ރަނގަޅަށް ރޯފިލިއިރު މާބޮޑަށްވެސް ލަސްވެއްޖެ: މަޚްލޫފް
26 މެއި 2018 | ހޮނިހިރު 10:26ކަމުގެ ދެކޮޅު ނުބައްލަވައި ދެކެވުނު ވާހަކަތަކާއިމެދު މިއަދު ދެރަވޭ
ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު އަޙުމަދު މަޚްލޫފް
ކަމުގެ ހަޤީޤަތް އެންމެ ރަނގަޅަށް ނުބަލައި އެކިއެކި ވާހަކަ ދެއްކިފައި ހުންނާނެ ކަމަށާއި، "ރަނގަޅަށް ރޯފިލިއިރު މާބޮޑަށް ލަސްވެ، ވަގުތު ފާއިތުވެއްޖެ" ކަމަށް ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު އަޙުމަދު މަޚްލޫފް ވިދާޅުވެއްޖެއެވެ.
މަޚްލޫފް މިހެން ވިދާޅުވީ، ޕީޕީއެމްގެ މެންބަރެއްގެ ގޮތުގައި ހުންނަވައިގެން 2012 ވަނަ އަހަރާއި 2013 ވަނަ އަހަރު، މޯލްޑިވިއަން ޑިމޮކްރެޓިކް ޕާޓީ އާއި އެ ޕާޓީގެ ސަރުކާރު އަދި ކުރީގެ ރައީސް މުޙައްމަދު ނަޝީދަށް ފާޑުވިދާޅުވެ، މަޚްލޫފް ކުރައްވާފައިވާ ޓްވީޓްތަކެއް، މި ހަފްތާ ބަންދުގައި ސަރުކާރަށް ތާޢީދުކުރާ ފަރާތްތަކުން ރީޓުވީޓް ކުރަމުންދާ ދިއުމަށް އިޝާރާތް ކުރައްވައެވެ.
ފޭސްބުކްގައި ކުރެއްވި ޕޯސްޓެއްގައި މަޚްލޫފް ވިދާޅުވީ، ކުރިން މަޚްލޫފްވެސް އުޅުއްވީ ސޯޝަލް މީޑިއާގައި އުޅޭ ސަރުކާރަށް ތާޢީދުކުރާ ޒުވާނުން އުޅޭ ގޮތަށް ކަމަށެވެ. އެގޮތުން ކޮންމެ މީހަކު ދައްކާ ވާހާކައެއްވެސް ޤަބޫލުކޮށް، ބައެއްފަހަރު ކަންކަމުގެ ދެކޮޅު ބެލުމެއްނެތި ޓީވީ ޕްރޮގްރާމްތަކާއި ޕޯޑިއަމްތަކުގައި ވާހަކަފުޅު ދެއްކެވިފައިވާނެ ކަމަށެވެ.
"އަނިޔާ ތަޖުރިބާކުރި މީހުން ދެއްކި ވާހަކަތަކަށް ސަމާލުކަމެއް ނުދެން. ފަނޑިޔާރުގެ އޮތީ ކޮން ހާލެއްގައިތޯ ނުބަލަން، ހިތް އެދޭގޮތަށް ޙުކުމްތައް ނެރެދޭތީ އުޅުނީ ފަނޑިޔާރުންނާއި ފަނޑިޔާރުގެތައް ދިފާއު ކުރަން. ރަނގަޅަށް ރޯފިލިއިރު މާބޮޑަށްވެސް ލަސްވެއްޖެ. ވަގުތު ފާއިތުވެއްޖެ. ދާންޖެހުނީ ޖަލަށް"، މަޚްލޫފް ވިދާޅުވެފައިވެއެވެ.
މަޚްލޫފް ވިދާޅުވީ، ކަމުގެ ދެކޮޅު ނުބައްލަވައި ދެކެވުނު ވާހަކަތަކާއިމެދު މިއަދު ކިތަންމެ ދެރަވި ނަމަވެސް އެވާހަކަތައް އަނބުރާ ގެންދެވެން ނެތް ކަމަށާއި، އެވާހަކަތައް އެވަނީ ދެކެވި ނިމިފައި ކަމަށެވެ.
އަދި އޭރު ދެކެވުނު ވާހަކަތަކުގެ ތެރޭގައި އަދިވެސް ޤަބޫލުކުރައްވާ ބައެއް ވާހަކަތަކާއި، ހަޤީޤަތް އެނގިނުލައްވައި އޭރު ދެކެވުނު ބައެއް ވާހަކަފުޅުތައް ހިމެނޭ ކަމަށް ވިދާޅުވެ މަޚްލޫފް ވަނީ އެ ކަންކަމާއި މަޢާފަށް އެދިވަޑައިގެންފައެވެ.
"ކުރިން ދެއްކި ވާހަކަތަކުގެ ތެރޭގަ މިއަދުވެސް ޤަބޫލުކުރާ ބައިވަރު ވާހަކަ އެބަހުރި އަދި ދައްކަން ނުޖެހޭ، ބުނަން ނުޖެހޭ، ހަޤީޤަތް ނޭނގޭ ވާހަކަ އެބަހުރި. އެކަންކަމާ ދެރަވަން. މަޢާފަށް އެދެން"، މަޚްލޫފް ލިޔުއްވާފައިވެއެވެ.
މަޚްލޫފް ވިދާޅުވީ މިއަދު އޮތީ ހެދުނު ގޯސްތައް ރަނގަޅު ކުރުމަށް މަސައްކަތް ކުރުން ކަމަށާއި، މަޚްލޫފް ހުންނެވީ އެކަމަށް ފިސާރި ކެރިވަޑައިގެން ކަމަށެވެ.
"ހެދުނު ގޯސްތަކުގަ އަޅުގަނޑުގެ ކޮންމެސް ވަރެއްގެ ބައިވެރިވުން ސީދާގޮތުން ނޫނީ ނުސީދާގޮތުން އޮތަތީވެ، އިސްލާހަށް ކުރަންޖެހުނު ކޮންމެ މަސައްކަތެއް ކިތަންމެ ބޮޑު ޤުރުބާނީއެއް ވެގެންވެސް ކުރަން މިހިރީ ކެރިގެން ނުކުމެ"، މަޚްލޫފް ވިދާޅުވެފައިވެއެވެ.
މަޚްލޫފް ވިދާޅުވީ އިސްލާހީ މަސައްކަތުގައި މަޚްލޫފްގެ ޒިންމާ ބޮޑުކަމަށް ދެކިލައްވާ ކަމަށެވެ.
