ކްރިމިނަލް ކޯޓުގެ އިސް ގާޒީގެ މަގާމަށް ގާޒީ އަހުމަދު ހައިލަމް އައްޔަންކޮށްފިއެވެ.
މިދިޔަ ޖެނުއަރީ މަހު ކްރިމިނަލް ކޯޓުގެ ގާޒީގެ މަގާމަށް އައްޔަން ކުރެއްވި ހައިލަމް އެ ކޯޓުގެ އިސް ގާޒީގެ މަގާމަށް އައްޔަން ކުރެއްވުމަށް ނިންމެވީ ޖުޑީޝަލް ސާވިސް ކޮމިޝަން (ޖޭއެސްސީ)ގައި ނެގި ސިއްރު ވޯޓަކުންނެވެ.
ކްރިމިނަލް ކޯޓުގެ އިސް ގާޒީގެ މަގާމަށް ހައިލަމް އައްޔަން ކުރެއްވިއިރު، މިދިޔަ އަހަރުގެ ޖުލައި މަހުން ފެށިގެން އެ ކޯޓު ހިންގެވުން ހަވާލުކޮށްފައި ހުރީ ގާޒީ އާދަމް އާރިފާއެވެ.
ޖޭއެސްސީގައި ނެގި ސިއްރު ވޯޓަކުން ޑްރަގު ކޯޓާއި ޖުވެނައިލް ކޯޓުގެ އިސް ގާޒީގެ މަގާމަށް ވެސް ދެ ބޭފުޅަކު ވަނީ އައްޔަން ކުރައްވާފައެވެ. ޖޭއެސްސީން ބުނީ ޑްރަގު ކޯޓުގެ އިސް ގާޒީގެ މަގާމަށް އައްޔަންކޮށްފައި ވަނީ ގާޒީ އަބްދުއްސައްތާރު އަބްދުލް ހަމީދެެވެ. އަދި ޖުވެނައިލް ކޯޓުގެ އިސް ގާޒީ ކަމަށް ސައީދު އިބްރާހިމް އައްޔަންކޮށްފައިވާ ކަމަށް ޖޭއެސްސީން ބުންޏެވެ.
އެ ބޭފުޅުން އެ މަގާމުތަކަށް އައްޔަން ކުރުމަށް ޖޭއެސްސީގައި ނެގި ވޯޓުގެ ތަފްސީލެއް އެ ކޮމިޝަނުން ނުބުނެއެވެ.