ރިޔާޒާއި އަރީފުގެ މައްޗަށް ކުރާ ޓެރަރިޒަމް ދައުވާގެ އަޑުއެހުންތައް މާދަމާ ފަށަނީ
1 މެއި 2018 | އަންގާރަ 14:23އަރީފުގެ މައްސަލަ އޮތީ މާދަމާގެ 14.00ގައި
ކުރީގެ ޕޮލިސް ކޮމިޝަނަރ އަހްމަދު އަރީފު - އޭނާގެ މައްޗަށް ވަނީ ޓެރަރިޒަމް ދައުވާ އުފުލާފައި
ކުރީގެ ޕޮލިސް ކޮމިޝަނަރ އަބްދުﷲ ރިޔާޒާއި އަހްމަދު އަރީފު މައްޗަށް އުފުލާފައިވާ ޓެރަރިޒަމްގެ ދައުވާގެ އަޑުއެހުން ބުދަ (މާދަމާ) ފެށުމަށް ތާވަލުކޮށްފި އެވެ.
އެންމެ ފަހުން ޕޮލިސް ކޮމިޝަނަރުގެ މަގާމު އަދާކުރައްވާފައިވާ އަދި މިހާރު ފުލުހުންގެ ހައްޔަރުގައި ހުރި އަރީފުގެ މައްޗަށް ކޮށްފައިވާ ޓެރަރިޒަމްގެ އަމަލެއް ހިންގަން އުޅުންކަމުގެ ދައުވާގެ އިބްތިދާއީ ފުރަތަމަ އަޑުއެހުން ބޭއްވުމަށް ހަމަ ޖައްސާފައިވަނީ ބުދަ ދުވަހުގެ މެންދުރު ފަހު 14.00 ގައެވެ.
އުއްތަމަ ފަނޑިޔާރު އަބްދުﷲ ސައީދާއި ފަނޑިޔާރު އަލީ ހަމީދާއި ކުރީގެ ރައީސް މައުމޫނު އަބްދުލް ގައްޔޫމާއި ރައްޔިތުންގެ މަޖިލީހުގެ މައްޗަންގޮޅި ދެކުނު ދާއިރާގެ މެމްބަރު އަބްދުﷲ ސިނާން މައްޗަށް ކޮށްފައިވާ ޓެރަރިޒަމް އަމަލެއް ހިންގަން އުޅުނު ކަމުގެ ދައުވާގައިވެސް އަރީފްއާ ގުޅިގެން ގާނޫނާ ހިލާފަށް އެ ބޭފުޅުން ކަންތައްތަކެއް ކޮށްފައިވާ ކަމަށް ތުހްމަތުކޮށްފައިވެ އެވެ. އެގޮތުން ގާނޫނީ އުސޫލުތަކުގެ ބޭރުން ކުރީގެ ޕޮލިސް ކޮމިޝަނަރ އަރީފް މެދުވެރިކޮށް ދުރާލާ ރާވައިގެން ފުލުހުންގެ ތެރެއިން ބަޔަލުކު ލައްވައި ފުލުހުންގެ ޑިއުޓީގައި އުޅުނު އިތުރު ފުލުހުންނާއި ކުރިމަތިލައި، ގައުމުގެ ހަމަ ނުޖެހުން ނަގާލަން މަސައްކަތްކޮށް ގާނޫނު އަސާސީއާއި ގާނޫނުތަކާއި އުސޫލުތަކުގެ ބޭރުން، ގާނޫނީ ގޮތުން އުފެދިފައިވާ ސަރުކާރު ގާނޫނާ ހިލާފަށް ވައްޓާލަން މަސައްކަތްކޮށް، ދައުލަތަށާއި ސަރުކާރަށް ނޭދެވޭ ނުފޫޒު ފޯރުވައި، އާންމުންގެ ސަލާމަތައް ނުރައްކާތެރިވާ ފަދަ ހާލަތެއް މެދުވެރިކުރުވާފައިވާ ކަމަށް އެ ބޭފުޅުންގެ މައްޗަށް ތުހްމަތުކޮށްފައިވެ އެވެ.
ކުރީގެ ޕޮލިސް ކޮމިޝަނަރ އަބްދުﷲ ރިޔާޒް:- އޭނާގެ މައްޗަށް ވަނީ ޓެރަރިޒަމް ދައުވާ އުފުލާފައި
ޑރ. މުހައްމަދު ވަހީދު ހުސެއިން މަނިކާއި ރައީސް އަބްދުﷲ ޔާމިންގެ ވެރިކަމުގައިވެސް ޕޮލިސް ކޮމިޝަރުކަން ކުރައްވާފައިވާ އަބްދުﷲ ރިޔާޒްގެ މައްޗަށް ކުރާ ޓެރަރިޒަމްގެ ދައުވާގެ އިބްތިދާއީ ފުރަތަމަ އަޑުއެހުން ބޭއްވުމަށް ހަމަ ޖައްސާފައިވަނީ ބުދަ ދުވަހުގެ ހަވީރު 5.00 ގައި އެވެ.
އަބްދުﷲ ރިޔާޒް ގެންދަވަނީ އޭނާގެ މައްޗަށް އުފުލި ގާނޫނު ތަންފީޒުކުރާ މުވައްޒަފަކަށް ހުރަސް އެޅުމުގެ ދައުވާ ސާބިތުވާ ކަމަށް ހައި ކޯޓުން ހުކުމް ކުރުމާއި ގުޅިގެން ޖަލު ހުކުމެއް މިހާރު ތަންފީޒު ކުރައްވަމުންނެވެ އެވެ.
ރައްޔިތުންގެ މަޖިލީހުގެ ކިނބިދޫ ދާއިރާގެ މެންބަރު އަދި ޖޭޕީގެ ނައިބް ލީޑަރު ރިޔާޒު ހަތަރު މަހާއި 24 ދުވަހަށް ޖަލަށް ލުމަށް ހައިކޯޓުން ހުކުމްކުރީ އޭނާގެ މައްޗަށް އެ ކުށް ސާބިތު ނުވާކަމަށް ކްރިމިނަލް ކޯޓުން ކޮށްފައިވާ ހުކުމް ބާތިލްކޮށް މިދިޔަ އޭޕްރިލް މަހުގެ 24 ވަނަ ދުވަހު އެވެ.
