މާރޗު 16ގައި ގުޅިފައިވާ ޕާޓީތަކުން ބޭއްވި މުޒާހަރާއާ ގުޅިގެން ރާއްޖެޓީވީގެ މައްސަލައެއް ބަލަނީ!
ތަހުގީގު ކުރަނީ މުޒާހަރާގެ ލައިވް ކަވަރޭޖްގައި ބައިވެރިވި ފަރާތްތަކުން ދެއްކި ކަމަށް ބުނާ ވާހަކަތަކެއް ބްރޯޑްކާސްޓް ކުރުމުން
ރާއްޖެޓީވީގެ ސީއޯއޯ އާއި ގާނޫނީ ވަކީލުން ބްރޯޑްކޮމްއަށް ވަޑައިގެންނެވުމަށްފަހު --
ގުޅިފައިވާ ސިޔާސީ ޕާޓީތަކުން މިދިއަ މާރޗު މަހުގެ 16 ވަނަ ދުވަހުގެ ރޭ ބޭއްވި މުޒާހަރާއާ ގުޅިގެން ރާއްޖެޓީވީގެ މައްސަލައެއް މޯލްޑިވްސް ބްރޯޑްކާސްޓިންގ ކޮމިޝަން (ބްރޯޑްކޮމް)އިން ބަލަން ފަށައިފި އެވެ.
އެ މައްސަލާގައި ބްރޯޑްކޮމްއިން ރާއްޖެޓީވީއަށް ފޮނުވާފައިވާ ސިޓީގައި ބުނެފައި ވަނީ ރާއްޖެޓީވީން 16 މާރޗް 2018 ވަނަ ދުވަހުގެ ރޭ 21:21 އިން 23:35 އަށް ބްރޯޑްކާސްޓްކުރި "މުޒާހަރާގެ ލައިވް ކަވަރޭޖް"ގައި ގައުމުގެ އަމަންއަމާންކަން ނަގާލައި، ރައީސް އަބްދުﷲ ޔާމީންގެ އަބުރު ގެއްލޭފަދަ ކޮށްޓެންޓެއް ބްރޯޑްކާސްޓް ކޮށްފައިވާކަމަށް ބެލެވޭތީ އެ މައްސަލަ ބަލަމުންދާ ކަމަށެވެ.
ބްރޯޑްކޮމްއިން ފޮނުވާފައިވާ އެސިޓީގައި ބުނެފައި ވަނީ މި މައްސަލައާގުޅޭ ކޮންޓެންޓުގައި އަބުރު ރައްކާތެރިކޮށްދިނުމާއި ހިޔާލު ފާޅުކުރުމުގެ މިނިވަންކަމުގެ ގާނޫނުގެ 09 ވަނަ މާއްދާގެ (ހ)ގެ 1 ވަނަ ނަމްބަރާއި، ހަމަ އެގާނޫނުގެ 10 ވަނަ މާއްދާގެ (ހ) އަދި އެމާއްދާގެ (ބ)އާ ހިލާފު ކޮންޓެންޓް ބްރޯޑްކާސްޓްކޮށްފައިވާ ކަމަށް ބެލެވޭ ކަމަށެވެ.
އެ ކޮމިޝަނުން އެގޮތަށް ބުނެ ފޮނުވާފައިވާ ލިޔެކިޔުންތަކުގައި އެ މުޒާހަރާގެ ލައިވް ކަވަރޭޖްގައި ޕްރެސެންޓަރު ކޮށްފައިވާ ސުވާލުތަކަށް ގުޅިފައިވާ ސިޔާސީ ޕާޓީތަކުން އެ ލައިވްގައި ބައިވެރިވެވަޑައިގެންނެވި ފަރާތްތަކުން ދައްކާފައިވާ ގިނަ ކަންތައްތަކެއް ވަނީ ފާހަގަ ކޮށްފަ އެވެ.
ނަމަވެސް އެމީހުން ދައްކާފައިވާ ވާހަކައިން ގައުމުގެ އަމަންއަމާންކަން ނަގާލުމާއި ރައީސް ޔާމީންގެ އަބުރު ގެއްލެނީ ކޮން ސަބަބަކާހުރެކަމެއް ބަޔާން ކޮށްދީފައެއް ނުވެއެވެ. ހަމައެކަނި ދެއްކި ވާހަކަ ތަކުގެ ސްކްރިޕްޓް ލިޔެފައިވާއިރު، ދެން ހިމަނާފައިވަނީ ހިލާފުވި ކަމަށްބުނާ ގާނޫނުގެ މާއްދާ އެވެ. ދައްކާފައިވާ ވާހަކަތަކާ އެމާއްދާއާ ހިލާފުވާ ސަބަބެއް ބުނެދީފައެއް ނުވެއެވެ.
އެހެންކަމުން ބްރޯޑްކޮމްއިން ފޮނުވި ލިޔެކިޔުންތަކުން ސާފުނުވާ ގިނަ ކަންކަން ހުރުމުން ރާއްޖެޓީވީން ވަނީ އެކަންކަން ސާފުކޮދިނުމަށާއި ބްރޯޑްކޮމްގެ އިހުތިސާސްގެ ތެރޭގައި ނުވާކަމެއްގެ ތަހުގީގެއް ހިންގަމުންދާކަން ވެސް ފާހަގަ ކުރެވިފައިވާ ކަމަށް ބުނެފައެވެ.
ބްރޯޑްކޮމްއިން ފޮނުވާފައިވާ ލިޔެކިޔުންތަކުން ސާފުނުވާކަންކަން ސާފު ކުރެއްވުމަށް ބުދަ ދުވަހު ރާއްޖެޓީވީގެ ސީއޯއޯ ހުސައިން ފިޔާޒު މޫސާއާއި މިމައްސަލާގައި ރާއްޖެޓިވީގެ ގާނޫނީ ޓީމުގެ ގާނޫނީ ވަކީލުން ކަމަށްވާ އަލީ ހުސައިން އާއި ނިޝާން އިބްރާހިމް ވަނީ ބްރޯޑްކޮމްއާއެކު ބައްދަލުވުމެއް ބާއްވާފަ އެވެ. ނަމަވެސް މި ބައްދަލުވުމުންވެސް އެއްވެސް ކަމެއް ސާފުވާގޮތް ނުވުމުން ލިޔުމުން އެކަންކަން ސާފުކޮށްދިމަށް އެދިފައިވާ ކަމަށް ރާއްޖެޓީވީގެ ވަކީލުން ވިދާޅުވި އެވެ.
"އެލިޔެކިޔުންތަކުގައި ސާފުނުވާ ކަންކަން އެބަހުރި. އަދި ބައެއް ކަންތައްތަކީ ބޮރޯޑްކާސްޓިން ކޮމިޝަނަށް ތަހުގީގު ކުރުމުގެ ބާރުލިބިގެންވާ މައްސަލަތަކެއް ކަމަށް އަޅުގަނޑުމެން ގަބޫލު ނުކުރަން. މިމަސައްލައާއި ގުޅިގެން އަޅުގަނޑުމެންގެ ކަންބޮޑުވުންތައް ކޮމިޝަނަށް ވާނީ ހުށަހަޅާފައި. އެންމެ މުހިއްމުކަމެއްގެ ގޮތުގައި ފާހަގަކޮށްފައިވާނީ ބޮރޯޑްކާސްޓިންގ ކޮމިޝަނުން ތަހުގީގު ކުރަމުންދާ އެމައްސަލާގައި މޯލްޑިވްސް ޕޮލިސް ސާރވިސްއިން ނޫންނިއްޔާ ތަހުގީގު ނުކުރެވޭނެ ބައެއް ކަހަލަ މައްސަލަތައް ބްރޯޑްކޮމްއިން ތަހުގީގު ކުރާކަން. އަނެއްކަމަކީ ފޮނުވާފައިވާ ލިޔެކިޔުންތަކުން އަޅުގަނޑުމެންނަކަށް ނޭނގޭ ޖަވާބުދާރީވާންވީ ކޮންކަމަކަށްކަމެއް،" މިމައްސަލާގައި ރާއްޖެޓީވީގެ ގާނޫނީ ޓީމުގެ ގާނޫނީ ވަކީލު އަދި ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު އަލީ ހުސައިން ވިދާޅުވި އެވެ.
