ރާއްޖޭގައި އިންސާފުވެރި އިންތިޚާބެއް ބޭއްވިދާނެތޯ އެމެރިކާ ސަފީރު ސުވާލު އުފައްދަވައިފި
8 މެއި 2018 | އަންގާރަ 18:33ގިނަ އަދަދެއްގެ ސިޔާސީ ފަރާތްތައް ޖަލަށް ލާފައިވާކަން ފާހަގަކުރެއްވި
ކޮޅުނބުގައި ހުންނަވާ އެމެރިކާ ސަފީރު އަތުލް ކެޝަޕް
ރާއްޖޭގައި މިނިވަން އިންސާފުވެރި އިންތިޚާބެއް ބޭއްވިދާނެކަމާއިމެދު އެމެރިކާއިން ރާއްޖެއަށާއި ލަންކާއަށް ކަނޑައަޅާފައި ހުންނަވާ ސަފީރު އަތުލް ކެޝަޕް ސުވާލު އުފައްދަވައިފިއެވެ.
އަންގާރަ ދުވަހުގެ ރޭ ކެޝަޕް ކުރެއްވި ޓްވީޓެއްގައި ވަނީ ރާއްޖޭގެ ސިޔާސީ ހާލަތު އެންމެ ޓުވީޓަކުން ތަފްޞީލްކޮށްދެއްވާފައެވެ. އެގޮތުން ޤާނޫނު އަސާސީއިން ލިބިދީފަިއވާ ހައްޤުތަކާއި ޒިންމާތައް އަދާކޮށްގެން މިހާރުވެސް ކުރީގެ ރައީސަކާއި، ސުޕްރީމް ކޯޓުގެ އުއްތަމަފަނޑިޔާރަކާއި، ނައިބު ރައީސަކާއި، އިންތިޚާބުވެފައިވާ ރައްޔިތުންގެ މަޖިލީހުގެ މެމްބަރުންތަކަކާއި، ސިޔާސީ ޕާޓީއެއްގެ ލީޑަރެއް ޖަލަށް ލާފައިވާކަން އޭނާ ފާހަގަކުރެއްވިއެވެ.
މިކަންކަން ފާހަގަކުރައްވައި ސަފީރު އަތުލް ކެޝަޕް ވަނީ މި ޙާލަތުގައި ރާއްޖޭގައި މިނިވަން އިންސާފުވެރި އިންތިޚާބެއް ބާއްވާނީ ކިހިނެއްތޯ ސުވާލު އުފައްދަވާފައެވެ.
ކެޝަޕްއަކީ ސަރުކާރުން ޤާނޫނާއި ޚިލާފަށް ކުރާ ކަންތައްތަކަށް ވަރަށް ބޮޑަށް ފާޑުވިދާޅުވާ، އަދި ރާއްޖޭގެ މަސްރަހު ވަރަށް ގާތުން ބައްލަވަމުން ގެންދަވާ ބޭފުޅެކެވެ.
