އަށް ދުވަހަށް ފަހު ފަލަސްތީނުގެ ރައީސް ހޮސްޕިޓަލުން ދޫކޮށްލައިފި
އެޑްމިޓްކޮށްފައި ވަނީ މޭ މަހު 20 ދުވަހު
ފަލަސްތީނުގެ ރައީސް ހޮސްޕިޓަލް ތެރޭގައި | ފަލަސްތީނުގެ ޕްރެސިޑެންސީ
އަށް ދުވަސް ވަންދެން ފުއްޕާމޭގެ އިންފެކްޝަނަކަށް ފަރުވާ ދިނުމަށް ފަހު ފަލަސްތީނުގެ ރައީސް މަހްމޫދް އައްބާސް ހޮސްޕިޓަލުން ދޫކޮށްލައިފިއެވެ.
ގުދުސްގެ އުތުރުން ދިހަ ވަރަކަށް ކިލޯ މީޓަރުގައި ދުރުގައި އޮންނަ ފަލަސްތީނުގެ ސިޓީ، ރާމައްޟާގެ ހޮސްޕިޓަލެއްގައި ރައީސް އައްބާސް އެޑްމިޓްކޮށްފައި ވަނީ މޭ މަހު 20 ވަނަ ދުވަހުއެވެ.
ރައީސް އައްބާސްގެ ފުއްޕާމެއަށް ޖެހިފައި ވަނީ ނިއުމޯނިއާ ކަމަށް މީޑިއާ ރިޕޯޓްތައް ބުނެއެވެ. ރައީސް އައްބާސް ސަލާމަތް ސިއްހަތެއްގައި ހޮސްޕިޓަލުން ދޫކޮށްލުމާ ގުޅިގެން ވިދާޅުވީ ހުރިހާ ހަމްދެއް ހުރީ ހެއްދެވި ފަރާތަށް ކަމަށެވެ.
ހޮސްޕިޓަލުން ނުކުމެވަޑައިގަންނަވަމުން ރައީސް އައްބާސް ވަނީ މާދަމާ މަސައްކަތަށް ނުކުމެވަޑައިގަންނަވާނެ ކަމަށް މީޑިއާ އަށް ވިދާޅުވެފައެވެ.
އައްބާސް އަށް ސިއްހީ މައްސަލަތައް ދޭތެރެ ދޭތެރެއިން ދިމާވި ނަމަވެސް އޭނާ އަށް ފަހު ވެރިކަމަށް ދެން އަންނާނެ ފަރާތެއް އަދިވެސް ކަނޑައަޅާފައެއް ނުވެއެވެ.
ހަތަރު އަހަރުގެ ރިޔާސީ ދައުރެއްގައި އައްބާސް ވެރިކަމަށް ވަޑައިގެންނެވީ 2004 ވަނަ އަހަރު އޭރުގެ ރައީސް ޔާސިރު އަރަފާތް އަވަހާރަވުމާ ގުޅިގެންނެވެ. ނަމަވެސް އިންތިޚާބު ނުބާއްވާތީ އަދިވެސް ރައީސް އައްބާސް ހުންނެވީ ވެރިކަމުގައެވެ.
