މާފުށީ ޖަލުގައި މީހުން މަރުވަނީ ނޫން ކަމަށާއި ގަސްތުގައި މަރަނީ ކަމަށް ވިދާޅުވެ، ކުރެއްވި ޓްވީޓަކާއި ގުޅިގެން ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު އަހުމަދު މަހްލޫފްގެ މައްޗަށް ދައުލަތުން އުފުލާފައިވާ ދައުވާގެ އިބްތިދާއީ އަޑުއެހުންތައް ނިންމައި، މިމަހުގެ 20 ވަނަ ދުވަހު އެމައްސަލައިގެ ޝަރީއަތުގެ އަޑުއެހުންތައް ފެށުމަށް ނިންމައިފި އެވެ.
ހިނގާފައި ނުވާކަމެއް ހިނގާފައިވާކަމަށްބުނެ ދޮގު މައުލޫމާތު ދިނުމުގެ އެދައުވާއަކީ މިއަހަރުގެ ޖެނުއަރީ މަހުގެ 20 ވަނަ ދުވަހު މަހްލޫފް ކުރެއްވި ޓްވީޓަކާއި ގުޅޭ މައްސަލަ އެކެވެ. އެ ޓްވީޓްގައި މަހްލޫފް ވަނީ މާފުށީ ޖަލުގައި ގައިދީން މަރުވަނީ ނޫން ކަމަށާއި އެކަށީގެންވާ ގޮތެއްގައި ބޭސްފަރުވާގެ ހިދްމަތް ނުދީ ގައިދީން މަރަމުންދާ ކަމަށް ތުހުމަތު ކުރައްވާފަ އެވެ. އަދި އަހަރެއް ތެރޭ 10 ގައިދީން މަރުވުމަކީ ސީރިއަސް މައްސަލައެއް ކަމަށާއި އެކަމުގައި ކަރެކްޝަނުގެ އިސްވެރިންތަކެއް ޒިންމާ ނަގަން ޖެހޭނެ ކަމަށް ވެސް މަހުލޫފު ވިދާޅުވެފައިވެއެވެ.
Maafushi Jaluga gaidheen maruvaneekee noon,seedhaa maranee.Ekasheegenvaa faruvaa nudhee maraalanee. Ahareh therey 10 ghaidheen maruveema eyee serious massalaeh.Commissioner Shiyan adhi DOP Salman furihama zimmaanaganjehey. Alhugandu jaluga oiyiru mishakuvaa kurevunu adhahu neyge pic.twitter.com/0xpZ8jBoFd
— Ahmed Mahloof (@AhmedMahloof) January 20, 2018
އަންގާރަ ދުވަހު ބޭއްވި އަޑުއެހުމުގައި މައްސަލަ ބައްލަވާ ގާޒީ އަލީ އާދަމް ވިދާޅުވީ އެންމެ ފަހުން ބޭއްވި އަޑުއެހުމުގައި މައްސަލައާ ގުޅިގެން ދައުލަތުންނާއި މަހްލޫފްގެ ފަރާތުން ޝަރީއަތަށް ހުށަހަޅަން ބޭނުންވާ ހެއްކާއި ހުރިހާ ލިޔެކިޔުންތައް ހުށަހަހެޅުމަށް ހަތް ދުވަހުގެ ފުރުސަތެއް ދެއްވިނަމަވެސް އެއްވެސް ފަރާތަކުން އެއްވެސް ލިޔެކިޔުމެއް ހުށަހަޅާފައި ނުވާކަމަށެވެ.
ދައުލަތުގެ ވަކީލުން ވިދާޅުވީ ޝަރީއަތަށް މިހާރު ހުށަހަޅާފައިވާ ހެއްކާއި ގަރީނާ ފިޔަވާ އިތުރު ލިޔެކިޔުމެއް ހުށަހަޅަން ނެތް ކަމަށެވެ. މަހްލޫފް ވިދާޅުވީ އޭނާ ލިޔެކިޔުންތައް ހުށަހަޅަން ކޯޓަށް ވަޑައިގެންނެވިއިރު، މުއްދަތަ ހަމަވެފައިވާ ކަމަށްބުނެ ބަލައި ގަނެފައި ނުވާ ކަމަށެވެ. އަދި ފަހުން ސިޓީއަކުން އެދިފައިވާނެ ކަމަށްވެސް މަހްލޫފް ވިދާޅުވި އެވެ.
ގާޒީ ވިދާޅުވީ ލިޔެކިޔުންތައް ހުށަހެޅުމަށް މެއި މަހުގެ ތިން ވަނަަ ދުވަހުގެ 14:00ގެ ކުރިން އެންގުމުން އެ ލިޔެކިޔުންތައް ހުށަހެޅުމަށް މަހްލޫފް ވަޑައިގެންނެވީ މިމަހުުގެ ހަ ވަނަ ދުވަހު ކަމަށެވެ. ނަމަވެސް އޭގެ ކުރިން އެއްވެސް އެއްޗެއް ނާންގާ ލިޔެކިޔުންތައް ހުށަހަޅާފައިނުވާތީ ދެން ލިޔެކިޔުންތައް ބަލައިގަތުމުގެ ފުރުސަތެއް ނެތް ކަމަށްވެސް ގާޒީ ވިދާޅުވި އެވެ.
މި އަޑުއެހުމަށް މަހްލޫފް ވަޑައިގެންނެވީ ގާނޫނީ ވަކީލަކާ ނުލައެވެ. މަހްލޫފް ވިދާޅުވީ ނާޒިމް ޓްވީޓް ކުރެއްވި ކަމަށްބުނާ އެ ޓްވިޓަރ އެކައުންޓަކީ ނާޒިމްގެ އެކައުންޓެއް ކަމަށް ކަށަވަރު ކުރުމެއްނެތި ސަސްޕެންޑް ކުރުމަކީ ގަބޫލުކުރެވޭނެ ކަމެއް ނޫންކަމަށާއި، އެހެންކަމުން ނާޒިމްގެ ސަސްޕެންޝަން އުވާލާ އަލުން އޭނާގެ ވަކީލެއްގެ ގޮތުގައި ނާޒިމް ބަލައިގަތުމަށް މަހްލޫފް އެދިލެއްވި އެވެ.
ގާޒީ ވިދާޅުވީ އެމައްސަލައާ ގުޅިގެން ނާޒިމް ސަސްޕެންޑް ކޮށްފައިވާއިރު، ނާޒިމްގެ ފަރާތުން އެކަމުގެ ޝަކުވާއެއް ނުވަތަ އެފަދަ މައްސަލައެއް ކޯޓަށް ހުށަހަޅާފައި ނުވާތީ އެ އެކައުންޓަކީ ނާޒިމްގެ އެކައުންޓެއް ކަމަށް ބެލުމުގެ ޖާގަ އެބައޮތް ކަމަށެވެ. އެހެންކަމުން މިމައްސަލައަށް ނާޒިމް ސަސްޕެންޑްކޮށްފައިވާ ކުރުން ހަމަ އެގޮތުގައި އެބައޮތް ކަމަށެވެ.
Miadhu ingunee Madani mingadun dauva courtah balai gathumakee amaa handhan kurun kan
— Nazim Sattar (@nazimsat) April 23, 2018
ނާޒިމް ސަސްޕެންޑް ކުރުމާއި ގުޅިގެން މަހްލޫފްގެ މިމައްސަލާގައި ވަކާލާތު ކުރެއްވި ދެން ތިއްބެތި ގާނޫނީ ވަކީލުން ކަމަށްވާ އަހުމަދު އަބްދުﷲ އަފީފާއި މުހައްމަދު ހައްސާނު ވަނީ މަހްލޫފް އެދިވަޑައިގެންނެވުމުގެ މަތިން މިމައްސަލައިން ތަނާޒުލް ވެފަ އެވެ.
މިއަދުގެ އަޑުއެހުން ނިންމާލީ ދައުލަތުން ހެކި ހުށަހެޅުމުން މިމަހުގެ 20 ވަނަ ދުވަހު މިމައްސަލައިގެ ޝަރިއަތްތައް ފަށައި އެ ދުވަހުގެ ޝަރީއަތުގެ އަޑުއެހުމުގައި ހެކި ބަސް ނަގާނެކަމަށް އިއުލާން ކުރެއްވުމަށްފަހުގަ އެވެ.
ދައުލަތުން ހެކީގެ ގޮތުންގައި ހުށަހަޅާފައިވަނީ މިމައްސަލާއި ގުޅިގެން ފުލުހުންނަށް މަހްލޫފް ދެއްވާފައިވާ ބަޔާނާއި މޯލްޑިވްސް ކަރެކްޝަނަލް ސާރވިސްގެ ދެ ސިޓީއަކާއި މަހްލޫފްގެ ޓްވިޓަރ އެކައުންޓަކީ އޭނާގެ އެކައުންޓެއްކަން ސާބިތު ކުރުމަށް ހުށަހަޅާފައިވާ ހެކިތަކެވެ.
މަހްލޫފްގެ ފަރާތުން ދިފާއުގައި އެއްވެސް ހެއްކެއް ހުށަހަޅާފައެއް ނުވެއެވެ.
