އިންތިހާބްގެ ކުރިން އެއްބަސްވެވޭ އިލެކްޝަން ކޮމިޝަނެން އެކުލަވާލާނަން: ގުޅިފައިވާ ސިޔާސީ ޕާޓީތައް
އިލެކްޝަން ކޮމިޝަނުން ސިޔާސީ ޕާޓީތަކުގެ މައްސަލަތަކުގެ ތެރެއަށް ވަދެގެން ނުވާނެ
ގުޅިފައިވާ ސިޔާސީ ޕާޓީތަކުން ބޭއްވި ނޫސްވެރިންގެ ބައްދަލުވުމުގައި އަދާލަތު ޕާޓީގެ މީޑިއާ ކޮމެޓީގެ ރައީސް
ކުރިއަށް އޮތް ރިޔާސީ އިންތިހާބްގެ ކުރިން ހުރިހާ ސިޔާސީ ޕާޓީތަކަށް އެއްބަސްވެވޭ އިލެކްޝަން ކޮމިޝަނެން އެކުލަވާލާނެ ކަމަށް ގުޅިފައިވާ ސިޔާސީ ޕާޓީތަކުން ބުނެފިއެވެ.
ބުރާސްފަތި ދުވަހު މ. ކުނޫޒުގައި ގުޅިފައިވާ ސިޔާސީ ޕާޓީތަކުން ބޭއްވި ނޫސްވެރިންގެ ބައްދަލުވުމުގައި އަދާލަތު ޕާޓީގެ މީޑިއާ ކޮމެޓީގެ ޗެއަރ އަލީ ނަޒީރު ވިދާޅުވީ ކުރިއަށް އޮތް ރިޔާސީ އިންތިހާބްގައި ވާދަކުރައްވަން ބޭނުންފުޅުވާ ހުރިހާ ބޭފުޅުންގެ ޙައްގުތައް ކަށަވަރުވާން ޖެހޭނެ ކަމަށެވެ. އެކަން ކުރެވޭނީ ސަރުކާރާއި އަދި ހުރިހާ ސިޔާސީ ޕާޓީތަކަށް އެއްބަސްވެވޭ އިލެކްޝަން ކޮމިޝަނެން ގާއިމްކޮށްގެން ކަމަށް ނަޒީރު ވިދާޅުވިއެވެ.
ގާނޫނާއި އެއްގޮތަށް އަމަލުކުރާ އިލެކްޝަން ކޮމިޝަނެން އެކުލަވާލެވޭނެ ކަމުގެ ފޮނި އުންމީދުތަށް ކުރެވޭ ކަމަށް ނަޒީރު ވިދާޅުވިއެވެ. އަދި ގުޅިފައިވާ ސިޔާސީ ޕާޓީތަކުން ކުރާ މަސައްކަތަށް ކާމިޔާބު ލިބެމުން އަންނަ ކަން އޭނާ ފާހަގަކުރިއެވެ،
އިލެކްޝަން ކޮމިޝަނުން ދެ ސިޔާސީ ޕާޓީ ދޭތެރޭގައި ޖެހިފައިވާ މައްސަލަތަކުގެ ތެރެއަށް ވަދެގެން ނުވާނެ ކަންފާހަގަކުރަމުން ނަޒީރު ވިދާޅުވީ ފަހަކަށް އައިސް އިލެކްޝަން ކޮމިޝަނުން އަމަލުކުރަނީ ސިޔާސީ ޕާޓީއަކުން އަމަލުތައް ބަހައްޓާ ގޮތަށް ކަމަށެވެ.
މީގެ އިތުރުން މިހާރު ސިޔާސީ އެކި ކަންކަމާއި ގުޅިގެން ހައްޔަރު ކޮށްފައިވާ ބޭފުޅުން ކޯޓަށް ހާޒިރުކުރުމަށް ފަހު، ޝަރީއަތް ނުފަށައި ގިނަ ވަގުތު ކޯޓްގައި ހޭދަކުރަން ޖެހުމަކީ ކަންބޮޑުވާ ކަމެއް ކަމަށް ގުޅިފައިވާ ސިޔާސީ ޕާޓީތަކުން ބުންޏެވެ. ހާއްސަކޮށް ކުރީގެ ރައީސް މައުމޫން އަބްދުލް ގައްޔޫމް ފަދަ ބޭފުޅުން ކޯޓުގައި ފަސް ގަޑިއިރަށް ވުރެ ގިނަ ވަގުތު ޝަރީއަތް ނުފެށި ހުންނަވަން ޖެހިވަޑައިގަންނަވާ އިރު، ކޯޓުގައި ހުންނަވާ ވަގުތު ފަރިއްކޮޅަށާ ، ނަމާދު ކުރެއްވުމަށް ފުރުޝަތު އެންމެ އެދެވޭ ގޮތުގައި ލިބިވަޑައިނުގަންނަވާ ކަން ފާހަގަ ކުރެއްވިއެވެ.
