ޔުނައިޓެޑާއެކު ތަށި ކާމިޔާބުކުރަން ޖެހޭ: ޑެހޭއާ
ޑެެހޭއާ ހޯދުމަށް ޔޫރަޕުގެ އެންމެ ބޮޑު ޓީމުތަކުން އަންނަނީ މަސައްކަތްކުރަމުން
ސްޕެއިންގެ ހުނަރުވެރި ގޯލްކީޕަރު ޑޭވިޑް ޑެހޭއާ
މެންޗެސްޓާ ޔުނައިޓެޑާއެކު ތަށި ކާމިޔާބުކުރަން ޖެހޭ ކަމަށް އެ ޓީމަށް ކުޅެމުން އަންނަ ސްޕެއިންގެ ހުނަރުވެރި ގޯލްކީޕަރު ޑޭވިޑް ޑެހޭއާ ބުނެފިއެވެ.
ޔުނައިޓެޑްގައި ދައްކަމުން އަންނަ މޮޅު ކުޅުމާއެކު ޑެހޭއާ ހޯދުމަށް ޔޫރަޕުގެ އެންމެ ބޮޑު ޓީމުތަކުން އަންނަނީ މަސައްކަތް ކުރަމުންނެވެ. އެގޮތުން ޖަރުމަނުގެ ބަޔާން މިއުނިކާއި ސްޕެއިންގެ ރެއާލް މެޑްރިޑްއިން ވެސް އޭނާ ހޯދުމަށް މަސައްކަތް ކުރަމުން އަންނަ ކަމަށް ރިޕޯޓުތައް ބުނެއެވެ. އެހެން ނަމަވެސް ޕީއެފްއޭއިން ހޮވާ އަހަރުގެ އެންމެ މޮޅު ޓީމުގައި ވޭތުވެދިޔަ ހަތަރު އަހަރު ވެސް ހިމެނުނު ޑެހޭއާ ނުވިއްކާނެ ކަމަށް ޔުނައިޓެޑްގެ ކޯޗު ހޯސޭ މޮރީނިއޯ ވަނީ ބުނެފައެވެ.
އެފްއޭ ކަޕްގެ ފައިނަލްގައި އަންނަ މަހުގެ ތެރޭގައި ޗެލްސީއާ ދެކޮޅަށް ޔުނައިޓެޑް ނުކުންނައިރު އިނގިރޭސިވިލާތު މަޝްހޫރު ނޫހެއް ކަމަށްވާ ޑެއިލީ މެއިލްއާ ވާހަކަ ދައްކަމުން ޑެހޭއާ ބުނީ އޭނާގެ ފަރާތުން މި ސީޒަނުގައި ދައްކަމުންދާ ކުޅުމާމެދު ހިތްހަމަޖެހޭ ކަމަށާއި އެކަން ދެމެހެއްޓުމަށް ކުރަންޖެހޭ އެންމެ މުހިންމު ކަމަކީ ގިނަ މުބާރާތްތަކުގެ ތަށި ކާމިޔާބުކުރުން ކަމަށެވެ.
މި އިންޓަވިއުގައި ވާހަކަ ދައްކަމުން ޑެހޭއާ ބުނީ ލުއީ ވެންހާލް ޔުނައިޓެޑްގެ ކޯޗުގެ މަގާމުގައި ހުރިއިރު އެ ޓީމު ނިންމާލީ ހަތަރު ވަނައިގައި ކަމަށާއި އެއީ އޭނާއަށް ބަލައިގަންނަން ވަރަށް ދަތި ނަތީޖާއެއް ކަމަށެވެ. އޭނާ ބުނީ ޔުނައިޓެޑަށް ބޭނުންވަނީ ހުރިހާ މެޗަކުން މޮޅުވާން ބޭނުންވާ ކޯޗެއް ކަމަށާއި އެލެކްސް ފާގަސަން އަދި ހޯސޭ މޮރީނިއޯއަކީ ވެސް ހުރިހާ މެޗަކުން މޮޅުވާން ބޭނުންވާ ކޯޗުން ކަމަށެވެ. އެ ދެ ކޯޗުންނަކީ ވެސް ކުޅޭ ކޮންމެ މެޗަކުން މޮޅުވާން ބޭނުންވާ ކޯޗުން ކަމަށް ޑެހޭއާ ބުނެފައިވެއެވެ.
ޑެހޭ ބުނީ ފާގަސަންއާ ރިޓަޔާކުރި ފަހުން އާ ޓީމެއް ބިނާކުރެވޭ ވަރަށް ވަގުތު ލިބެއްޖެ ކަމަށާއި މިއީ ގަބޫލުކުރަން ވެސް ދަތި ކަމެއް ކަމަށެވެ. އޭނާ ބުނީ ބޭނުންވަނީ މުބާރާތްތަކުގެ ތަށި ކާމިޔާބުކުރަން ކަމަށާއި ޔުނައިޓެޑް ކުރިން އޮތް މަގާމަށް ގެންދަން ޖެހޭ ކަމަށެވެ. އޭނާ ބުނީ ޔޫރަޕުގެ ގަދަ ބާރަކަށް ވެސް ޔުނައިޓެޑް ހަދަންޖެހޭ ކަމަށާއި އިނގިރޭސި ޗެމްޕިއަންކަން ވެސް އެ ޓީމުން ހޯދަން ޖެހޭ ކަމަށެވެ.
ބެލެވުނު ގޮތުގައި 2016 ވަނަ އަހަރުގެ ސީޒަނުގައި ވެންހާލް ޔުނައިޓެޑްގެ ކޯޗުގެ މަގާމުގައި ދެމިހުރި ނަމަ ޑެހޭއާ ޔުނައިޓެޑް ދޫކޮށްލާނެއެވެ. އެކަމުގެ ސަބަބުން އޭނާއަށް އެ ސީޒަނުގެ ފުރަތަމަ ދެ މެޗު ގެއްލުނުއިރު އެކަމާ ގުޅޭގޮތުން ވާހަކަ ދައްކަމުން ޑެހޭއާ ބުނީ ވެންހާލްއާ އެއްވެސް މައްސަލައެއް އޮތް ކަމަށް ގަބޫލުނުކުރާ ކަމަށާއި ސަޕޯޓަރުން އެކަމާ ގުޅޭގޮތުން ދެކޭނެ ގޮތަކާއި މެދު ވަރަށް ކަންބޮޑުވި ކަމަށެވެ. އެހެން ނަމަވެސް އެ ދުވަހު ވެސް ސަޕޯޓަރުންގެ ފަރާތުން ލިބުނު އެހީތެރިކަމަށް ޝުކުރު އަދާކުރަން ބޭނުންވާ ކަމަށާއި އެއީ އޭނާއަށް އަބަދުވެސް ވަރަށް މުހިންމު މެޗަކަށް ވާނޭ ކަމަށެވެ.
ޑެހޭ ބުނީ ޔުނައިޓެޑަކީ އޭނާގެ ޓީމު ކަމުގައި ދެކޭ ކަމަށާއި އެ ޓީމާއެކު އޭނާއަށް ކާމިޔާބަށް ވާސިލްވެވޭނެ ކަމުގެ ޔަގީންކަން އެބައޮތް ކަމަށެވެ. އެހެންކަމުގެ ބެލެވޭގޮތުގައި އަންނަ ސީޒަނުގައި ވެސް އޭނާ ފެނިގެންދާނީ ޔުނައިޓެޑްއިންނެވެ.
