ފާދިއްޕޮޅުގެ ރަށްތައް އެއް މަގަކުން ގުޅާލެވެން އެބައޮތް، އެކަމަށް އެސްއީޒެޑެއް ބޭނުމެއް ނުވޭ: ރައީސް ނަޝީދު
ރައީސް ޔާމީނަށް އެންމެ އިކޮނޮމިކް ޒޯނެއްވެސް ނުހެއްދެވެނު
ރައީސް ނަޝީދު ސްކައިޕް މެދުވެރިކޮށް ސަޕޯޓަރުންނާއި މުޚާޠަބުކުރައްވަނީ
ހިންނަވަރާއި ނައިފަރު އެއްމަގަކުން ގުޅާލެވި، ފާދިއްޕޮޅުގެ ރަށްތައް ގުޅާލެވެން އެބައޮތްކަމަށާއި، އެކަމަށް ސްޕެޝަލް އިކޮނޮމިކް ޒޯނެއް ބޭނުން ނުވާކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު މިހެން ވިދާޅުވީ އެމްޑީޕީގެ ރިޔާސީ ޓިކެޓް ހޯއްދެވުމަށް އެމަނިކުފާނު ކުރިއަށް ގެންދަވާ 'ޖަޒީރާ ރައީސް' ކެމްޕޭންގެ ތެރެއިން ޅ އަތޮޅު ނައިފަރުގައި ބުދަ ދުވަހުގެރޭ ބޭއްވި ޖަލްސާގައި، އެޖަލްސާގެ ބައިވެރިންނާއި ވީޑިއޯ މެދުވެރިކޮށް ވާހަކަ ދައްކަވަމުންނެވެ. ވިއްސަކަށް މިނެޓަށް ދިގު ދެމިގެންދިޔަ ރައީސް ނަޝީދުގެ ވާހަކަފުޅުގައި ރައީސް އަބްދުﷲ ޔާމީންގެ އިޤްތިޞާދީ ސިޔާސަތަށް ވަރަށް ބޮޑަށް ފާޑުވިދާޅުވިއެވެ. އެގޮތުން ވަކިން ޚާއްސަކޮށް ސްޕެޝަލް އިކޮނޮމިކް ޒޯންތަކެއް ހައްދަވާނެކަމަށް ރައީސް ޔާމީން ވެވަޑައިގެންނެވި ވައުދަށް އެމަނިކުފާނު ވަރަށް ބޮޑަށް ފާޑުވިދާޅުވިއެވެ.
"ރައީސް ޔާމީން ވިދާޅުވި ސްޕެޝަލް އިކޮނޮމިކް ޒޯން ހައްދަވާނަމޭ. ހަމަ އެންމެ ތަނެއްވެސް ނުހެއްދެވެނު. ގުޅީފަޅުގެ ވާހަކަ ކޮންމެ ފަހަރަކު ވިދާޅުވޭ. އިހަވަންދިއްޕޮޅުގެ ވާހަކަ އެތައް ފަހަރަކު ވިދާޅުވި. މުޅި ފ އަތޮޅު އެކީގައި ވިއްކާލަން އެއްފަހަރަކު އުޅުއްވި. އަދި އެތަންމިތަން ހިއްކައި، އެކިއެކި ފަރާތްތަކަށް ފިނޮޅާއި، ފަރާއި ފަޅާއި ވިއްކާ ހައްދަވައިފި. އޭގެ ފައިސާ ނަންގަވައިފި،" ރައީސް ނަޝީދު ވިދާޅުވިއެވެ.
އެމްއެމްޕީއާރްސީގެ ކޮރަޕްޝަންގެ މައްސަލައިގައި ވާހަކަ ދައްކަވަމުން ރައީސް ނަޝީދު ވިދާޅުވީ އެތަނުގެ ފައިސާ ގޮސްފައި ހުރީ ކަނޑައެޅިގެން ދާން ނުޖެހޭ ތަންތަނަށްކަމަށެވެ. ޚާއްސަކޮށް ރައީސް އަބްދުﷲ ޔާމީންގެ އިސްލާމިކް ބޭންކްގައި އޮންނަ އެކައުންޓަށް އޭގެ ތެރެއިން 1 މިލިއަން ޑޮލަރު ވަދެފައިވާކަމީ މާ ސާފުކޮށް އެނގޭކަމެއް ކަމަށް ރައީސް ނަޝީދު ފާހަގަކުރެއްވިއެވެ.
ރައީސް ނަޝީދު ވިދާޅުވީ ރައީސް ޔާމީންގެ ވެރިކަމުގައި ތަރައްޤީގެ މަޝްރޫޢުތައް ނުހިންގުނު ތަނުގައި ފެނިގެން ދިޔައީ އިންތިހާއަށް ވައްކަމާއި ކޮރަޕްޝަން ހިންގާތަން ކަމަށެވެ.
ސިޔާސީ މަސްރަހަށް އަލިއަޅުއްވާލައްވާ ރައީސް ނަޝީދު ވިދާޅުވީ ރާއްޖޭގެ ވެރިކަން ވަނީ މިއަދު ގަޑުބަޑު ވެފައިކަމަށެވެ. އަދި ދިވެހިން ރިޔާސީ ނިޒާމެއް ބަލައިގަތީ އަނިޔާވެރި ނިޒާމެއް ހޯދުމުގެ ނިޔަތުގައި ނޫންކަމަށެވެ. އެމަނިކުފާނު ވިދާޅުވީ ރައްޔިތުން ބޭނުންވީ ވާދަވެރި ސިޔާސީ ނިޒާމެއްކަމަށާއި، ޖަދަލުކުރާ ނިޒާމެއް ދިވެހިން ބޭނުން ނުވާކަމަށެވެ.
އަލުން އަނބުރާ ޚުދުމުޚުތާރު ނިޒާމަކަށް ރާއްޖެ ދާކަމަށް ވިދާޅުވެ، ރައީސް ނަޝީދު ވިދާޅުވީ ރާއްޖެ ވަނީ މިއަދު އިންތިހާއަށް ދަރަނިވެރިވެފައިކަމަށެވެ.
"މި ދަރަނި އަޅުގަނޑުމެންގެ އިހު ދަރަންޏާއި ވަރަށް ތަފާތު. ޗައިނާއަށް ދަރާފައިވާ ދަރަނި. ދަރަނީގެ އުޞޫލު، ދިވެހިންނަށް ވަރަށް ސާފުވާނެ މިކަން ހިންގާ ގޮތް. ދަތިވަނީ އެއްލައްކަ ޑޮލަރަށް، މިސާލަކަށް. ދަތިވީމާ، 1 މިލިއަން ޑޮލަރުގެ ޗެކަކާއި، ގޯތީގެ ރަޖިސްޓްރީ މިދެނީ ސޫތަށް، ފައިސާ ދޭ މީހެއްގެ އަތަށް. ދިނީމަ ލިބެނީ 1 ލައްކަ ޑޮލަރު. 1 ލައްކަ ޑޮލަރުގެ ރައުސްމާލަކުން 1 މިލިއަން ޑޮލަރު އަނބުރާ ދެއްކޭނެ ވިޔަފާރިއެއް ނެތް. އެހެންވީމާ ގެއްލެނީ ގޯތި. މިއަދު މިދަނީ މިދިވެހިރާއްޖޭގެ ރަޖިސްޓްރީ ގެއްލެން. ޗައިނާގެ އެގްޒިމް ބޭންކަށް ރާއްޖެ އަޅުގަނޑު މިދެންނެވި އުޞޫލުން ދަރައިފި"
ރައީސް ނަޝީދު ވިދާޅުވީ ދިވެހިރާއްޖޭގެ އިސްތިޤްލާލަށް އެހެން ޤައުމެއްގެ ބާރު ފޯރުވުމުން އިންޑިއާ ކަނޑުގެ ސުލްހަ ގެއްލޭނެކަމަށެވެ. އަދި އިންޑިއާއާއި، އިންޑިއާ ކަނޑުގައި ހިމެނޭ އަޅުގަނޑުމެންގެ އަވަށްޓެރިންގެ ސަލާމަތާއި ރައްކާތެރިކަމަށް އަޅުގަނޑުމެން ވިސްނާލަން ޖެހގޭނެކަމަށް ރައީސް ނަޝީދު ވިދާޅުވިއެވެ. އަދި އެކަމަށް ނުވިސްނާ އަޅުގަނޑުމެންނަށް ހަމަޖެހޭ އަމާން ދިރިއުޅުމެއް ނޫޅެވޭނެކަމަށް ރައީސް ނަޝީދު ވިދާޅުވިއެވެ.
