އެމެރިކާ ކަންތައް ކުރިގޮތުން އީރާނުގެ ހަމަޖެހުމަށް ބުރޫއަރާނެ: ތުރުކީ
9 މެއި 2018 | ބުދަ 17:48އެހެން ގައުމުތަކާއެކު ވެފައިވާ އެއްބަސްވުން ދެމި އޮންނާނެ
ތަރުޖަމާނު އިބްރާހިމް ކަލިން
އީރާނު ދުނިޔޭގެ ގައުމުތަކާއެކު ވެފައިވާ ނިއުކްލިއަރ އެއްބަސްވުން އުވާލައި ދަތިކުރުމުގެ ފިޔަވަޅުތައް އެމެރިކާއިން އިޔާދަކުރުމުން އީރާނުގެ ހަމަޖެހުމަށް ބުރޫއަރާނެކަމަށް ތުރުކީއިން ބުނެފިއެވެ.
ތުރުކީ ރައީސް ރަޖަބް ތައްޔިބު އުރްދޮޣާންގެ ތަރުޖަމާނު ވިދާޅުވީ އެމެރިކާއިން އަންގާރަ ދުވަހު ނިއުކްލިއަރ ޕްރޮގްރާމާއި ގުޅޭގޮތުން އެޤައުމު އީރާނުއެކު ވެފައިވާ އެއްބަސްވުމުން ވަކިވުމަށް ނިންމުމުގެ ސަބަބުން އީރާނުގެ ހަމަޖެހުމަށް ބުރޫއަރާނެކަމަށެވެ.
ތަރުޖަމާނު އިބްރާހިމް ކަލިން ކުރެއްވި ޓުވީޓެއްގައި ވިދާޅުވީ އެމެރިކާއާއެކު ވެފައިވާ އެއްބަސްވުން އުވާލެވުނަސް އެހެން ގައުމުތަކާއެކު ވެފައިވާ އެއްބަސްވުން އޮންނާނެކަމަށެވެ. ހަމައެއާއެކު ތުރުކީއިން ނިއުކިލިއަރ ހަތިޔާރު ގެންގުޅުމާއި ދެކޮޅު ކަމަށްވެސް ވަނީ ބުނެފައެވެ.
އެމެރިކާގެ ރައީސް ޑޮނަލްޑް ޓުރަމްޕް އެ ގޮތަށް އަންގާރަ ދުވަހު ނިންމަވައިފައި ވަނީ ދުނިޔޭގެ ގިނަ ގައުމުތަކެއް އެކަމާ ދެކޮޅު ހަދަމުން ދަނިކޮށެވެ. އެނިންމެވުމުގެ ސަބަބުން ބާޒާރުގައި ތެލުގެ ވިޔަފާރިއަށް ކުރާނެ އަސަރެއް އަދިއެއް ނޭނގެއެވެ.
