އިލްމީ މާހިރުން ދެކޭ ގޮތުގައި ސޫޕަކީ ރޯދަ ވީއްލާ ގަޑިގައި ވެސް އަދި އޭގެ ފަހުންވެސް ބޭނުން ކުރަން ވަރަށް ރަނގަޅު އެއްޗެކެވެ. އެހެނީ، އޭގައި ގިނަ އަދަދަކަށް ފެން ހިމެނުމުގެ އިތުރުން ކާބޯހައިޑްރޭޓްސް، ޕްރޮޓީންސް އަދި މިނޫންވެސް ހަށިގަނޑަށް ފައިދާ ހުރި ގިނަ މާއްދާ ތައް އެކުލެވިފައިވާތީއެވެ. ސޫޕުގެ އެކި ވައްތަރު ތަކުގެ ތެރެއިންވެސް ރޯދަ ވީއްލާ ގަޑީގައި ބަތްޕެން ފަދަ ކުޅި ނުވަތަ މަޑު ސޫޕް ބޭނުން ކުރުން އެދެވިގެންވެއެވެ.
ފައިދާ:
- ސޫޕުގައި ގިނަ އަދަދަކަށް ފައިބަރ ހިމެނުމުގެ ސަބަބުން ބަނޑު ހިއްކުމުން ދުރުކޮށްދެއެވެ.
- ހަޖަމު ކުރުމަށް،ރޯދަ ވީއްލުމު ގައި ސޫޕް ބޭނުން ކުރުމުގެ ސަބަބުން ބަނޑު ހުޅުވި ހަޖަމު ކުރުމަށް ތައްޔާރުކޮށްދެއެވެ.
- ސޫޕަކީ ފެން ގިނައިން ހިމެނޭ އެއްޗެއް ކަމުން ހަންގަނޑު އޮމާންކަން މަތީގައި ބަހައްޓައިދިނުމަށް އެހީތެރިވެދެއެވެ.
- ސޫޕަކީ ދުޅަހެޔޮ އަދި އަވަހަށް ބަނޑު ފުރައިދޭ ކެއުމެކެވެ.
- ފެނުގެ އިތުރުންވެސް ކާބޯހައިޑްރޭޓްސް، ޕްރޮޓީންސް އަދި މިނޫންވެސް ހަށިގަނޑަށް ފައިދާ ހުރި ގިނަ މާއްދާ ތައް ސޫޕް ގައި އެކުލެވިފައި ވުމުގެ ސަބަބުން ހަށިގަނޑަށް ބޭނުންވާ ވަރަށް ހަކަތަ ފޯރުކޮށްދެވެއެވެ.
- ރޯދަ ވީއްލާ ވަގުތުގައި ސޫޕް ބޭނުން ކުރުމުގެ ސަބަބުން ބަނޑަށް ކުޑަ ހޫނު ކަމެއް ގެނެސްދީ ވައިގެ އުނދަގުލުން ސަލާމަތް ކޮށްދެއެވެ.
- ސޫޕަކީ ލުއި، އަދި އެހާމެ ހަށިގަނޑަށް ފައިދާހުރި މީރު އެއްޗެކެވެ.