މާލޭ ގްރޭންޑް ލިފްޓް ތެރޭގައި މީހަކު ތާށިވެއްޖެ

ކުރީގެ އަރަބިއްޔާ ހުރި ބިމުގައި ހަދާފައިވާ ފްލެޓް (މާލޭ ގްރޭންޑް)ގެ ލިފްޓް ތެރޭގައި އަންހެން ކުއްޖަކު ތާށިވެއްޖެއެވެ.

އެސަރަހައްދުގައި ހުރި މީހަކު ރާއްޖެއެމްވީއަށް ބުނިގޮތުގައި ޒުވާން އަންހެން ކުއްޖަކު ލިފްޓް ތެރޭގައި ތާށިވެފައިވަނީ ކަރަންޓް ގޮސްގެން ލިފްޓް ހުއްޓިގެން ކަމަށެވެ. އޭނާ ބުނީ ލިފްޓް ހުއްޓި އެކުއްޖާ ތާށިވީ ހޮނިހިރު ދުވަހުގެ ރޭ 10:15 ހާއިރުއެވެ.

އެމައުލޫމާތާ ގުޅިގެން ރާއްޖެ އެމްވީގެ ނޫސްވެރިން އެސަރަހައްދަށް ގޮސް ބެލިއިރު ލިފްޓް ދޮރު ހުޅުވުމުގެ މަސައްކަތް މްއެންޑީއެފްގެ ފަޔަރ އެންޑް ރެސްކިއު ޓީމުން ކުރަމުން ދިޔަ އެވެ. ލިފްޓުން އެ އަންހެން ކުއްޖާ ނެރެވުނީ ގާތްގަނޑަކަށް 11:45 ހާއިރު އެވެ.

މާލޭ ގްރޭންޑްގައި ދިރިއުޅޭ ބައެއް މީހުން ކިޔައިދިން ގޮތުގައި އެ އިމާރާތުގެ ބެކަޕް ޖަނަރޭޓަރު މަސައްކަތެއް ނުކުރެ އެވެ. އަދި ފަޔަރ އެލާމް ސިސްޓަމް ވެސް މަސައްކަތެއް ނުކުރެ އެވެ.

މިދިޔަ އަންގާރަ ދުވަހު ހަވީރު މާލޭ ބައެއް ސަރަހައްދުތަކުން ކަރަންޓް ދިޔަ ވަގުތު ގާކޮށި އޭ ބްލޮކް އަދި ބީ ބްލޮކްގެ ލިފްޓް ތެރޭގައިވެސް ވަނީ ތިން މީހަކު ތާށިވެފައެވެ. ބީ ބްލޮކްގެ ފްލެޓްގައި ތާށިވި އަންހެން މީހާ އޭޑީކޭ އަށް ގެންގޮސް ފަރުވާވެސް ދީފައިވެއެވެ