މައުމޫނަށް ކުރާ ޓެރަރިޒަމްގެ ދައުވާއަށް ވަކީލަކު އައްޔަން ކުރަން ދެ ދުވަސް
29 އެޕްރީލު 2018 | އާދީއްތަ 13:29މައުމޫނު ވަނީ އިލްހާމާއި ސިނާން އަށް ރިޝްވަތު ދީފައި
ކުރީގެ ރައީސް މައުމޫނު އަބްދުލް ގައްޔޫމް:- އެމަނިކުފާނުގެ މައްޗަށް ޓެރަރިޒަމްގެ ދައުވާ ވަނީ އުފުލާފައި
ކުރީގެ ރައީސް މައުމޫނު އަބްދުލް ގައްޔޫމްގެ މައްޗަށް އުފުލާފައިވާ ޓެރަރިޒަމްގެ އަމަލެއް ހިންގުމުގެ ކުށުގެ ދައުވާއާ ގުޅިގެން އެމަނިކުފާނަށް ވަކީލަކު އައްޔަން ކުރުމަށް ދެ ދުވަހުގެ މުހުލަތެއް ކޯޓުން ދީފި އެވެ.
މައުމޫނު މައްޗަށް އުފުލި މި ދައުވާއާ ގުޅިގެން އާދިއްތަ ދުވަހު ބޭއްވި ފުރަތަމަ އިބްތިދާއީ އަޑުއެހުމުގައި ދައުލަތުން އިއްވި ދައުވާ ސާފުވެއްޖެ ތޯ ގާޒީ ސުވާލު ކުރެއްވުމުން މައުމޫނު ވިދާޅުވީ އެމަނިކުފާނު މައްސަލައިގައި ކުރިއަށްދާން ބޭނުންފުޅު ވަނީ ވަކީލަކާއެކު ކަމަށެވެ. އަދި ގާނޫނުގައި ވަކީލަކު އައްޔަން ކުރުމަށް ދެވޭނެ އެންމެ ދިގު މުއްދަތު ކަމަށްވާ 10 ދުވަހުގެ މުހްލަތެއް ދެއްވުމަށް އެމަނިކުފާނު އެދިވަޑައިގެންނެވި އެވެ. ނަމަވެސް މައްސަލަ ބައްލަވާ ގާޒީ އަހްމަދު ހައިލަމް ވިދާޅުވީ ޓެރަރިޒަމްގެ އެ މައްސަލައާ ގުޅިގެން މައުމޫނު ވަނީ ތަހްގީގު މަރުހަލާގައި ވެސް އެކަކަށް ވުރެ ގިނަ ވަކީލުން ބޭނުންފުޅު ކުރައްވާފައިވާކަން ޝަރީއަތައް އެނގިފަ ކަމަށާއި އަދި މިދައުވާ ގުޅިގެން ވެސް މައުމޫނުގެ ވަކީލުން ކްރިމިނަލް ކޯޓަށް ސިޓީ ވެސް ފޮނުވާފައި އެބަ ހުރި ކަމަށެވެ. އަދި އެހެންމެ ޓެރަރިޒަމްގެ ދައުވާއާ ގުޅިގެން މައުމޫނު މިހާރު ވެސް މައްސަލަ ނިމެންދެން ބަންދުގައި ހުންނަވާއިރު މި މައްސަލައިގައާ ގުޅިގެން ވަކީލުން ވަނީ މައުމޫނު ބަންދުކޮށްފައި ހުންނަވާ ތަނަށްގޮސް ބައްދަލުކޮށްފައި ކަމަށް ވެސް ވިދާޅުވި އެވެ. އެހެން ކަމުން މި މައްސަލާގައި ވަކީލަކު އައްޔަން ކޮށްފައިނުވާ ކަމަށް ބެލޭނެ ހަމައެއް ނެތް ކަމަށް ގާޒީ ނިންމެވި އެވެ.
ވަކީލުން އައްޔަން ކުރުމަށް އެހާ ގިނަ ދުވަސް ބޭނުންވަނީ ކީއްވެތޯ މައުމޫނު ކިބައިން ގާޒީ ސުވާލު ކުރުމުން ވިދާޅުވީ އެއީ ވަކީލުން ވަރަށް ބިޒީކޮން އުޅެން ޖެހިފައިވާތީ ވަކީލުންނާ މަޝްވަރާކުރައްވަން ބޭނުންފުޅުވާތީ ކަމަށެވެ. އަދި އެ މައްސަލައިގައި ވަޑައިގެންނެވޭނެ ވަކީލުން ވެސް އެނގިވަޑައިގަންނަވާނީ މަޝްވަރާ ކުރެއްވުމަށް ފަހު ކަމަށް އެމަނިކުފާނު ވިދާޅުވި ނަމަވެސް ގާޒީގެ އެ ނިންމުން ބަދަލު ކުރައްވާފައިނުވެ އެވެ.
މީގެ އިތުރުން މައުމޫނު ވަނީ އެމަނިކުފާނުގެ ޝަރީއަތް ނިންމެންދެން ބަންދުގައި ބަހައްޓަން ކުރައްވާފައިވާ އަމުރު ބަދަލު ކޮށްދޭން މިއަޑުއެހުމުގައި ވެސް އެދިވަޑައިގެންފަ އެވެ. އެގޮތުން އެމަނިކުފާނު ބަންދުން ދޫކޮށްނުލެވޭ ކަމަށްވާނަމަ އެމަނިކުފާނުގެ އުމުރުފުޅަށް ރިއާޔަތްކުރުމަށް ފަހު ގޭބަންދަށް ބަދަލުކޮށްދޭން އެދިވަޑައިގެންނެވި އެވެ. އަދި އެ އުމުރުގައި އެހެން ބަންދުގައި ބަހައްޓާނަމަ ސިއްޙީ ކުއްލި ނުރައްކަލެއް ވެސް ކުރިމަތިވެދާނެ ކަން ފާހަގަ ކުރައްވައި ވިދާޅުވީ ސިއްހީ ހާލުކޮޅު އެނގޭނެ ޑޮކްޓަރުގެ ލިޔުންތަކާއެކު ކްރިމިނަލް ކޯޓަށް ސިޓީއެއް ވެސް އެމަނިކުފާނު ހުށަހަޅުއްވައިފައިވާނެ ކަމަށެވެ.
އެވާހަކަތަކާ ގުޅޭ ގޮތުން ގާޒީ ވިދާޅުވީ ޓެރަރިޒަމްގެ ޝަރީއަތް ނިމެންދެން ނުވަތަ އެހެން ގޮތަކަށް އެ މައްސަލަ ނިމެންދެން ބަންދުގައި ބަހައްޓަން އަމުރުކުރުމުގެ ކުރިން ވެސް މައުމޫނުގެ އުމުރާ ގުޅޭ ގޮތުންނާއި ބަންދުގައި ބެހެއްޓުމާއި ގުޅޭ ގޮތުން ވާހަކަ ދައްކަވާފައިވާ ކަމަށެވެ. އަދި ބަންދުގައި ބަހައްޓަން ނިންމެންވީ ކޮށްފައިވާ ޓެރަރިޒަމްގެ ދައުވާއަކާ ގުޅިގެން ކަމަށްވުމާއި ތުހްމަތުކުރެވޭ ކަން ކަމާ ގުޅިގެން ކަމަށް ގާޒީ ވިދާޅުވި އެވެ.
މައުމޫނު ދޫނިދޫގައި ބަންދުގައި ބަހައްޓާފައިވަނީ ސިއްހީ ކަންކަން މާފުށީގައި ރަނގަޅު ނުވުމުން އެމަނިކުފާނުގެ އެދިވަޑައިގަތުމަށް ކަމަށް ވެސް ގާޒީ ވިދާޅުވިއެވެ. އަދި މައުމޫނާ މެދު އަމަލު ކުރަމުންދަނީ ބަންދުގައި ތިބޭ މީހުނަށް ވުރެ ހާއްސަ ގޮތަކަށް ކަމަށް ވެސް ގާޒީ ފާހަގަ ކުރެއްވި އެވެ. އެއަށް ފަހު މައުމޫނު ވިދާޅުވީ ވަކީލުންނާއި އެކު އިތުރަށް އަދި އެ މައްސަލައިގައި ވާހަކަފުޅު ދައްކަވާނެ ކަމަށެވެ.
އެމަނިކުފާނު ބަންދުން ދޫކޮށްލުމަށް އެދި އެ ކަންބޮޑުވުން މީގެ ކުރިން ވެސް ކޯޓުގައި ފާހަގަ ކުރައްވާފައިވެ އެވެ.
ރައީސް މައުމޫނާ ދެކޮޅަށް އުފުލި ޓެރަރިޒަމްގެ ދައުވާގައި ބުނެފައިވަނީ އެމަނިކުފާނު ވަނީ ގާނޫނީ ވެރިކަން ގާނޫނާ ހިލާފަށް ބަދަލު ކުރުމަށް ބައެއް ފަނޑިޔާރުންނަށާއި ރައްޔިތުންގެ މަޖިލީހުގެ މެމްބަރުންނަށް ރިޝްވަތު ދެއްވާފައި ކަމަށެވެ. އަދި އެމަނިކުފާނު އެ ރިޝްވަތު ދެއްވަމުން އައިސްފައިވަނީ 2013 ވަނަ އަހަރުން ފެށިގެން ކަމަށް ވެސް ދައުވާގައި ބުނެފައިވެ އެވެ. އަދި ރައްޔިތުންގެ މަޖިލީހުގެ މެމްބަރުން ތެރެއިން ދަނގެތި ދާއިރާގެ މެމްބަރު އިލްހާމް އަހްމަދާއި ރައްޔިތުންގެ މަޖިލީހުގެ މައްޗަންގޮޅި ދެކުނު ދާއިރާގެ މެމްބަރު އަބްދުﷲ ސިނާނަށް މައުމޫނު ވަނީ ރިޝްވަތު ދީފައި ކަމަށް ވެސް އާދިއްތަ ދުވަހު ބޭއްވި އިބްތިދާއީ އަޑުއެހުމުގައި ދައުވާ އިއްވަމުން ދައުލަތުގެ ވަކީލް ވިދާޅުވިއެވެ. އަދި އެހެންމެ އެކެއް ފެބްރުއަރީ ގައި ސުޕްރީމް ކޯޓުން ނެރުނު އަމުރަކީ ގާނޫނު އަސާސީން ދައުލަތް ހިންގުމަށް ވަކިވަކި ބާރުތައް ލިބިދީ އުފައްދާފައިވާ މުވައްސަސާތަކުގެ ހިންގުމުގެ ނިޒާމުތަކަށް ބުރޫއަރައި، ގައުމީ ސަލާމަތާއި ރައްޔިތުންގެ ރައްކާތެރިކަމާ ގުޅިފައިވާ މަސްލަހަތުތަކެއް ގެއްލޭ ގޮތަށް މައުމޫނު ރިޝްވަތު ދީގެން މައުމޫނު ނެރުވާފައިވާ އަމުރެއް ކަމަށް ވެސް ދައުލަތުން އިއްވި ދައުވާގައި ބުނެފައިވެ އެވެ.
އޭގެ އިތުރުން ގާނޫނީ އުސޫލުތަކުގެ ބޭރުން ކުރީގެ ޕޮލިސް ކޮމިޝަނަރ އަހްމަދު އަރީފްއާ ގުޅިގެން ގައުމުގެ ހަމަ ނުޖެހުން ނަގާލަން މަސައްކަތްކޮށް ގާނޫނު އަސާސީއާއި ގާނޫނުތަކާއި އުސޫލުތަކުގެ ބޭރުން، ގާނޫނީ ގޮތުން އުފެދިފައިވާ ސަރުކާރު ގާނޫނާ ހިލާފަށް ވައްޓާލަން މަސައްކަތްކޮށް، ދައުލަތަށާއި ސަރުކާރަށް ނޭދެވޭ ނުފޫޒު ފޯރުވައި، އާންމުންގެ ސަލާމަތަށް ނުރައްކާތެރިވާ ފަދަ ހާލަތެއް މެދުވެރިކުރުވާފައިވާ ކަމަށް ވެސް މައުމޫނުގެ މައްޗަށް ތުހްމަތުކޮށްފައިވެ އެވެ.
ރައީސް މައުމޫނުގެ މައްޗަށް އަދުލު އިންސާފު ގާއިމު ކުރަން ހުރަސްއެޅުމުގެ ދައުވާއެއްވެސް ވަނީ އުފުލާފަ އެވެ.
