މަރިޔަމް ސައީދުގެ ތައުޒިޔާ ދަފްތަރެއް ހުޅުވައިފި
30 އެޕްރީލު 2018 | ހޯމަ 12:48ދަފްތަރު ހުޅުވީ އެކަޑަމީއިން
މަރިޔަމް ސައީދު
ކުރީގެ ރައީސް، ސުމުއްވުލް އަމީރު އަލްމަރްހޫމް އިބްރާހިމް ނާސިރު ރަންނަބަނޑޭރި ކިލެގެފާނުގެ ކުރީގެ އަނބިކަނބަލުން މ. ބަގީޗާގޭ މަރިޔަމް ސައީދު ދީދީގެ ތައުޒިޔާ ދަފްތަރެއް ދިވެހި ބަހުގެ އެކަޑަމީ އިން ހުޅުވައިފިއެވެ.
ހޯމަ ދުވަހު ހުޅުވި މި ދަފްތަރު ދިހަ ދުވަހަށް ކުރިޔަށް ގެންދާނެއެވެ. ކޮންމެ ދުވަހަކު ވެސް ހެދުނު އަށަކުން މެންދުރު ފަހު އެއްގަޑި ބަޔަށް ތައުޒިޔާ ދަފްތަރުގައި ލިޔުމަށް ބޭނުންވާ ފަރާތްތަކަށް ފުރުސަތު ވަނީ ހުޅުވާލާފައެވެ. ދިވެހިރާއްޖޭގެ ގިނަ ޅެންވެރިނާއި ގައުމަށް ޚިދުމަށް ކުރެއްވި އަދި ކުރައްވަމުން ގެންދަވާ ބޭފުޅުން ވަނީ ޝުއޫރުތައް ފާޅުކުރައްވާފައެވެ.
މަރިޔަމް ސައީދުގެ ހަނދާން އާކުރަން ކުރިޔަށް ގިނަ ކަންތައްތައް ރާވަމުން އަންނަ ކަމަށާއި މިއީ އެ ކަންތަކުގެ ފެށުން ކަމުގައި ދިވެހި ބަހުގެ އެކަޑަމީ އިން ވަނީ ބުނެފައެވެ.
"މަރިޔަމް ސައީދަކީ ޅެންވެރިކަމުގެ ޝަރަފްވެރިކަމުގެ އިނާމް ލިބިވަޑައިގެންފައިވާ ބޭފުޅެއް. އަޅުގަނޑުމެން ތައުބީރުންގެ ޖަލްސާ އާއި އަދި އެކަމަނާގެ ލިޔުއްވައިފައިވާ ޅެން ފޮތްތަކުގެ ތެރެއިން ޅެންފޮތްތައް ނެރުމާއި މިކަހަލަ ވަރަށް ގިނަ ހަރަކާތްތަކެއް ކުރިއަށް ރާވަމުން މިގެންދަނީ" ދިވެހި ބަހުގެ އެކަޑަމީގެ ނައިބު ރައީސް ރާފިއާ އަބްދުލް ގާދިރް ވިދާޅުވިއެވެ.
އެކަޑަމީން ވިދާޅުވީ މަރްހޫމާ މަރިޔަމް ސައީދުގެ ޒިކުރާ އައުކުރުން އޮންނާނީ އެންމެ މަތީ ދަރަޖައިގައި ކަމަށެވެ.
އުމުރުފުޅުން 85 އަހަރުގައި މަރިޔަމް ސަޢީދު އަވަހާރަވެފައި ވަނީ، ގިނަ ދުވަސްތަކެއް ވަންދެން އާލާސްކަންފުޅާ އުޅުއްވުމަށް ފަހު، އޭޕްރީލް 26، 2018 ވަނަ ދުވަހު ސްރީ ލަންކާގެ ކޮލަމްބޯގައެވެ.
