ދިވެހިރާއްޖޭގެ ރައީސަކީ ރައްޔިތުންނާއި ހަމައަށް އާދެވޭ މީހަކަށް ވާންޖެހޭ ކަމަށް ރައްޔިތުންގެ މަޖިލީހުގެ ކުރީގެ ރައީސް އަދި ހެންވޭރު އުތުރު ދާއިރާގެ މިހާރުގެ މެންބަރު އަބުދުﷲ ޝާހިދު ވިދާޅުވެއްޖެއެވެ.
އއ. އުކުޅަހުގައި އާދިއްތަ ދުވަހުގެ ރޭ ބޭއްވި ކުރީގެ ރައީސް މުހައްމަދު ނަޝީދުގެ ކެމްޕެއިން ޖަލްސާގައި ވާހަކަފުޅު ދައްކަވަމުން މެންބަރު ޝާހިދު ވިދާޅުވީ މިގައުމަށް މިހާރު ބޭނުން ވަނީ ރައްޔިތުންނަށް ޚިދުމަތްކޮށްދޭނެ، މުއައްސަސާތަކަށް އިހުތިރާމް ކުރާނެ ރައީސެއް ކަމަށެވެ.
ޝާހިދު ވިދާޅުވީ ރާއްޖޭގެ ވެރިކަމަށް ރައްޔިތުން ގެންނަން ބޭނުންވަނީ ރައްޔިތުންނާއި ހަމައަށް އައިސް ރައްޔިތުން އަޑު އަހައި ރައްޔިތުން ބޭނުންވާ ކަންތައްތައް އޮޅުން ފިލުވާ މީހަކު ކަމަށެވެ. އަދި މިހާތަނަށް ރައްޔިތުންގެ އިހްސާސްތައް އެންމެ ގާތުން އަޑުއެހި ރައީސް އަކީ ޖަޒީރާ ރައީސް މުހައްމަދު ނަޝީދު ކަމަށެވެ.
"ރާއްޖޭގެ ރަށްރަށަށް ނޭރޭ މީހަކު، އަރަން ބޭނުން ނުވާ މީހަކު، ރަށްރަށުގައި ތިބި މީހުންނާ ގުޅުމެއް ބާއްވަން ބޭނުން ނުވާ މީހަކު ކީއްކުރަންތޯ ރައީސްކަން އަޅުގަނޑުމެން ދޭންވީ. މީހުންގެ ގެދޮރަށް ޒިޔާރަތްކޮށް ވާހަކަދައްކާލާ ހާލުއަހުވާލު އޮޅުން ފިލުވާލާ އެއްސުފުރާމަތިން ކާލާ ރައީސެއް ބޭނުންވަނީ. ކިހިނެތްތޯ ތުއްތު ކުދިންގެ ހާލަތު، ކިހިނެތްތޯ ކިޔަވާ ކުދިންނާ ދޭތެރޭގައި ކަންތައްތައް ހިނގަމުންދަނީ، ކިހިނެތްތޯ ބަލިމަޑުކަމުގެ ހާލަތު ރަށު ތެރޭގައި އޮތް މިންވަރު އޮޅުން ފިލުވާނީ. މިކަންކަމެއް ނުކުރެވޭނެ ރައްޔިތުންގެ ކާރިއަށް ނުގޮސް" މެންބަރު ޝާހިދު ވިދާޅުވި އެވެ.
ހެންވޭރު އުތުރު ދާއިރާގެ މެންބަރު ޝާހިދު ވިދާޅުވީ ވަށައިގެން ބަރު ހަތިޔާރާއެކު ރަށުތެރޭގައި ދަތުރުކުރާ މީހަކަށް ރައްޔިތުންގެ ހާލު ނޭނގޭނެ ކަމަށާއި، އެވަރުގެ މީހަކަށް ވެރިކަން ނުކުރެވޭނެ ކަމަށެވެ. ޝާހިދު ވިދާޅުވީ މިވޭތުވެދިޔަ މި ފަސް އަހަރު ދުވަހުގެ ތެރޭގައި ރައްޔިތުން ތަހައްމަލު ކުރަންޖެހިފައިވަނީ އަނިޔާވެރިކަމާ ހިތްދަތިކަން ކަމަށެވެ.
އެހެންކަމުން މިއަނިޔާވެރިކަމުން ސަލާމަތްވުމަށްޓަކައި ޖަޒީރާ ރައީސްގެ އަތްމައްޗައް މިގައުމުގެ ހުންގާނު ހަވާލުކުރަންޖެހޭ ކަމަށް ޝާހިދު ވިދާޅުވި އެވެ. އޭނަ ވިދާޅުވީ ރައީސް ނަޝީދަކީ އަޒުމް ވަރުގަދަ، ހިތްވަރުގަދަ، ހިތްތިރި ކަމާއެކު ބަދަލުހިފުމުގެ ރޫހު އެއްވެސް ގޮތަކަށް ގެންގުޅުއްވާ ބޭފުޅެއް ނޫން ކަމަށެވެ.
އުކުޅަހުގައި އޮތް ކެމްޕޭން ޖަލްސާގައި ޝާހިދު ބައިވެރިވެ ވަޑައިގަތީ، އެމަނިކުފާނު ރައީސް ނަޝީދުގެ ކެމްޕޭނާ ފެޔަށް ޖެހިވަޑައިގެންފި ކަމަށް ބުނެ ސަރުކާރަށް ތާއީދު ކުރާ ފަރާތްތަކުން ހަގީގަތެއް ނެތް ވާހަކަތައް ފަތުރަމުންދާ ދަނޑިވަޅެއްގައި ކަން ފާހަގަ ކުރެވެއެވެ.
