ސިޔާސީ ޕާޓީތަކުގެ ގާނޫނު ބުނާ ގޮތުން ކޮންމެ އަހަރަކު ހުށައަޅަންޖެހޭ، އަހަރީ އޮޑިޓް ރިޕޯޓް އިދިކޮޅު އެންމެ ބޮޑު ސިޔާސީ ޕާޓީ އެމްޑީޕީން ހުށަހަޅައިފިއެވެ.
އެމްޑީޕީގެ ޗެއާޕަޝަންގެ ނައިބް މާލީ އަހުމަދު އަބްދުﷲ ވިދާޅުވީ ދައުލަތުން 2017 ވަނަ އަހަރު ދިން ފައިސާ ހަރަދު ކޮށްފައިވާ ގޮތް ބައިނަލްއަގްވާމީ އޮޑިޓް ފާމެއް ކަމަށްވާ އަރންސްޓް އެންޑް ޔަންގް (އީއެންޔޫ) އިން އޮޑިޓް ކޮށްފައިވާ ކަމަށެވެ. އަދި އޮޑިޓް ރިޕޯޓް މިހާރު އިލެކްޝަން ކޮމިޝަނަން ހުށަހަޅާފައިވާ ކަމަށް އަހުމަދު އަބްދުﷲ ވިދާޅުވިއެވެ.
އަހުމަދު އަބްދުﷲ ވިދާޅުވީ އިލެކްޝަން ކޮމިޝަނުން އެޕާޓީގެ އޮޑިޓް ރިޕޯޓް ހުށަހެޅުމަށް އަންގާފައިވާ އެންމެ ފަހުގެ ތާރީހް އަކީ އަންނަ މެއި މަހުގެ 8 ވަނަ ދުވަސް ކަމަށްވާއިރު، އެ ދުވަސް ނުޖެހެނީސް އިލެކްޝަން ކޮމިޝަނުން އެމްޑީޕީގެ އޮޑިޓް ރިޕޯޓް ހުށަނާޅާ ކަމަށް ބުނެ ނޫސްވެރިންގެ ބައްދަލުވުންތަކުގައި އެވާހަކަ ދެއްކުމަކީ ބަލައިގަނެވޭނެ ކަމެއް ނޫން ކަމަށެވެ. އަހުމަދު އެކަން ސިފަ ކުރީ އިލެކްޝަން ކޮމިޝަނުން އެ ކޮމިޝަންގެ ނިންމުންތަކަށް ވެސް އިހްތިރާމް ނުކުރަނީ ކަމަށެވެ.
"އިލެކްޝަން ކޮމިޝަންގެ ނިންމުމަށް އެ ކޮމިޝަންގެ މެމްބަރުން އިޙްތިރާމް ނުކުރާކަން މިކަމުން ވެސް މިހާމަވަނީ" އަހުމަދު އަބްދުﷲ ރާއްޖެއެމްވީއަށް މައުލޫމާތު ދެމުން ވިދާޅުވިއެވެ
އިލެކްޝަން ކޮމިޝަނުން ކަންކަން ކުރަނީ ގާނޫނާއި ގަވައިދުތަކާއި ސީދާ ހިލާފަށްކަން ފާހަގަ ކުރަމުން އަހުމަދު އަބްދުﷲ ވިދާޅުވީ ދައުލަތުގެ ބަޖެޓުން ސިޔާސީ ޕާޓީތަކަށް ދޭން ޖެހޭ ފައިސާ އެ ކޮމިޝަނަން އެގޮތަށް ނުހިފެހެއްޓޭނެ ކަމަށެވެ. ކޮންމެ އަހަރެއްގެ ފުރަތަމަ ތިން މަސް ދުވަސް ތެރޭގައި ފައިސާ ދިނުމަށް ގާނޫނުން އެކޮމިޝަނަން ލާޒިމް ކުރާއިރު، ސިޔާސީ ޕާޓީތަކަށް ފައިސާ ދެނީ އޮކްޓޯބަރ، ސެޕްޓެމްބަރ ހިސާބުގައި ކަމަށް އަހުމަދު ފާހަގަކުރެއްވިއެވެ.
އެމްޑީޕީން ވަނީ އިލެކްޝަން ކޮމިޝަނުން ގާނޫނާއި ގަވައިދުތަކާއި އެއްގޮތަށް އަމަލުކުރަން ގޮވާލާފައެވެ. އަދި ހުރިހާ ސިޔާސީ ޕާޓީތަކަށް ވެސް ހަމަ ހަމަކަމާއި އެކު ކަންކަން ކުރުމަށް އިލްތިމާސްކޮށްފައެވެ.
