ރައްޔިތުންގެ މަޖިލީހުގެ އެޑްމިނިސްޓުރޭޝަންގެ އިސްވެރިޔާގެ މަގާމަށާއި އަމީން އާންމުގެ އެހީތެރިޔާގެ މަގާމަށް ބޭފުޅުން އައްޔަން ކޮށްފިއެވެ.

އެޑްމިނިސްޓްރޭޝަންގެ އިސްވެރިޔާގެ މަގާމަށް ހަމަޖެއްސީ ކުރިން ޑިރެކްޓަރަކަށް ހުންނެވި އަހުމަދު ފާއިޒް މުހައްމަދެވެ. އަމީން އާންމުގެ އެހީތެރިޔާގެ މަގާމަށް ހަމަޖެއްސީ މަޖިލީހުގެ ލީގަލް އޮފިސަރަކަށް ހުންނެވި ހަންނާނު ހުސައިނެވެ.

އަމީން އާންމުގެ އެހީތެރިޔާގެ މަގާމުގައި މިވަގުތުވެސް ދެ ބޭފުޅުން ތިއްބަވަ އެވެ. އެއީ ހާމިދު ޒަކަރިއްޔާ އާއި މުހައްމަދު ރަޝީދެވެ.

މަޖިލީހުގެ މުވައްޒަފުންނަށް އެ ދެ މަގާމަށް ކުރިމަތިލުމަށް ފުރުސަތު ހުޅުވާލާފައި ވަނީ މި މަހުގެ ދެ ވަނަ ދުވަހު އެވެ. އެ މުއްދަތު ހަމަވެފައިވަނީ ނިމިގެން ދިޔަ ބުދަ ދުވަހު އެވެ.

އަމީން އާންމުގެ އެހީތެރިޔާގެ މަގާމުގެ ހުންނަވާ ބޭފުޅަކަށް މުސާރައިގެ ގޮތުގައި މަހަކު 28،000ރ. ލިބޭއިރު ލިވިންގ އެލަވަންސްގެ ގޮތުގައި 3،500ރ. އަދި ފޯން އެލަވަންސްގެ ގޮތުގައި 1،000ރ. ލިބެއެވެ. އަދި ވަޒީފާ އަށް ހާޒިރުވާ ކޮންމެ ދުވަހަކަށް 100 ރުފިޔާގެ އެލަވަންސާއެކު އިތުރު ގަޑީގެ ފައިސާ ވެސް ލިބެއެވެ.

އެޑްމިނިސްޓްރޭޝަންގެ އިސްވެރިޔާގެ މަގާމު ދެ ހާސް ފަނަރަ ވަނަ އަހަރުގެ ޖެނުއަރީ މަހުން ފެށިގެން އޮތީ ހުސް ކޮށެވެ. އެ މަގާމުގައި ކުރިން ހުންނެވީ މިހާރު އެމްޑަބްލިޔުއެސްސީގެ މެނޭޖިން ޑިރެކްޓަރުގެ މަގާމުގައި ހުންނެވި ފަޒުލް ރަޝީދެވެ. އެ ބޭފުޅާ އެމްޑަބްލިޔުއެސްސީއާ ހަވާލުވި ފަހުން އެ މަގާމަށް ބޭފުޅަކު އައްޔަނުކޮށްފައެއް ނުވެއެވެ. 

ހެޑް އޮފް އެޑްމިނިސްޓްރޭޝަންގެ މަގާމުގައި ހުންނަވާ ބޭފުޅަކަށް މުސާރައިގެ ގޮތުގައި މަހަކު 25،000ރ. ލިބޭއިރު ލިވިންގ އެލަވަންސްގެ ގޮތުގައި 3،500ރ. އަދި ފޯން އެލަވަންސްގެ ގޮތުގައި 1،000ރ. ލިބެއެވެ. އަދި ވަޒީފާ އަށް ހާޒިރުވާ ކޮންމެ ދުވަހަކު 100 ރުފިޔާގެ އެލަވަންސާއެކު އިތުރު ގަޑީގެ ފައިސާ ވެސް ލިބެ އެވެ.

މަޖިލީހުގެ އިސް މަގާމުތަކަށް ބޮޑެތި ޚަރަދުތަކެއްކޮށް މުވައްޒަފުން އައްޔަން ކުރަމުންދާއިރު މަޖިލިސް ބާއްވަމުން ދަނީ ފާއިތުވި ދައުރު ތަކާއި އަޅާ ބަލާއިރު ވަރަށް މަދުންނެވެ. މިކަމާއި ގުޅިގެން ރައްޔިތުންގެ ތެރެއިން ގިނަ ބަޔެއްގެ ފާޑުކިޔުން ވަނީ މަޖިލީހުގެ ރައީސްގެ މަގާމުގައި ހުންނެވި އަބްދުﷲ މަސީހުއަށް އަމާޒުވެފައެވެ.