ޑރ. މަޖީދުގެ ތައުޒިޔާގެ ދަފްތަރު އާންމުންނަށް ހުޅުވާލައިފި
ތައުޒިޔާގެ ދަފްތަރު މެއި 31 ވަނަ ދުވަހުގެ ނިޔަލަށް ވަނީ އާންމުންނަށް ހުޅުވާލާފައި
މަޝްހޫރު ދީނީ ޢިލުމުވެރިޔާ އަދި ރާއްޖޭގެ ފުރަތަމަ އިސްލާމިކް މިނިސްޓަރު ޑރ. އަބްދުލް މަޖީދު އަބްދުލް ބާރީ
މަޝްހޫރު ދީނީ ޢިލުމުވެރިޔާ އަދި ރާއްޖޭގެ ފުރަތަމަ އިސްލާމިކް މިނިސްޓަރު ޑރ. އަބްދުލް މަޖީދު އަބްދުލް ބާރީގެ ތައުޒިޔާގެ ދަފްތަރު އާންމުންނަށް ހުޅުވާލައިފިއެވެ.
ދިވެހިރާއްޖޭގެ ޤައުމީ ޔުނިވަރސިޓީން މެއި 24 ވަނަ ދުވަހު ހުޅުވި ތައުޒިޔާގެ ދަފްތަރުގައި ހެޔޮއެދޭ ފަރާތްތަކުގެ ޝުއޫރު ފާޅުކުރުމަށް އެ ޔުނިވަރސިޓީން ހުޅުވާލާފައިވެއެވެ.
އެ ތައުޒިޔާގެ ދަފްތަރު މެއި 31 ވަނަ ދުވަހުގެ ނިޔަލަށް ކޮންމެ ދުވަހެއްގެ ހެނދުނު 10:00 އިން މެންދުރު ފަހު 2:00 އަށް ޤައުމީ ޔުނިވަރސިޓީގެ މައި އޮފީހުގައި އާންމުކޮށް ހުޅުވާލާފައި ހުންނާނެއެވެ.
ޑރ. އަބްދުލް މަޖީދު ޢަބްދުލްބާރީ ޤައުމީ ޔުނިވަރސިޓީއާ ގުޅިވަޑައިގަތީ 2012 ވަނަ އަހަރުގެ މާރޗް 22 ވަނަ ދުވަހުގައެވެ.
މީގެ އިތުރުން އިސްލާމިކް މިނިސްޓްރީން ވެސް ވަނީ ޑރ. މަޖީދުގެ ތައުޒިޔާގެ ދަފްތަރެއް ހުޅުވާފައެވެ.
ޑރ. މަޖީދު އަވަހާރަވީ ލަންކާ ހޮސްޕިޓަލުގައި ފަރުވާދެމުން ދަނިކޮށް މެއި 22 ވަނަ ދުވަހުއެވެ.
ގުރުއާނުގެ އިލްމު ފެތުރުއްވުމުގައި ބުރަ މަސައްކަތްތަކެއް ކުރެއްވި ޑރ. މަޖީދަކީ ތަފްސީރު އިލްމުން ޕީއެޗްޑީ އެންމެ ފުރަތަމަ ނެންގެވި ބޭފުޅާއެވެ. ކީރިތި ގުރުއާނާ ބެހޭ މަރުކަޒުގެ ރައީސްކަން ވެސް ކުރެއްވި ޑރ. މަޖީދު ވަނީ އެމްޑީޕީ ސަރުކާރުގެ ތިން އަހަރު އިސްލާމިކް މިނިސްޓަރުކަން ކުރައްވާފައެވެ.
