އއ. ބޮޑުފޮޅުދޫއަށް އެރި ނަގޫރޯޅީގައި 6 ގެއަކަށް ގެއްލުންތަކެއް ވެއްޖެ އެވެ.

ރާއްޖެ އެމްވީއަށް މައުލޫމާތު ދެއްވަމުން  ބޮޑުފޮޅުދޫ ކައުންސިލްގެ ރައީސް ޝުޖާއު އާދަމް ވިދާޅުވީ އެރަށަށް ނަގޫރޯޅި އަރާފައިވަނީ އަންގާރަ ދުވަހުގެރޭ ގާތްގަނޑަކަށް 10:20 ހާއިރު ކަމަށެވެ.

ޝުޖާއު ވިދާޅުވީ ނަގޫރޯޅީގެ ސަބަބުން އެރަށުން ހަ ގެއަކަށް އެކިވަރުގެ ގެއްލުންތައް ލިބިފައިވާ ކަމަށާއި އޭގެ ތެރެއިން އެއްގެއެއްގެ ފުރާޅު އެއްކޮށް އެއްލާލުމުގެ ސަބަބުން ބޭނުން ނުކުރެވޭ ވަރަށް ހަލާކުވެފައިވާ ކަމަށެވެ.

އޭނާ ވިދާޅުވީ އިތުރު ގެއެއްގެ ފުރާޅު އެއްލާލާފައިވާ ކަމަށާއި ދެ ގެއެއްގެ ބަދިގޭގެ ފުރާޅާއި ކޮޓަރީގެ ފުރާޅުވެސް އެއްލާލާފައިވާ ކަމަށެވެ. އަދި އިތުރު ދެ ގެ އެއްގެ ބަދިގެ ފުރާޅުން ބައެއްވެސް އެއްލާލާފައިވާ ކަމަށްވެސް ވިދާޅުވި އެވެ.

މި ހާދިސާގައި އެއްވެސް މީހަކަށް އަނިޔާއެއް ލިބިފައި ނުވާކަން ފާހަގަކުރައްވަމުން ޝުޖާއު ވިދާޅުވީ ބޭނުން ނުކުރެވޭ ވަރަށް ހަލާކުވި ގެއަކީ ވަރަށް ފަހުން ހަދާ ނިންމައި އަދި މީހުން ބަދަލުނުވެ ހުރި ގެއެއް ކަމަށެވެ. ނަމަވެސް ގެއްލުން ލިބުނު އެހެން ގެ ތަކަކީ މީހުން ދިރިއުޅެމުންދާ ގެތަކެއް ކަމަށް ވެސް އޭނާ ވިދާޅުވިއެވެ.

ސުޖާއު ވިދާޅުވީ ނަގޫރޯޅީގެ ސަބަބުން ރަށުގެ ބައެއް ގަސްގަހާ ގެއްސަށްވެސް ގެއްލުން ލިބިފައިވާކަމަށާއި ޑިޒާސްޓަރ މެނޭޖްމަންޓް ސެންޓަރުން ރަށުގެ ހާލަތު ބަލަމުންދާ ކަމަށެވެ.