އެމެރިކާގެ ރައީސް ޑޮނަލްޑް ޓްރަމްޕް އާއި އުުތުރު ކޮރެއާގެ ލީޑަރު ކިމް ޖޮން އުން ބާއްވަން މަސައްކަތްކުރަމުންދާ ބައްދަލުވުމުގެ ކުރިން އެމެރިކާގެ ރައީސް އާއި ޖަޕާނުގެ ބޮޑުވަޒީރު ޝިންޒޯ އަބޭ ގެ ބައްދަލުވުމެއް ބާއްވަން ރާވަމުންދާ ކަމަށް އެމެރިކާ ސަރުކާރުން ބުނެފިއެވެ.
ވައިޓް ހައުސް އާ ހަވާލާދީ ރިޕޯޓުތައް ބުނާގޮތުން އެމެރިކާގެ ރައީސް އާއި ޖަޕާނުގެ ބޮޑުވަޒީރު ވަނީ ފޯނުން ހޯމަ ދުވަހު ވާހަކަފުޅުދައްކަވާފައެވެ. ދެބޭފުޅުން ގެ ވިސްނުން ހުރީ "އުތުރު ކޮރެއާ އިން ނިއުކްލިއާ، ކެމިކަލް އަދި ބަޔޮލޮޖިކަލް ހަތިޔާރާއި އަދި އެގައުމުގެ ބެލިސްޓިކް މިސައިލް ޕްރޮގްރާމް އެއްކޮށް ހުއްޓާލަން ޖެހޭނެ" ގޮތައް ކަމަށްވެސް ރިޕޯޓުތައް ބުނެފައިވެއެވެ.
އުތުރު ކޮރެއާގެ ކުރީގެ އެންމެ އިސް ޖާސޫސީ އޮފިޝަލް އަދި މިހާރު ވެސް އުތުރު ކޮރެއާގެ ލީޑަރު ކިމް ޖޮން އުން އަރިހުގައި އިސްކޮށް އުޅުއްވާ ބޭފުޅެއް ކަމަށްވާ ކިމް ޔޮންގް ޗޮލް އެމެރިކާ އަށް ވަޑައިގަންނަވަން ހަމަޖެހިފައިވާއިރު، އުތުުުރު ކޮރެއާގެ އިސް އޮފިޝަލަކު އެމެރިކާ އަށް ވަޑައިގަންނަވަނީ އެމެރިކާގެ ރައީސް ޑޮނަލްޑް ޓްރަމްޕް އާއި އުތުރު ކޮރެއާގެ ލީޑަރު ކިމް ޖޮން އުންގެ ބައްދަލުވުން ހަގީގަތަކަށް ހެއްދެވުމަށް ކުރައްވާ މަސައްކަތްޕުޅުގެ ތެރެއިން ކަމަށް ވެއެވެ. ޗޮލް އެމެރިކާގެ އިސް އޮފިޝަލުންނާ މަޝްވަރާ ކުރައްވާ ގޮތައްވެސް ވަނީ ހަމަޖެހިފައެވެ. ޓްރަމްޕާއި ރައީސް ކިމްގެ ބައްދަލުވުން ހަގީގަތަކަށް ހެއްދެވުމަށް އެމެރިކާގެ އޮފިޝަލުންގެ ޓީމަކާއި އުތުރު ކޮރެއާގެ އޮފިޝަލުންގެ ޓީމެއް މަޝްވަރާތައް މިހާރު ވެސް ދަނީ ކުރައްވަމުންނެވެ.
ޖޫން 12 ގައި ބާއްވަން އޮތް އުުތުރު ކޮރެއާ އާއި އެމެރިކާގެ ވެރިންގެ ބައްދަލުވުން އެމެރިކާގެ ރައީސް ބުރާސްފަތި ދުވަހު ކެންސަލް ކުރައްވާފައިވާއިރު، އެކަން ހާމަކޮށް ބުރާސްފަތި ދުވަހު އެމެރިކާގެ ރައީސް އުތުރު ކޮރެއާގެ ލީޑަރަށް ފޮނުއްވި ސިޓީއެއްގައި ވިދާޅުވީ "އުތުރު ކޮރެއާގެ ލީޑަރު އެންމެ ފަހުން ވިދާޅުވި ބަސްފުޅަކީ ރުޅިވެރިކަމާއި، ހަމަނުޖެހުމަށް ހިއްވަރުދޭ ބަސްފުޅެއް ކަމަށާއި އެހެންކަމުން މިވަގުތަކީ ދުރާލާ ކުރިން ޝެޑިއުލް ކުރެވުނު ބައްދަލުވުން ބާއްވަން އެންމެ ރަނގަޅު ވަގުތު ނޫން ކަމަށެވެ".
