އިރާގުގެ ކުރީގެ ރައީސް ސައްދާމް ހުސެއިން ދަންޖައްސާ އަވަހާރަ ކޮށްލިތާ ބާރަ އަހަރު ފުރިގެން ދިޔަ އިރު އެމަނިކުފާނުގެ ހަށިކޮޅު ވީ ތަނަކާ މެދު ސުވާލު އުފެދިއްޖެއެވެ.

2006 ވަނަ އަހަރު އެމަނިކުފާނު ދަންޖައްސާ އަވަހާރަ ކޮށްލުމަށްފަހު، ހަށިކޮޅު ގެންދެވުނީ ސައްދާމްގެ އުފަންވެ ވަޑައިގެންނެވި އަލް-އަޖްވާ އަށެވެ. އެތަނުގައި އެމަނިކުފާނުގެ ހަށިކޮޅު ފަސްދާނުލެވި މަގްބަރާއެއްވެސް ހެދިއެވެ.

ސައްދާމް ދަންޖެއްސުމާއެކު އެމަނިކުފާނުގެ ހަށިކޮޅު ބަޣްދާދުން އަލް-އަޖްވާގެ ކައިރީގައިވާ ތިކްރީތައް އެމެރިކާގެ އަސްކަރީ ހެލިކޮޕްޓަރެއްގައި ގެންދިޔައީ އޭރުގެ އެމެރިކާގެ ރައީސް ޖޯޖް ބުޝްގެ ޚާއްސަ ހުއްދަ އެއްގެ ދަށުންނެވެ.

ސައްދާމްގެ ހަށިކޮޅު ގެނައުމުން ހަށިކޮޅާ ހަވާލުވުމަށް، ސައްދާމްގެ އާއިލާގެ ސިޓީއަކާ އެކު އައިސް ހުރީ ސައްދާމް ނިސްބަތްވެ ވަޑައިގަންނަވާ ގަބީލާގެ ލީޑަރެއް ކަމަށްވާ ޝޭޚް މަނާފް އަލީ އަލް ނިދާއެވެ. އެ ސިޓީގައިވަނީ ސައްދާމްގެ ހަށިކޮޅު ލަސްނުކޮށް ވަޅުލުމަށް އާއިލާ އިން އެދޭ ކަމުގައެވެ.

އޭގެ ދުވަސްކޮޅެއް ފަހުން އިވުނު ގޮތުގައި ޝީއީންގެ ހަމަލާއެއްގައި ސައްދާމްގެ މަގްބަރާ ހަލާކުވިއެވެ. އެތައް ބަޔަކު ގަބޫލު ކުރާ ގޮތުގައި އޭގެ ފަހުން ސައްދާމްގެ މަހާނަ ވަނީ ކޮނެފައެވެ. އަނެއް ބަޔަކު ބުނަނީ ސައްދާމްގެ ހުސެއިންގެ ދަރިކަނބަލުން ހާލާ ޕްރައިވެޓް މަތިންދާ ބޯޓެއްގައި ވަޑައިގެން އެކަމަނާގެ ބައްޕާފުޅުގެ ގަބުރު ޖޯޑްން އަށް ގެންދެވީ ކަމަށެވެ.

ނަމަވެސް "މޮނިޓަރ" ނޫހަށް އިރާގުގެ ޔުނިވަރސިޓީ ޕްރޮފެސަރަކު ދިން ބަސްދީގަތުމެއްގައި ބުނެފައިވަނީ، ހާލާ އިރާގަށް އެނބުރި ވަޑައިގަނެފައި ނުވާ ކަމަށާއި، ސައްދާމްގެ ގަބުރު އެ ގޮތައް ގެންދެވޭނެ ކަމަށް ގަބޫލު ނުކުރެވޭ ކަމަށެވެ. އެހެން ކަމުން ސައްދާމްގެ ގަބުރުވީ ކޮންތަނެއްގައި ކަމާއި، ގަބުރު ގެންދިޔައީ ކާކުކަން އެއްވެސް މީހަކަށް ނޭގޭ ކަމަށެވެ.

ސައްދާމްގެ ބައްޕާފުޅުގެ މަހާނައަށް ވެސް ދިމާވީ މިފަދަ ގޮތެކެވެ. ސައްދާމްގެ ބައްފާފުޅުގެ މަގްބަރާވެސް ވަނީ ގޮއްވާލާފައެވެ.

ސައްދާމްގެ ފުރާނަ ނެތް ހަށިކޮޅަށް ވީ ގޮތް ނޭގިގެން ބައެއް މީހުން އުޅޭ އިރު އިރާގުގެ އާއްމުންގެ ތެރޭގައި ސައްދާމް އަވަހާރަ ނުވާ ކަމަށް ގަބޫލު ކުރާ މީހުންވެސް މަދެއް ނޫނެވެ. އެމީހުން ބުނަނީ ދަންޖައްސާ މަރާލެވުނީ ސައްދާމް އެއް ނޫނެވެ. ސައްދާމްގެ ސިފައިގައި ވާ އެހެން މީހެކެވެ.