ދެ އަހަރަށް ފަހު ހާބަރު ފުޑް ކޯޓުގެ ފުރަތަމަ ކެފޭ ހުޅުވައިފި
އެ ސަރަހައްްދުގައި އަލަށް 26 ކެފޭއެއް ވަނީ ހަދައިފަ
މާލޭގެ ހުޅަނގު ދެކުނު ހާބަރު ސަރަހައްދުގައި ފުޑް ކޯޓުގައި ހިދުމަތް ދެނީ
މާލޭގެ ހުޅަނގު ދެކުނު ހާބަރު ސަރަހައްދުގައި ހެދި ފުޑް ކޯޓުތަކުގެ ތެރެއިން ފުރަތަމަ ކެފޭ ހުޅުވައިފިއެވެ.
ހާބަރު ކަނޑަތައް ހިންގި ސަރަހައްދުގައި ޒަމާނީ ފެންވަރަކަށް ހަދާފައިވާ ފުޑް ކޯޓުތަކުގެ ތެރެއިން ފުރަތަމަ ކެފޭ ހުޅުވީ ހޮނިހިރު ދުވަހުގައެވެ. އެ ކެފޭ ހުޅުވުމަށްފަހު ހައުސިންގ މިނިސްޓަރ ޑރ. މުހައްމަދު މުއިއްޒު ހޮނިހިރު ދުވަހު ކުރެއްވި ޓްވީޓެއްގައި ވިދާޅުވީ ދެން ހުރި ކެފޭތައް ހުޅުވުމުގެ މަސައްކަތް ކުރިއަށްދާކަމަށެވެ.
ކުރިން އެ ސަރަހައްދުގައި ގާތްގަނޑަކަށް 40 ވަރަކަށް ކަޑަ ނުވަތަ ފުޑް ސްޓޯލް ހުރި ނަމަވެސް މިހާރު ހަދާފައި ވަނީ ޖުމްލަ 26 ކެފޭއެއް ވަނީ ހަދާފައެވެ.
އެސްޓިއޯ އިން ކުރި އިއުލާންގައި ބުނެފައި ވަނީ ތިން ސައިޒެއްގެ ކެފޭތައް ހިމެނޭ ކަމަށާއި އެއީ 960 އަކަފޫޓުގެ ކެފޭ އާއި، 1260 އަކަފޫޓުގެ އިތުރުން 1660 އަކަފޫޓުގެ ކެފޭތަކެވެ. ފުޑް ކޯޓްތަކުގައި ހިމެނޭ ކެފޭތައް ކުއްޔަށް ދޫކުރުމަށް ނިންމާފައި ވަނީ، އަކަފޫޓެއް 53ރ. ގެ ރޭޓުންނެވެ. އެ ރޭޓުން ބަލާ ނަމަ އެންމެ އަގު ހެޔޮ ކެފޭއެއްގެ މަހު ކުލި ވެސް އުޅޭނީ 50،000ރ. އަށް ވުރެ ވެސް މަތީގައެވެ. އެންމެ ބޮޑެތި ކެފޭތަކުގެ ކުލި 87،980ރ. އަށް އަރައެވެ.
ފުޑް ކޯޓްތަކުގެ މަސައްކަތް 2016 ވަނަ އަހަރުގެ ޖެނުއަރީ މަހުގައި ފެށުނު ނަމަވެސް، އެއަހަރުގެ ޖުލައި މަހުން ފެށިގެން މަސައްކަތް ހުއްޓުމަކަށް އައެވެ. އެ މަސައްކަތް އެންމެ ފުރަތަމަ ހަވާލު ކުރެވުނީ ހަ މަސް ދުވަހުގެ ތެރޭގައި ނިންމާލުމަށެވެ. ކަނޑައެޅިފައިވާ ތާރީޙަށް މަސައްކަތް ނިންމާނުލެވުނުކަން ފާހަގަކޮށްލެވެ.
އެކަމާއި ގުޅިގެން އެސްޓީއޯ އިން ބުނި ގޮތުގައި އެ މަސައްކަތް ލަސްވީ ޑިޒައިނަށާއި އެނޫން ވެސް ބައެއް ކަންކަމަށް ބަދަލުތަކެއް ގެންނަން ޖެހިގެންނެވެ. އޭގެ އިތުރުން މަސައްކަތަށް އެކަށީގެންވާ ރަނގަޅު ކޮންޓްރެކްޓަރެއް ހޯދަން ވެސް ވަގުތުތަކެއް ހޭދަވި ކަމަށް އެ ކުންފުނިން ބުންޏެވެ. އެތަނުގައި ކުރިން ހިންގި ކެފޭތައް އަތުލުމަށް ފަހު އެހާ ގިނަ ދުވަސްތަކެއް ވެގެން ދިޔައިރު ވެސް ޚިދުމަތް ދޭން ނުފެށުމުން ގިނަ ބައެއްގެ ފާޑު ކިޔުން ވަނީ އަމާޒުވެފައެވެ.
