ކުރީގެ ޕްރޮސެކިޔުޓާ ޖެނެރަލް މުހުތާޒު މުހުސިން އޭޑީކޭ ހޮސްޕިޓަލުގައި އެޑްމިޓުކޮށްގެން ފަރުވާ ދިނުމަށްފަހު މިއަދު މާފުށީ ޖަލަށް ބަދަލުކޮށްފިއެވެ.
މުހުތާޒުގެ އާއިލާއިން ބުނީ މުހުތާޒު އެޑްމިޓް ކުރީ މައިބަދައިގެ މައްސަލަތަކަށް ފަރުވާ ދިނުމަށް ކަމަށާއި، ބާރުގަދަ އިންޖެކްޝަންތަކެއް ޖެހުމަށް ކަމަށެވެ.
މުހުތާޒުގެ އަނބިކަނބަލުން ޝާދިޔާ އާދަމް ވިދާޅުވީ ނުވަ ދުވަހު މުހްތާޒު އެޑްމިޓްކޮށްގެން ފަރުވާ ދިނުމަށް ފަހު ޖަލަށް ބަދަލުކުރީ މިއަދު މެންދުރު ކަމަށެވެ. ޝާދިޔާ ވިދާޅުވީ އިންޖެކްޝަން ޖެހުމަށްފަހު ވަކި ކަންތައްތަކެއް ކުރުމަށް އަންގާފައިވާ ކަމަށެވެ. އަދި އެކަންތައްތައް ކަރެކްޝަނުން ކޮށްދޭނެ ކަމާމެދު ޝައްކު ކަމަށް ޝާދިޔާ ވިދާޅުވިއެވެ.
މިދިޔަ އޮގަސްޓު މަހުގެ ތެރޭގައި ފިޒިއޮތެރަޕީ ހެދުމަށް އޭޑީކޭ ހޮސްޕިޓަލްގައި ދެ ހަފުތާ ވަންދެން މުހުތާޒު އެޑްމިޓް ކޮށްވައިވެ އެވެ. މިއީ މުހުތާޒް ޖަލަށް ލީ ފަހުން އޭނާގެ ގަޔަށް އިންޖެކްޝަން ޖެހި ތިން ވަނަ ފަހަރެވެ.
މުހުތާޒްގެ ބޭސްފަރުވާގެ ކަންކަމުގައި ކަރެކްޝަންސް އިން އިހުމާލުވަމުންދާ ކަމަށް ބުނެ އާއިލާ ވަނީ ކަންބޮޑުވުންފާޅު ވެސް ކޮށްފައެވެ.
ރައީސް އަބްދުﷲ ޔާމީން ހައްޔަރުކުރަން ސައްހަ ނޫން ކޯޓު އަމުރެއް ހެދި މައްސަލައިގައި މުހުތާޒްގެ މައްޗަށް ކުށް ސާބިތުވާ ކަމަށް ކަނޑައަޅައި ޖަލަށް ހުކުމްކޮށްފައި ވަނީ 17 އަހަރަށެވެ.