ޕީޕީއެމްގެ ހެސްކިޔާފަ ޖަލްސާ ފަސްކޮށްފި
7 މެއި 2018 | ހޯމަ 07:34ޖަލްސާ ފަސްކުރީ ހުކުރު ދުވަހު ބޭއްވުމަށް
ޕީޕީއެމުން ކާނިވާގައި ޖަލްސާއެއް ބޭއްވުމަށް ތައްޔާރުކޮށްފައި
ޕީޕީއެމްއިން އަންނަ ބުރާސްފަތި ދުވަހު ބޭއްވުމަށް ހަމަޖައްސާފައިވާ "ހެސްކިޔާފަ" ޖަލްސާ ހުކުރު ދުުވަހު ރެއަށް ފަސްކޮށްފިއެވެ.
އެޕާޓީން ނެރުނު ނޫސް ބަޔާނެއްގައި ބުނީ މިމަހުގެ 10 ވަނަ ދުވަހުގެ ރޭ ކާނިވާ ސަރަހައްދުގައި ބޭއްވުމަށް ހަމަޖެހިފައިވާ ޖަލްސާ މެއި 11 ވަނަ ދުވަހުގެ ރެއަށް ފަސްކޮށްފައިވާކަމަށެވެ. އެހެން ނަމަވެސް ޖަލްސާ ފަސްކުރި ސަބަބު ބަޔާންކޮށްފައެއް ނުވެއެވެ. ބޮޑު ޖަލްސާއެއް ބާއްވަން ޕީޕީއެމް އިން ނިންމާފައިވަނީ ކުރިއަށް އޮތް ރޯދަމަހަށް އެޕާޓީގެ ސިޔާސީ ހަރަކާތްތައް މަޑު ޖައްސާލުމުގެ ކުރިން މާލޭގައި ބޮޑު ހަރަކާތެއް ބޭއްވުމުގެ ގޮތުންކަމަށް ޕީޕީއެމްގެ ނައިބް ރައީސް އަބްދުއްރަހީމް އަބްދުﷲ ވިދާޅުވިއެވެ. ރޯދަ މަހަށް ޕީޕީއެމްގެ ހަރަކާތްތައް މަޑު ޖައްސާލި ނަމަވެސް އަތޮޅުތަކަށް ކުރާ ދަތުރުތައް ކުރިއަށްދާނެކަމަށް އަބްދުއްރަހީމް ވިދާޅުވިއެވެ.
ހެސްކިޔާފަ ޖަލްސާގައި ރައީސް އަބްދުﷲ ޔާމީނައި އެމަނިކުފާނުގެ އަނބިކަނބަލުންނާއި ޕީޕީއެމްގެ އިސް ބޭފުޅުން ބައިވެރިވެވަޑައިގަންނަވާނެ ކަމަށް އަބްދުއްރަހީމް ވިދާޅުވިއެވެ. މީގެއިތުރުން އަބްދުއްރަހީމް ވިދާޅުވީ ޕީޕިއެމްގެ ޖަލްސާތަކަށް މަޖުބޫރުކޮށްގެން މީހުން ގެންދާ ކަމަށް އިދިކޮޅު ފަރާތްތަކުން ބުނާނެތީ ސަރުކާރުގެ އޮފީސްތަކުގެ މުވައްޒަފުންނައި ކުންފުނިތަކުގެ މުވައްޒަފުން އަދި ސިޔާސީ މަގާމުތަކުގައި ތިބި ވެރިން ބައިވެރިވާނެ ކަމަށެވެ.
