ކުރީގެ ޕޮލިސް ކޮމިޝަނަރ އަހުމަދު އަރީފުގެ މައްޗަށް އުފުލާފައިވާ ޓެރަރިޒަމް ދައުވާގައި ހޯމަ ދުވަހު ކްރިމިނަލް ކޯޓުގައި ތާވަލްކުރި އަޑުއެހުން ކެންސަލް ކޮށްފި އެވެ.

ގާނޫނާ ހިލާފަށް ސަރުކާރު ވައްޓާލަން އުޅުނު ކަމަށް ބުނެ ޓެރަރިޒަމްގެ ދައުވާ އުފުލާފައިވާ ދައުލަތުގެ އިސް ފަރާތްތަކެއްގެ މައްޗަށް ހިންގާ ޝަރީއަތުގެ އިބްތިދާއީ އަޑުއެހުންތަކެއް ފުލުފުލުގައި ކްރިމިނަލް ކޯޓުގައި ތާވަލްކޮށް، ކޮންމެ ދުވަހަކު ކުރިއަށް ގެންދާއިރު، ހޯމަ ދުވަހުވެސް ބައެއް ފަރާތްތަކުގެ މައްސަލަތައް އެކޯޓުގައި ތާވަލްކޮށް ކުރިއަށް ގެންދިޔަ އެވެ. 

ރައްޔިތުންގެ މަޖިލީހުގެ ދަނގެތި ދާއިރާގެ މެމްބަރު އިލްހާމު އަހުމަދުގެ ޝަރީއަތުގެ އަޑުއެހުން ހޯމަ ދުވަހުގެ 11:00 އަށް ތާވަލް ކުރިނަމަވެސް އެ އަޑުއެހުން ފެށިފައިވަނީ 1 ޖަހާކަންހާއިރު އެވެ. އެހެންކަމުން 1:00 އަށް ތާވަލްކޮށްފައިވާ ކުރީގެ ސީޕީ އަރީފްގެ ޝަރީއަތުގެ އަޑުއެހުން ފެށުމަށް ވަރަށް ގިނަ ވަގުތު ހޭދަވާނެތީ ކެންސަލް ކުރީކަމަށް ބެލެވެ އެވެ.

މި މައްސަލަތައް ބައްލަވަނީ ދާދިފަހުން ކްރިމިނަލް ކޯޓަށް އައްޔަން ކުރެއްވި ގާޒީ އަހުމަދު ހައިލަމް އެވެ. 

ނަމަވެސް ސީޕީ އަރީފްގެ ހޯމަ ދުވަހުގެ އަޑުއެހުން ކެންސަލް ކުރި ސަބަބެއް ކޯޓުން ހާމަކޮށްފައެއް ނުވެއެވެ.

އަރީފުގެ މައްޗަށް އުފުލާފައިވާ ދައުވާއާ ގުޅިގެން މިދިއަ ބުދަ ދުވަހު ބޭއްވި އިބްތިދާއީ ފުރަތަމަ އަޑުއެހުމުގައި ދައުވާ އިއްވުމުން އަރީފު ވިދާޅުވީ ދައުވާ ސާފުނުވާ ކަމަށާއި ކުރިއަށްދާން ބޭނުން ވަނީ ވަކީލަކާއެކު ކަމަށެވެ. އެއާކު މައްސަލަ ބައްލަވަން އިންނެވި ގާޒީ އަހްމަދު ހައިލަމް ވިދާޅުވީ މި މައްސަލައިގައި ހަ ވަކީލުން އައްޔަން ކޮށްފައިވާކަން ކޯޓަށް އެނގިފައިވާ ކަމަށެވެ. އަދި އެ ވަކީލުން ކޮބައިތޯ ގާޒީ ސުވާލު ކުރެއްވުމުން އަރީފު ވިދާޅުވީ އޭނާއަކީ ބަންދުގައި ހުންނަ މީހެއް ކަމަށާއި އެމީހުން ވީތަނެއް ނޭނގޭ ކަމަށެވެ. އަދި އެމީހުނަށް އަންގަން ޖެހޭނީ ކޯޓުން ކަމަށް ވިދާޅުވަމުން ގާޒީ ވިދާޅުވީ އޭގެ ތެރެއިން ދެ ވަކީލުންނަށް ކޯޓުން ގުޅުމުން އެމީހުން އައްޔަން ވެފައިވަނީ މުއްދަތުގެ މަރުހަލާފައި ކަމަށް ބުނެފައިވާ ކަމަށެވެ. އަދި އެމީހުން ވަނީ މި މައްސަލައިން ތަނާޒުލުވެފައިކަން ކޯޓަށް އަންގާފައިވާ ކަމަށް ގާޒީ ފާހަގަ ކުރެއްވި އެވެ.

އެހެން ނަމަވެސް މުއްދަތުގެ މަޖިލީހަށް ވަކިން އައްޔަންވާ އުސޫލެއް ކޯޓުގައި ނުގެން ގުޅޭނެ ކަމަށާއި މީގެ ފަހުން މި މައްސަލައިން ތަނާޒުލުވި ކަމަށް ބުނާ ދެ ވަކީލުން ކޯޓުން މި މައްސަލައިގައި އަރީފު އައްޔަން ކުރައްވަން ބޭނުންވިއަސް ބަލައިނުގަންނާނެ ކަމަށް ގާޒީ ހައިލަމް އެންގެވި އެވެ. އަދި ވިދާޅުވީ އެގޮތަށް ނިންމެވީ އެ މައްސަލައިން ތަނާޒުލުވުމަށް ދެއްކި އުޒުރު ބަލައި ނުގަނެވޭތީ ކަމަށެވެ.

ދެން  ތިބި ވަކީލުނަށް ކްރިމިނަލް ކޯޓުން ގުޅަން އުޅުމުން ނުގުޅޭ ކަމަށް ވެސް ގާޒީ ވިދާޅުވި އެވެ. އެހެން ނަމަވެސް މި މައްސަލައިގައި ކޯޓުން ދެން ބަލައިނުގަންނާނެ ވަކީލުންގެ ނަމެއް ގާޒީ ވިދާޅެއްނުވެ އެވެ.

ދައުލަތުން އުފުލި ދައުވާގައި ބުނެފައިވަނީ އަރީފު، ޕޮލިސް ކޮމިޝަނަރުގެ މަގާމުގައި ހުންނަވައިގެން މަގާމުގެ ނުފޫޒު ބޭނުން ކޮށްގެން 2017 ވަނަ އަހަރުން ފެށިގެން ގާނޫނީ ވެރިކަން ވައްޓާލުމަށް މަސައްކަތްކޮށްފައި ކަމަށެވެ. އަދި އޭނާ 1 ފެބްރުއަރީގައި ނެރުނު އަމުރާ ގުޅުވައި، ފުލުހުންގެ ތެރެއިން އޭނާ ބޭނުންވާ ވަކި ބަޔަކު ނަގައި އިތުރު ފުލުހުންތަކާ ކުރިމަތިލުމަށް ދުރާލާއި ރާވާފައި ކަމަށް ދައުލަތުން ތުހުމަތުކޮށްފައިވެ އެވެ. އޭގެ އިތުރުން  ގައުމުގެ ހަމަޖެހުން ނަގާލަން މަސައްކަތްކޮށް، ގާނޫނު އަސާސީ އާއި ގާނޫނުތަކާއި އުސޫލުތަކުގެ ބޭރުން، ދައުލަތަށާއި ސަރުކާރަށް ނޭދެވޭ ނުފޫޒު ފޯރުވައި، އާންމުންގެ ސަލާމަތަށް ނުރައްކާތެރިވާ ފަދަ ހާލަތެއް މެދުވެރިކުރުވަން މަސައްކަތް ކޮށްފައިވާ ކަމަށް ވެސް އަރީފުގެ މައްޗަށް ތުހުމަތުކޮށްފައިވެ އެވެ.