އިސްރާއީލް-ޣައްޒާ ގުޅޭ ބޯޑަރު ސަރަހައްދުގައި އިސްރާއީލާ ދެކޮޅަށް ފަލަސްތީނު ރައްޔިތުުން ކުރަމުންދާ މުޒާހަރާގައި ނިމިދިޔަ ހުކުރު ދުވަހު އެތައް ސަތޭކަ ބަޔަކު ޒަޚަމްވެއްޖެ ކަމަށް ރިޕޯޓުތައް ބުނެފިއެވެ.
ފަލަސްތީނު ރައްޔިތުން ކުރަމުންދާ މުޒާހަރާތަކަށް ފަސް ހަފްތާވެ، ހަވަނަ ހަފްތާ ފެށިފައިވާއިރު، ރިޕޯޓުތައް ބުނާގޮތުން ނިމިދިޔަ ހުކުރު ދުވަހު ކުރެވުނު މުޒާހަރާތަކުގައި އިސްރާއީލުގެ ސަލާމަތީ ބާރުތަކުން ކަރުނަ ބޭސް ބޭނުންކުރުމުގެ ސަބަބުން 1243 މީހުންނަށް ފަރުވާ ދޭން ޖެހުނެެވެ. އަދި ބަޑި ޖެހުމުގެ ސަބަބުން 83 މީހުން ޒަޚަމްވިއެވެ.
ނިމިދިޔަ މާޗް 30 ގައި ފަލަސްތީނު ރައްޔިތުން އިސްރާއީލާ ދެކޮޅަށް އިސްރާއީލް-ޣައްޒާ ގުޅޭ ބޯޑަރު ސަރަހައްދުގައި ކުރަން ފެށި މުޒާހަރާގައި މިހާތަނަށް އިސްރާއީލުގެ އަސްކަރިއްޔާ އިން ވަނީ 49 މީހުން މަރާލާފައެވެ. އަދި އެތައް ސަތޭކަ ބަޔަކު ވަނީ ޒަޚަމްކޮށްލާފައެވެ. ކޮންމެ އަހަރެއްގެ މާރޗް 30 ވަނަ ދުވަހު ފަލަސްތީނު ރައްޔިތުން "ލޭންޑް ޑޭ" ދުވަސް ފާހަގަކުރަނީ 1976 ވަނަ އިސްރާއީލުން ފަލަސްތީނު ރައްޔިތުންގެ ބިން ފޭރިގަނެފައިވާތީއެވެ.
"ގްރޭޓް މާރޗް އޮފް ރިޓަރން"ގެ ނަމުގައި ފަލަސްތީނު ރައްޔިތުން ފެށި މުޒާހަރާގައި، ފަލަސްތީނު މީހުން ޑިމާންޑް ކުރަމުން ދަނީ އިސްރާއީލުގައި މިހާރު ދިރިއުޅޭ ފަލަސްތީނުގެ ރެފިއުޖީން އެ މީހުންގެ ގެދޮރަށް އަނބުރާ ގެނައުމަށެވެ. އިހްތިޖާޖް ނިންމަން ހަމަޖައްސާފައި ވަނީ މެއި 15 ވަނަ ދުވަހު ކަމަށްވާއިރު އެއީ ފަލަސްތީނުން ކިޔާ ގޮތުން 'ނަކްބާ' ނުވަތަ ހަލާކުގެ ދުވަހެވެ. ނުވަތަ 1948 ވަނަ އަހަރު އިސްރާއީލް އުފެދުނު ދުވަހެވެ.
އިސްރާއިލުގެ އަސްކަރިއްޔާ އިން ފަލަސްތީނުގެ މުޒާހިރީންނާ ދެކޮޅަށް ބޭނުން ކުރަމުންދާ ހާލަތާ ނުބައްދަލު ބާރު، އިސްރާއީލުން ދަނީ، "އިންސާނީ ހައްގުތަކާ ބެހޭ ގާނޫނުތައް ހަނގުރާމައިގެ އަމަލުތަކަށް" ބޭނުން ނުކުރެވޭނެ ކަަމަށް ބުނެ ދިފާއު ކުރަމުންނެވެ.
އިސްރާއީލުގެ އަމަލުތައް އިންސާނީ ހައްގުތަކަށް މަސައްކަތް ކުރާ ޖަމިއްޔާތަކާއި އަދި އދ ގެ އިންސާނީ ހައްގުތަކާ ބެހޭ ހައިކޮމިޝަނަރުވެސް ވަނީ ކުށްވެރިކުރައްވާފައެވެ. އިސްރާއީލުގެ އަމަލުތައް ކުށްވެރިކޮށް އަދި ތަހުގީގު ކުރުމަށް ގޮވާލާ އދ ގެ ސަލާމަތީ މަޖިލީހުގެ ޑްރާފްޓް ބަޔާނެއް އެމެރިކާ އިން ވަނީ ބްލޮކް ކޮށްފައެވެ.
