ޤުދުސްގައި އެމްބަސީ ހުޅުވާތީ އެމެރިކާއާ ދެކޮޅަށް ޖިހާދަށް ނިކުންނަން ޖެހޭ: އަލްގައިދާގެ ލީޑަރު
14 މެއި 2018 | ހޯމަ 10:22އެމެރިކާގެ އެމްބަސީ ހޯމަ ދުވަހު ޤުދުސްގައި ހުޅުވާނެ
އަލްގައިދާގެ ލީޑަރު އައިމަން އަލްޒަވާހިރީ
އިސްރާއީލުގައި ހުންނަ އެމެރިކާ އެމްބަސީ ޤުދުސްއަށް ބަދަލު ކުރާ ކުރުމާމެދު މުސްލިމުން އެމެރިކާ އާ ދެކޮޅަށް ޖިހާދު ކުރުމަށް އަލްގައިދާގެ ލީޑަރު އައިމަން އަލް-ޒަވާހިރީ ވިދާޅުވެއްޖެއެވެ.
އެމެރިކާގެ އެމްބަސީ ހޯމަ ދުވަހު ޤުދުސްގައި ހުޅުވާއިރު މިކަމާ ބެހޭގޮތުން ޒަވާހިރީ "ޓެލްއަވީވް އަކީވެސް މުސްލިމުންގެ ބިމެއް،" މިނަމުގައި ނެރުއްވި ވިޑިއޯ މެސެޖެއްގައި ވިދާޅުވީ އެމެރިކާ އިން އިސްރާއީލުގައި ހުންނަ އެގައުމުގެ އެމްބަސީ ޤުދުސްއަށް ބަދަލުކުރަން ނިންމައި، އެކަން ކުރުމުން އަންގައިދެނީ ފަލަސްތީނުގެ މައްސަލާގައި ކުރެވޭ މަޝްވަރާތަކުން ފަލަސްތީނު ފެއިލްވުން ކަމަށެވެ.
ޒަވާހިރީ އިތުރަށް ވިދާޅުވީ އެމެރިކާ އަކީ "މުސްލިމުންގެ އެންމެ ބޮޑު ދުޝްމަން ކަން" އަލްގައިދާގެ ކުރީގެ ލީޑަރު އުސާމާ ބިން ލާދިން ހާމަކުރައްވާފައިވާ ކަމަށެވެ. ޒަވާހިރީ ވިދާޅުވީ އދ ގެ މެމްބަރު ގައުމުތަކުގެ ގޮތުގައި މުސްލިމު ގައުމުތަކުން ތިބެ މުސްލިމުންގެ މަސްލަހަތު އިސްލާމީ ގައުމުތަކަށް ހިމާޔަތް ނުކުރެވޭނެ ކަަމަށެވެ.
އެމެރިކާގެ އެމްބަސީ ހޯމަ ދުވަހު ޤުދުސްގައި ހާއްސަ ހަފްލާއެއް ބާއްވާ ހުޅުވާއިރު، އެމެރިކާގެ ރައީސް ޑޮނަލްޑް ޓްރަމްޕް ވޮޝިންޓަން ގައި ހުންނަވާ ހާއްސަ ވިޑިއޯ މެސެޖެއް ދެއްވާނެއެވެ. އެމްބަސީ ހުޅުވުމުގެ ރަސްމިއްޔާތަށް އެމެރިކާ ސަރުކާރުގެ ބޮޑު ވަފުދެއް އާދީއްތަ ދުވަހު ވަނީ އިސްރާއީލަށް ވަޑައިގެންފައެވެ. އޭގެ ތެރޭގައި ވައިޓްހައުސްގެ އިސް މުޝީރުންގެ ގޮތުގައި މަސައްކަތް ކުރައްވާ، ރައީސް ޑޮނަލްޑް ޓްރަމްޕްގެ ދަރިކަނބަލުން އިވާންކާ ޓްރަމްޕާއި، އެކަމަނާގެ ފިރިކަލުން ޖެރާޑް ކުޝްނަރ ހިމެނިވަޑައިގަންނަވައެވެ.
އިސްރާއީލުގެ ވެރިރަށަކީ ފަލަސްތީނުގެ ގުދުސް ކަމަށް ނިންމައި، އިސްރާއީލުގައި ހުންނަ އެމެރިކާގެ އެމްބަސީ ގުދުސްއަށް ބަދަލުކުރަން ރައީސް ޑޮނަލްޑް ޓްރަމްޕް ނިންމެވި ނިންމެވުމާއި އެއްގޮތަށް، ހޯމަ ދުވަހު ގުދުސްގައި އެމެރިކާގެ އެމްބަސީގެ އައު އޮފީސް ހުޅުވާއިރު، މި ހަފްލާ ރާވާފައި މިވަނީ ވަކި ދައުލަތެއްގެ ގޮތުގައި އިސްރާއީލު ގާއިމުކުރިތާ 70 އަހަރު ފުރޭ މުނާސަބަތާއި ގުޅުވައިގެންނެވެ.
