އިސްލާމީ ޝަރީޢަތުގައި ބުނާ ޙާލަތުއްޟަރޫރާ އެއް ކުރިމައްޗެއް ނުވޭ: ޑރ. ބާރީ
27 އެޕްރީލު 2018 | ހުކުރު 18:25ޙާލަތުއްޟަރޫރާ އަކީ އިސްލާމީ ޝަރީޢަތުގައި އޮންނަ އެއްޗެއް
ގުޅިފައިވާ ސިޔާސީ ޕާޓީތަކުން ބޭއްވި ޖަލްސާގެ ތެރެއިން
ޙާލަތުއްޟަރޫރާ އަކީ އިސްލާމީ ޝަރީޢަތުގައި އޮންނަ އެއްޗެއްކަމަށާއި، އެހެންނަމަވެސް ދާދިފަހުން ސުޕްރީމް ކޯޓުން ނިންމި ނިންމުމުގައި ޒަރޫރީ ޙާލަތެއް މެދުވެރިވިކަމަށް ބުނެ ނިންމި ނިންމުންތަކަކީ ހަޤީޤީ ޒަރޫރީ ޙާލަތެއް މެދުވެރިވެގެން ނިންމި ނިންމުންތަކެއް ނޫންކަމަށް އަދާލަތު ޕާޓީގެ އެއް ފައުންޑަރ އަދި ކުރީގެ އިސްލާމިކް އެފެއަރޒް މިނިސްޓަރ ޑރ. އަބްދުލް މަޖީދު އަބްދުލް ބާރީ ވިދާޅުވެއްޖެއެވެ.
އއ. ރަސްދޫގައި ގުޅިފައިވާ ސިޔާސީ ޕާޓީތަކުން ހުކުރު ދުވަހުގެރޭ ބޭއްވި ޖަލްސާގައި ވާހަކަ ދައްކަވަމުން ޑރ. ބާރީ ވިދާޅުވީ ޙާލަތުއްޟަރޫރާ ނުވަތަ ޒަރޫރީ ޙާލަތު މެދުވެރިވަނީ އިސްލާމީ ޝަރީޢަތުގެ މައިގަނޑު 5 މަޤްޞަދުގެ ތެރެއިން މަޤަޞަދެއް ގެއްލޭނަމަ ކަމަށެވެ. އެ 5 މަޤްޞަދަކީ، ފުރާނަ ސަލާމަތްކުރުމާއި، ދީން ހިމާޔަތްކުރުމާއި، މުދާ ހިމާޔަތްކުރުމާއި، ބުއްދި ހިމާޔަތްކުރުމުގެ އިތުރުން އަބުރާއި އިއްޒަތާއި ކަރާމާތް ހިމާޔަތްކުރުންކަމަށެވެ. އެހެންކަމުން މިއިން މަޤްޞަދެއް ނުގެއްލޭ ކަމެއްގައި ޒަރޫރީ ޙާލަތެއް މެދުވެރިނުވާކަމަށް ޑރ. ބާރީ ވިދާޅުވިއެވެ.
މިސާލު ނަންގަވަމުން ޑރ. ބާރީ ވިދާޅުވީ އިސްލާމީ ޝަރީޢަތުގައި އޮންނަ ގޮތުން މީހަކު ނަމާދަށް ހުއްޓައި، އެހެން މީހެއްގެ ފުރާނަ ގެއްލޭފަދަ ކަމެއް ކުރިމަތިވެއްޖެނަމަ، އެމީހަކު ސަލާމަތްކުރަން ނަމާދު ދޫކޮށް ދެވޭނެކަމަށެވެ. އަދި ކެއުން ޙަރާމް ކުރައްވާފައިވާ ތަކެތިވެސް ކެއުން ހުއްދަވާ ޒަރޫރީ ޙާލަތްތައް މެދުވެރިވާކަން ޑރ. ބާރީ ފާހަގަކުރެއްވިއެވެ.
ރާއްޖޭގައި އޮންނަނީ ރިޔާސީ ނިޒާމެއް ކަން ފާހަގަކުރައްވައި ޑރ. ބާރީ ވިދާޅުވީ ބަރުލަމާނީ ނިޒާމެއްގައި އޮންނަ ގޮތާއި ޚިލާފަށް، ޤާނޫނު ހަދާ މަޖިލީހުގެ އަޣުލަބިއްޔަތު ސަރުކާރަށް ގެއްލުމަކީ ސަރުކާރު ރޫޅޭނެ ކަމެއް ނޫންކަމަށެވެ. އެހެންކަމުން ރައީސް ޔާމީންގެ ޕީޕީއެމްއަށް މަޖިލިސް ތެރެއިން އަޣުލަބިއްޔަތު ގެއްލުނަސް ސަރުކާރު ނުހުއްޓޭނެކަަމަށާއި، އެއީ ޒަރޫރީ ޙާލަތެއް ނޫންކަމަށް ޑރ. ބާރީ ފާހަގަކުރެއްވިއެވެ.
ޑރ. ބާރީ ވިދާޅުވީ 5 އަހަރުގެ ދައުރަކަށް ވެރިކަމަށް އަންނަނީ ޤާނޫނު އަސާސީ ހިމާޔަތްކުރުމަށް ވައުދުވެގެންކަމަށާއި، އެހެންނަމަވެސް މިހާރު ފެންނަނީ އެއާއި އިދިކޮޅަށް ކަންކަން ހިނގަމުންދާތަންކަމަށެވެ. ސިޔާސީ މަސްރަހުގައި ހިނގަމުންދާ ކަންކަމަށް އިޝާރާތްކުރައްވައި ޑރ. ބާރީ ވިދާޅުވީ ހައްޔަރުކޮށްފައިވާ ސިޔާސީ ފަރާތްތަކަށް އާއިލީ ބައްދަލުވުމާއި އެކަހެރި ބައްދަލުވުން ދޭން ޖެހޭކަމަށެވެ. އަދި ޤާނޫނަށް ހުރުމަތްތެރިކޮށް ހިތާ ވާހަކަ ދައްކަންޏާ ހުރިހާ ޤާނޫނުތަކަށް ބޯލަނބަން ޖެހޭކަމަށް ޑރ. ބާރީ ވިދާޅުވިއެވެ.
