އެމެރިކާގެ ކުރީގެ ރައީސް ޖޯޖް އެޗް ޑަބްލިއު ބުޝް އަނެއްކާވެސް ހޮސްޕިޓަލުގައި އެޑްމިޓް ކޮށްފިއެވެ.

އުމުރުފުޅުން 93 އަހަރުގެ ޖޯޖް ބުޝް އެޑްމިޓް ކޮށްފައިވަނީ ލޭގެ ޕްރެޝަރ ދަށްވެ ގައިގެ ވަރު ދެރަވެގެން ކަމަށް ޚަބަރުތައް ބުނެއެވެ. ބުޝް އެޑްމިޓްކޮށްފައިވަނީ އާދީއްތަ ދުވަހު ސަދާން މެއިން ހެލްތު ކެއާގައެވެ. އެމަނިކުފާނުގެ ހާލުކޮޅު ރަނގަޅުވަމުން އަންނަ ކަމަށްވެސް މީޑިއާ ރިޕޯޓްތައް ބުނެއެވެ.

މީގެ ކުރިންވެސް ބުޝް ވަނީ ހޮސްޕިޓަލްގައި އެޑްމިޓް ކުރުމަށްފަހު ދޫކޮށްލާފައެވެ.

އެފަހަރު ބުޝް ހޮސްޕިޓަލުގައި އެޑްމިޓްކޮށް، އައިސީޔޫގައި ފަރުވާދީފައި ވަނީ ލޭގެ އިންފެކްޝަނެއްގެ ސަބަބުން ކަމަށް އާއިލާގެ ސްޕޯކްސްޕާސަން ވަނީ ބުނެފަ އެވެ. ފުރަތަމަ ބުޝްއަށް އައިސީޔޫގައި ފަރުވާދިން ނަމަވެސް، ފަހުން ބުޝްއަށް ފަރުވާދީފައި ވަނީ އައިސީޔޫގައެއް ނޫނެވެ.

ބުޝް އެޑްމިޓްކޮށްފައިވަނީ އަނބިކަނބަލުން ބާބަރާ ބުޝްގެ ޖަނާޒާގެ ކަންތައް ނިންމާލިތާ އެއްދުވަސް ފަހުންނެވެ. އެއީ މިދިޔަ އޭޕްރީލް މަހުގެ ތެރޭގަ އެވެ. ބުޝްއަށް ހޮސްޕިޓަލުގެ 13 ދުވަސްވަންދެން ފަރުވާދީފައިވެއެވެ.

ބުޝްއަކީ އެމެރިކާގެ 41 ވަނަ ރައީސް އެވެ. އެމަނިކުފާނު ވަނީ 1989 އިން 1993 ވަނަ އަހަރަށް އެމެރިކާގެ ރައީސްކަން ކުރައްވާފަ އެވެ. ބުޝްއަކީ ނައިބް ރައީސްކަން ކުރެއްވި ބޭފުޅެއްގެ އިތުރުން ސީއައިއޭގެ ޑިރެކްޓަރުކަން ވެސް ކުރެއްވި ބޭފުޅެކެވެ. ބުޝްއަށް ވަނީ ސިއްހީ އެތަކެއް މައްސަލަތަކެއް ކުރިމަތިވެ ވަޑައިގެންފައެވެ. އޭގެ ތެރޭގައި ލޭގެ އިންފެކްޝަނެއް ޖެހުމާއި ތުރުތުރު އަޅާ ބަލި ތަހައްމަލު ކުރައްވަން ޖެހިވަޑައިގަތުން ހިމެނެއެވެ. އެމަނިކުފާނު ފަހަކަށްއައިސް އުޅުއްވަނީ ފުރޮޅުލީ ގޮނޑީގައެވެ.