އުއްތަމަ ފަނޑިޔާރަށް ކުރި ހުކުމުން ފެނިގެން މިދިޔައީ ވަކި ސިޔާސީ ކަމެއް ފުރިހަމަ ކުރުމަށް ކަތިލި ކަންބަޅިއެއްގެ ގޮތުގައި އުއްތަމަ ފަނޑިޔާރު ބޭނުންކުރިތަން ކަމަށް ޖުމްހޫރީ ޕާޓީގެ ނައިބު ލީޑަރ ޑރ ހުސައިން ރަޝީދު ހަސަން ވިދާޅުވެއްޖެއެވެ.
ގުޅިފައިވާ ޕާޓީތަކުން އަންގާރަ ދުވަހުގެރޭ މ ކުނޫޒްގައި ބޭއްވި ޕްރެސް ކޮންފަރެންސްގައި އުއްތަމަ ފަނޑިޔާރަށް ކުރި ހުކުމަށް އިޝާރާތް ކުރައްވާ ޑރ ހުސައިން ވިދާޅުވީ، މިއީ ދިވެހި ރާއްޖޭގެ ތާރީޚުގައިވެސް ފަނޑިޔާރުކަމުން ވަކިނުކޮށް އުއްތަމަ ފަނޑިޔާރަކު ޖަލަށްލި ފުރަތަމަ ފަހަރު ކަމަށާއި މިއީ ޢަދްލު އިންސާފް ޤާއިމް ކުރެވޭކަމާމެދު ރައްޔިތުން ކުރަމުންދާ ޝައްކު އިތުރުވި ދުވަހެއް ކަމަށެވެ.
ޤާނޫނު އަސާސީ އެކަށައެޅުއްވި ރައްޔިތުންގެ ޚާއްޞަ މަޖިލީހުގައިވެސް ހިމެނިވަޑައިގެންނެވި ޑރ ހުސައިން ވިދާޅުވީ، ފުރާޅުން ޓިނުނަގައިގެން ސުޕްރީމް ކޯޓުގެ ފަނޑިޔާރުން ދަމާ ކޫއްތާފައި ގެންގޮސް ހައްޔަރުކުރީ ޤާނޫނު އަސާސީގެ ބޭރުން ކަމަށާއި ވަކީލުން ވިދާޅުވާ ގޮތުން ޝަރީއަތް ކުރިއަށް ގެންދިޔައީ ޝަރީއަތް ކުރުމުގެ އިޖުރާއަތްތަކާ އެއްގޮތައް ކަމާމެދު ސުވާލު އުފެދޭ ގޮތަށް ކަމަށެވެ.
ދިފާއީ ހެކި ހުށަހެޅުމަށް އެކަށީގެންވާ ފުރުސަތު ނުދީ، ޤާނޫނީ ވަކީލުންގެ އެހީތެރިކަންވެސް އެންމެ ރަނގަޅަށް ނުލިބޭގޮތައް ޝަރީއަތް ނިންމާލީ ފަޓާސްބަރިއެއްހެން ކަމަށްވެސް ޑރ ހުސައިން ވިދާޅުވިއެވެ.
"މިއީ ވަކި ސިޔާސީ ކަމެއް ފުރިހަމަ ކުރުމަށް ކަތިލި ކަންބަޅިއެއްގެ ގޮތުގައި ފެނުނީ" ޑރ ހުސައިން ވިދާޅުވިއެވެ.
ޑރ ހުސައިން ވިދާޅުވީ ޖެމްސްއަކީ ކޮންމެހެން ބޭނުން ކުރަން ޖެހޭނެ އެއްޗެއް ކަމުގައި ޤާނޫނަކުން ކަނޑައަޅާފައި ނުވާކަމަށާއި ދައުލަތުގެ މުޅިން އެހެން ބާރަކަށް ޖެމްސް ފިޔަވާ އެހެންގޮތެއް ބޭނުން ކުރުމަކީވެސް ކުރެވިދާނެ ކަމެއް ކަމަށެވެ. އަދި އުއްތަމަ ފަނޑިޔާރު އެންގެވިކަމަށްބުނެ އެމަނިކުފާނުގެ މައްޗަށް އެޙުކުމް އިއްވިއިރު އެމަނިކުފާނު އެންގެވި ނަމަވެސް، އެއީ ޣައިރު ޤާނޫނީ އަމުރެއް ނަމަ، ޣައިރު ޤާނޫނީ އަމުރަކަށް ތަބާ ނުވުމުގެ ގޮތުން އިދާރީ ބޭފުޅުންނަށް އެކަން ނުކޮށް ތިބެވުނީސް ކަމަށްވެސް ހުސައިން ވިދާޅުވިއެވެ.
އެހުކުމަކީ މުސްތަޤުބަލްގައި ކިޔަވާ ކުދިންނާއި ދިރާސާކުރާ މީހުން ދިރާސާކުރާނެ އެއްޗެއް ކަމަށާއި ފަނޑިޔާރަކު ވަކިކުރެވޭނެގޮތް ޤާނޫނު އަސާސީގައި އޮތްއިރު އެނޫން ގޮތަކަށް އެކަން ކުރެވިގެން ނުވާނެކަމަށްވެސް ޑރ ހުސައިން ވިދާޅުވިއެވެ.
"މިމިންގަނޑުން ރައީސް ޔާމީންވެސް ހާޒިރު ކުރަންވީތޯ. އިންސާފުން ކަމެއް ކުރަން އުޅުނީމާ މިގޮތައް ކަންކުރި މީހުންނާ ޤާނޫނު އަރާހަމަކުރާނެ" ޑރ ހުސައިން ވިދާޅުވިއެވެ.