އެމްޑީޕީގެ ޕްރައިމަރީ ހުއްޓުވުމަށް ބަންޑާރަނައިބު ސިވިލް ކޯޓަށް ހުށައަޅައިފި
30 މެއި 2018 | ބުދަ 10:13އެމްޑީޕީގެ ޕްރައިމަރީ ފެށުނީ މިއަދު 2 ޖެހުމާއެކު
ބަންޑާރަނައިބު މުހައްމަދު އަނިލް
ބުދަ ދުވަހުގެ 2 އިން ފެށިގެން ކުރިއަށްދާ އެމްޑީޕީގެ ރިޔާސީ ޕްރައިމަރީ ހުއްޓުވުމަށް ބަންޑާރަނައިބު މުހައްމަދު އަނިލް ސިވިލް ކޯޓަށް ހުށައަޅައިފިއެވެ.
ރިޔާސީ ޕްރައިމަރީ ގާނޫނާ ހިލާފުވާނަމަ ހުއްޓުވައި ދިނުމަށް ފުލުހާއި ހޯމް މިނިސްޓްރީގައި އިލެކްޝަންސް ކޮމިޝަނުން އެދިފައި ވާތީ ބަންޑާރަ ނައިބު ސިވިލް ކޯޓަށް ހުށައެޅި މައްސަލާގައި ބުނެފައިވަނީ އެމްޑީޕީއިން ބުދަ ދުވަހު ބާއްވާ އެ ޕާޓީގެ ރިޔާސީ ޕްރައިމަރީ ގާނޫނާ ހިލާފުވާނަމަ ހުއްޓުވައިދިނުމުގެ އަމުރަކަށް އެދޭކަމަށެވެ.
ބުދަ ދުވަހުގެ 2 އިން ފެށިގެން އެމްޑީޕީގެ ރިޔާސީ ޕްރައިމަރީގެ ވޯޓުލުން ފެށިގެން ކުރިއަށްދާއިރު އަދި މިހާތަނަށް ވޯޓުލުން ހުއްޓުވާފައެއް ނުވެއެވެ. އެމްޑީޕީގެ ރިޔާސީ ޕްރައިމަރީގެ ވޯޓުލުން ފެށިގެން އެކި ސަރަހައްދުތަކުގައި ކުރިއަށްދާއިރު، ޕްރައިމަރީގައި ވޯޓުލުމަށް އެމްޑީޕީގެ ގިނަ އަދަދެއްގެ މެމްބަރުން ވަނީ 2 ޖެހިއިރު ކިއު ހަދާފައެވެ. ޕްރައިމަރީގައި ވޯޓު ލެވޭނެ އިންތިޒާމް ހަމަޖެހިފައިވާ ތަންތަނުގެ ތަފްޞީލް އެޕާޓީގެ ވެބްސައިޓްwww.mdp.org.mv އިން ލިބޭނެ ކަމަށް އެމްޑީޕީއިން ބުނެއެވެ. ގިނަ ރަށްރަށުގައި ވޯޓުލުން ކުރިއަށްދާނީ އެމްޑީޕީގެ ޖަގަހަތަކާއި ހަރުގެތަކުގައެވެ.
އެމްޑީޕީގެ ރިޔާސީ ޕްރައިމަރީއަށް ކުރިމަތިލައްވާފައިވާ ހަމައެކަނި ކެންޑިޑޭޓަކީ ކުރީގެ ރައީސް އަދި އެޕާޓީގެ ލީޑަރު މުހައްމަދު ނަޝީދެވެ. އެހެންކަމުން ބުދަ ދުވަހު ބާއްވާ އެމްޑީޕީގެ ރިޔާސީ ޕްރައިމަރީގައި ވޯޓު ދޭނީ ފެންނަ ނުފެންނަ ވޯޓެކެވެ. އެމަނިކުފާނު ކެންޕޭން ކުރައްވަނީ ޖަޒީރާ ރައީސްގެ ނަމުގައެވެ.
