމް ވެސް ބާތިލް ކޮށްދޭން އެދި ހުށަހެޅުއްވި އިސްތިއުނާފުގެ އަޑު އެހުންތައް ވެސް ވަނީ މި ހަފްތާގެ ބުދަ ދުވަހު ނިންމާލާފަ އެވެ. މިއަޑުއެހުންތައް ނިންމާލެއްވުމަށްފަހު އެ މައްސަލަ ބައްލަވާ ބެންޗުގެ އިސް ފަނޑިޔާރު ޝުޖާއު އުސްމާނު ވެސް ވިދާޅުވެފައި ވަނީ ވަރަށް އަވަހަށް މައްސަލަ ނިންމަށް ޝަރީއަތުގެ މަޖިލީހެއް ބާއްވާނެ ކަމަށެވެ. ނަމަވެސް އަދި އެ އަޑުއެހުން ތާވަލުކޮށްފައިނުވެ އެވެ.

ގަވަރންމަންޓް އީލެޓަރ މެނޭޖްމަންޓް ސިސްޓަމް (ޖެމްސް)ގެ ހިދުމަތް ސުޕްރީމް ކޯޓުގެ ތެރެއިން މެދުކަނޑާލަން އުއްތަމަ ފަނޑިޔާރު އަބްދުﷲ ސައީދު އެންގެވިކަން ސާބިތުވާ ކަމަށް ކަނޑައަޅައި، ކްރިމިނަލް ކޯޓުން ކޮށްފައި ވަނީ ހަތަރު މަހާއި 24 ދުވަހުގެ ޖަލު ހުކުމެވެ. އެ މައްސަލައިގައި ހުކުމް ރަނގަޅުތޯ ބައްލަވާ ހައި ކޯޓުގެ ބެންޗުގައި ހިމެނެނީ ޝުޖާއު އުސްމާނުގެ އިތުރުން ފަނޑިޔާރު އަބްދުލް ޢަނީ އާއި ހަސަން އަލީ އެވެ.