އިދިކޮޅު ހުރިހާ ޕާޓީތަކުން ވެސް އެއް ބަޔަކު އަނެއް ބަޔަކަށް އިހްތިރާމުކޮށް، މަސްލަހަތު ގެއްލޭނެ ކަންކަމުން ދުރުހެލިވުމަށް ގަލޮޅު ދެކުނު ދާއިރާގެ މެމްބަރު އަހުމަދު މަހުލޫފު ގޮވާލައްވައިފިއެވެ.

ޝަރީއަތް ނިމެންދެން ގޭ ބަންދަށް ބަދަލުކޮށްފައި ހުރި މަހުލޫފު އޭނާގެ ފޭސްބުކްގައި ލިޔެފައި ވަނީ ކޯލިޝަންގައި ތިބީ ތަފާތު ޕާޓީތަކެއް ކަމަށާއި ކޮންމެ ޕާޓީއަކުން ވެސް ރިޔާސީ އިންތިހާބަށް ކެންޑިޑޭޓެއް ނެރެން ބޭނުންވާ ކަމަށެވެ.

މަހުލޫފު ވިދާޅުވީ އެއީ މައްސަލައެއް ނޫން ކަމަށާއި ހިތް ނޭދޭ ވާހަކަތައް ދޭތެރެ ދޭތެރެއިން އަޑުއިވޭނެ ކަމަށެވެ. އިންތިހާބާ ކައިރިވާ ވަރަކަށް އެކަހަލަ އަޑު ގަދަވާނެ ކަމަށް ކަމަށާއި އެކަމާ ކަންބޮޑުވުމުގެ ބޭނުމެއް ނެތް ކަމަށް މަހުލޫފު ވިދާޅުވިއެވެ. އަދި ވިދާޅުވީ އިދިކޮޅު ހަތަރު ލީޑަރުން ވެސް ތިއްބެވީ އެކުގައި ކަމަށާއި އެ ލީޑަރުންނަށް އިތުބާރު ކުރައްވާ ކަމަށެވެ.

ޕާޓީތަކުގެ އިސް ބޭފުޅުންނަށް އިލްތިމާސްކޮށް، މަހުލޫފު ގޮވާލައްވާފައި މަސްލަހަތު ގެއްލޭނެ ކަންކަމުން ދުރުހެލިވުމަށާއި ރައްޔިތުންގެ އުންމީދު ފަނޑުނުވާނެ ގޮތަކަށް މަސައްކަތްތައް ތަރުތީބު ކުރުމަށެވެ. 

"އަޅުގަނޑުގެ އެދުމަކީ ހުރިހާ ޕާޓީތަކުން ވެސް އެއް ބަޔަކު އަނެއް ބަޔަކަކަށް އިހްތިރާމުކޮށް، މަސްލަހަތު ގެއްލޭނެ ކަންކަމުން ދުރުވެ، އަދި ރައްޔިތުންގެ އުންމީދު ކުޑަކޮށް ވެސް ފަނޑުނުވާނެ ގޮތަކަށް މަސައްކަތްތައް ތަރުތީބު ކުރުން،" މަހުލޫފު ވިދާޅުވެފައިވއެވެ.

"އެކުވެރި ކަމަކީ ގަދަފަދަ ބާރެއް، ވަކިވެގަތުމަކީ ނިކަމެތި ކަމެއް،"

ކޯލިޝަންގައި ހިމެނޭ ޕާޓީތަކުގެ ހިޔާލު ތަފާތުވުންތަކަށް އިޝާރާތްކޮށް މަހުލޫފު ވިދާޅުވީ ރައީސް އަބްދުﷲ ޔާމީން ހިނިފުޅުވަޑުވާނެ ކަމަށާއި ނަމަވެސް މާތްﷲގެ އިރާދަފުޅާއެކު އިންތިހާބު ކާމިޔާބު ކުރާއިރު، ކޯލިޝަން އޮންނާނެ ކަމަށެވެ.

މަސްލަހަތު ގެއްލޭ ގޮތަށް ވާހަކަ ނުދެއްކުމަށް މަހުލޫފު ގޮވާލައްވާފައިވާއިރު، މި ސަރުކާރުގެ ފުރަތަމަ ނައިބު ރައީސް ޑރ. މުހައްމަދު ޖަމީލު އަހުމަދު ވަނީ ރައީސް މުހައްމަދު ނަޝީދަށް ބަހުގެ ހޫނު ހަމަލާތަކެއް ރައްދު ކުރައްވާފައެވެ.

ހަރަކާތްތައް މަޑުޖެހިފައިވާ މޯލްޑިވްސް ޔުނައިޓެޑް އޮޕޮޒިޝަން (އެމްޔޫއޯ)ގެ ލީޑަރުކަން ވެސް ކުރައްވާ ޖަމީލު ވިދާޅުވެފައި ވަނީ ހައްލު ކުރެވޭނީ ހަމައެކަނި ތިމަންނައަށޭ ވިދާޅުވުމުގެ ހައްގެއް އެއްވެސް ބޭފުޅަކަށް ނެތް ކަމަށެވެ.