ރައީސް ޔާމީންގެ މިވެރިކަމަކީ ޚުދުމުޚްތާރު ވެރިކަމެއް ކަމަށް ރަސްމީކޮށް ސިއްކަ ޖެހުމުގެ ޖާގަ ދީގެން ނުވާނެ ކަމަށް އެމްޑީޕީގެ ނާއިބު ރައީސް މުހައްމަދު ޝިފާޒް ވިދާޅުވެއްޖެއެވެ.
ރާއްޖެ ޓީވީގެ ފަލަ ސުރުޚީ ޕްރޮގްރާމްގައި ގެނެސްދިން "ރައީސް ނަޝީދުގެ މައްސަލައިގައި އދ. ގެ ނިންމުން" ޕެނަލް ޑިސްކަޝަންގައި ވާހަކަ ދައްކަވަމުން ޝިފާޒް ވިދާޅުވީ ދިވެހިރާއްޖޭގެ ރައްޔިތުންގެ މަސްލަހަތު ގުޅިފައި އޮތީ ކޮންބޭފުޅަކާ ކަމާއި އަދި ރައްޔިތުންގެ މަސްލަހަތު އެމްޑީޕީއާ ގުޅިފައިވާ މިންވަރު ރައްޔިތުންނަށާއި މުޅި ދުނިޔެއަށް ވެސް އެނގިފައިވާ ކަމަށެވެ. އެހެންކަމުން ރައީސް ނަޝީދަށް ވެރިކަމަށް ކުރިމަތި ލެއްވޭނެކަން މުޅި ދުނިޔެއިން ހާމަ ކުރުމަކީ ރައީސް ޔާމީނަށް ޤަބޫލްފުޅު ކުރެއްވޭނެ ކަމެއް ނޫން ކަމަށެވެ.
ރައްޔިތުންގެ މަޖިލީހުގެ ބާރަށު ދާއިރާގެ މެންބަރުކަން ވެސް ކުރިން ކުރެއްވި ޝިފާޒް ވިދާޅުވީ ކުރިއަށް އޮތް ރިޔާސީ އިންތިޚާބުގައި ވޯޓު ކަރުދާސްކޮޅުގައި ރައީސް ނަޝީދުގެ ނަންފުޅު އޮންނާނެކަން ކަށަވަރުވެފައިވާ ކަމަށާއި ދުނިޔޭގެ އެކި އެކި ޤައުމުތަކާއި ޖަމްއިއްޔާތަކާއި ޖެހިވަޑައިގެން ރައީސް ޔާމީނަށް ލިބިވަޑައިގަންނަވާނެ މޮޅެއް ނޯންނާނެކަން ކަމަށެވެ. ވަކިން ޚާއްޞަކޮށް އދ. ގެ ވޯކިންގ ގުރޫޕުން ނިންމައި، ހިއުމަންރައިޓްސް ކޮމެޓީން ނިންމައި، މުޅި ދުނިޔެއަށް އެކަން އެންގުމުން އެއަށް ބޯނުލަނބައި ތިބުމުން މުޅި ދުނިޔޭގެ ކުރިމަތީގައި ރަސްމީކޮށް ހުދުމުޚްތާރު ސަރުކާރެއްކަން ހާމަވެގެން ދާނެ ކަމަށް ޝިފާޒް ވިދާޅުވިއެވެ
"މުޅި ދުނިޔެއަށް އެނގޭ ގޮތައް ދިވެހި ދައުލަތއް އެކަން އެންގީމާ އެއަށް ބޯ ނުލަނބާ ތިބޭ ތިބުން މުޅި ދުނިޔޭގެ ކުރިމަތީގައި ރަސްމީކޮށް ރައީސް ޔާމީންގެ ވެރިކަމަކީ ހުދުމުޚްތާރު ވެރިކަމެއްކަމުގެ ސިއްކަ ޖެހުން އެއީ ރައީސް ޔާމީންގެ ވެރިކަމުގައި ބޭނުންފުޅު ވާނެ ކަމެއްތޯ. އަޅުގަނޑު ދެކޭ ގޮތުގައި އެޖާގަ ދީގެން ނުވާނެ،" ޝިފާޒް ވިދާޅުވިއެވެ.
ޝިފާޒް ވިދާޅުވީ އދ. ހިއުމަން ރައިޓްސް ކޮމެޓީން ނިންމި ނިންމުމުން، ޢަބްދުﷲ ގާޒީ ހައްޔަރު ކުރި ވާހަކައަކީ މިހާރު ދެއްކޭނެ ވާހަކައެއް ނޫން ކަމަށާއި އެއީ ރައީސް ނަޝީދުގެ މައްޗަށް އުފުލެންވީ ދައުވާއެއް ނޫން ކަމަށް ވަރަށް ބޮޑަށް މުޅި ދުނިޔެއަށް އިތުރަށް ސާފުވެގެން ހިނގައްޖެ ކަމަށެވެ. އަދި އެޝަރީޢަތް ހިނގައިދިޔަ ގޮތާއި އެހުކުމް އައިގޮތް އެއީ ދުނިޔޭގެ އެއްވެސް ހިސާބަކުން ޤަބޫލު ކުރެވޭނެ ގޮތް ނޫންކަން އެނގި ހާމަވެއްޖެ ކަމަށެވެ. އެހެންކަމުން އެހާސާފުކޮށް އެނގެން އޮތްކަމެއްކައި ރައީސް ނަޝީދުގެ އިސްތަށިފުޅުގައި ޓެރަރިޒަމްގެ ތުހުމަތު އަޅުވައި އެހިންގި ކަންކަމަކީ މިހާރު ނަފީވެފައިވާ ކަމެއް ކަމަށް ޝިފާޒް ވިދާޅުވިއެވެ.
