ހަތަރު އަހަރު ދުވަހުގެ މަސައްކަތަށް ފަހު މެލޭޝިއާ އިން ފުރައިގެން ޗައިނާގެ ބޭޖިންއަށް ދަނިކޮށް ގެއްލުނު އެމްއެޗް 370 މަތިންދާ ބޯޓް ހޯދުމުގެ މަސައްކަތް އެންމެ ފަހުން ކުރަމުން އައި، އަމިއްލަ ކުންފުނިން ރަސްމީކޮށް ނިންމާލައިފިއެވެ.

ޖެނުއަރީ މަހު މެލޭޝިއާ ސަރުކާރާ އެކު މަތިންދާބޯޓު ހޯދަން އެމެރިކާއަށް ނިސްބަތްވާ އަމިއްލަ ކުންފުނި، އޯޝަން އިންފިނިޓީން ސޮއިކުރީ ޖެނުވަރީ މަހުގައެވެ. އެ އެއްބަސްވުމުގައި ވާގޮތުން އެ ކުންފުންޏަށް ބޯޓް ފެނިއްޖެ ނަމަ 70 މިލިއަން ޑޮލަރާއި ހަމައަށް ފައިސާ ލިބިދޭއިރު ނުފެނިއްޖެ ނަމަ އެއްވެސް އެއްޗެއް ދޭކަށެއް ނުޖެހެއެވެ.

އޯޝަން އިންފިނިޓީން ވަނީ ބޯޓު ވެއްޓުނުކަމަށް ބެލެވޭ އިންޑިއާ ކަނޑުގެ ދެކުނުގެ ބޮޑު ސަރަހައްދެއް މިނީ ސަބްމެރީންތަކެއް ބޭނުން ކޮށްގެން ބަލައިފައެވެ. އެހެން ނަމަވެސް އުޅަނދާ ބެހޭ އެއްވެސް މައުލޫމާތެއް ވަނީ ހޯދޭ ގޮތް ނުވެފައެވެ. މެލޭޝިއާ ސަރުކާރުން ބުނީ ދެން އިތުރަކަށް ބޯއިންގ 777 ގެ އެ މަތިންދާ ބޯޓު ހޯދުމުގެ މަސައްކަތް ކުރުމުގެ ޚިޔާލެއް ނެތް ކަމަށެވެ.

ދުނިޔޭގެ އެކި ގައުމުތަކުން ވަނީ މެލޭޝިއާ އެކު މިދިޔަ އަހަރު މަތިންދާބޯޓު ހޯދުމުގެ މަސައްކަތް ރަސްމީކޮށް ހުއްޓާލާފައެވެ. ބޯޓު ހޯދުމުގެ މަސައްކަތަށް އޭރު ވަނީ 150 މިލިއަނަށް ވުރެ ގިނަ ޑޮލަރު ޚަރަދުވެފައެވެ. އެހެންނަމަވެސް ޗައިނާ އާއި އޮޓްރޭލި އަދި މެލޭޝިއާ އިން ބުނީ ބޯޓު ވެއްޓުނު ސަރަހައްދާ ބެހޭ ގޮތުން ބުރަދަނެއް ހުރި އެއްވެސް މައުލޫމާތެއް ލިބިއްޖެ ނަމަ ހޯދުމުގެ މަސައްކަތް އަލުން ފަށާނެ ކަމަށެވެ.

މެލޭޝިއާގެ ޓްރާންސްޕޯޓް މިނިސްޓަރ ވިދާޅުވީ ބޯޓު ގެއްލުމާ ބެހޭ ގޮތުން ފުރިހަމަ ރިޕޯޓެއް ޝާއިއު ކުރާނެ ކަމަށެވެ. އެހެން ނަމަވެސް އެކަން ކުރާނީ ކޮން ދުވަހަކުން ކަމެއް ނުއެއް ބުނެއެވެ.

މެލޭޝިއާ ސަރުކާރުން މި މަސައްކަތް ހުއްޓާލާނެ ކަމަށް ބުނެފައިވާއިރު، މެލޭޝިއާގެ ބޮޑުވަޒީރު ކަމަށް ވަރަށް އަވަހަށް އިންތިޚާބު ވާނެ ކަމަށް ބެލެވޭ އަންވަރު އިބްރާހިމް ވިދާޅުވީ އެ ބޯޓް ގެއްލުމާ މެދު ހޯދަން ޖެހޭ އިތުރު ހޯދުންތަކެއް އަދި އެބަހުރި ކަމަށެވެ.

އެ މަތިންދާބޯޓު ގެއްލިފައި ވަނީ 2014 ވަނަ އަހަރުގެ މާޗް މަހުގެ 8 ވަނަ ދުވަހުއެވެ. އެބޯޓުގައި 239 މީހުން ދަތުރުކުރިއެވެ.