ސުޕްރީމް ކޯޓުގެ އަމުރަށް ފަހު ރައީސް ނަޝީދަކީ މުޖުރިމެކޭ ބުނެގެން ނުވާނެ: ގާޒީ ބާރީ
ބާރީއަކީ ރައީސް ނަޝީދުގެ މައްޗަށް ހުކުމް ކުރެއްވި ބެންޗުގެ ގާޒީއެއް
ގާޒީ ބާރީ (ކ) އާއި އުއްތަމަ ފަނޑިޔާރު އަބްދުﷲ ސައީދު (ވ)
އެކެއް ފެބްރުއަރީގައި ސުޕްރީމް ކޯޓުން ނެރުނު އަމުރަށް ފަހު ކުރީގެ ރައީސް މުހައްމަދު ނަޝީދަކީ މުޖުރިމެއް ކަމަށް އެއްވެސް މީހަކު ބުނެގެން ނުވާނެ ކަމަށް ގާޒީ އަބްދުލްބާރީ ޔޫސުފް ވިދާޅުވެއްޖެއެވެ.
ކްރިމިނަލް ކޯޓުގެ ކުރީގެ އިސް ގާޒީ ބާރީއަކީ ރައީސް ނަޝީދުގެ މައްޗަށް ކުރި 13 އަހަރު ދުވަހުގެ ޖަލު ހުކުމް އިއްވިއިރު، ކްރމިނަލް ކޯޓުގައި އެމައްސަލަ ބެއްލެވި ގާޒީންގެ ބެންޗުގައި ހިމެނި ވަޑައިގެންނެވި ގާޒީއެވެ. ރައީސް ނަޝީދުގެ މައްޗަށް އެހުކުމް އިއްވީ ގާޒީ ބާރީ ވެސް ހިމެނިވަޑައިގަންނަވާ ގޮތަށް އެމައްސަލަ ބެއްލެވި ތިން ގާޒީންގެ އިއްތިފާގުންނެވެ.
ސޯޝަލް މީޑިއާގައި ގާޒީ ބާރީ ވިދާޅުވެފައި ވަނީ "އިއްތިފާގިއްޔާއަށް ވުރެ އަޣްލަބިއްޔާ ބަލިކަށިވާނެ" ކަމަށެވެ. އެކެއް ފެބްރުއަރީގައި ސުޕްރީމް ކޯޓުގެ ހުރިހާ ފަނޑިޔާރުންގެ އިއްތިފާގުން ނެރުއްވި އަމުރަށް ފަހު ރައީސް ނަޝީދަކީ މުޖުރުމެއް ކަމަށް އެއްވެސް މީހަކު ބުނެގެން ނުވާނެ ކަމަށެވެ.
ކްރިމިނަލް ކޯޓުގެ ކުރީގެ އިސްގާޒީ އަބްދުﷲ މުހައްމަދު ހައްޔަރު ކުރި މައްސަލާގައި ރައީސް ނަޝީދުގެ މައްޗަށް 13 އަހަރުގެ ޖަލު ހުކުމް އިއްވި ގާޒީންގެ ބެންޗުގައި ހިމެނިވަޑައިގަންނަވަނީ ހައިކޯޓުގެ މިހާރުގެ އިސް ފަނޑިޔާރު އަދި އޭރު ކްރިމިނަލް ކޯޓުގެ އިސްގާޒީ ކަމާ ވަގުތީ ގޮތުން ހަވާލުވެ ހުންނެވި އަބްދުﷲ ދީދީ އާއި މިހާރު ހައިކޯޓުގެ ފަނޑިޔާރު ސުޖާއު އުސްމާނުގެ އިތުރުން ގާޒީ ބާރީއެވެ. އެކެއް ފެބްރިއަރީގައި ސްޕްރީމް ކޯޓުގެ ފަނޑިޔާރުންގެ ފުލް ބެންޗުން ނެރެފައިވާ އަމުރުގައި ބުނެފައި ވަނީ ތަހުގީގުގެ މައްޗަށް ބިނާކޮށް ދައުވާ އުފުލާ ފަރާތަށާއި ފަނޑިޔާރުގެ ގެއަށް ނުފޫޒު ފޯރުވައިގެން ގާނޫނީ އިޖުރާއަތުތަކާ ހިލާފަށް ކޮށްފައިވާ ހުކުމްތަކުގެ މައްޗަށް ބެލެނިވެރިކަމުގެ އިހްތިސާސްގެ ދަށުން ސުޕްރީމް ކޯޓަށް ހުށަހެޅިފައިވާ މައްސަލަތަކަށް ރިއާޔަތްކޮށް ބެލި އިރު، އެ މައްސަލަތަކަކީ ގާނޫނީ ހަމަތަކުގެ މަތީން އަލުން ބަލައި ޝަރީއަތުގެ ފަރާތުން ގޮތް ކަނޑައަޅަން ޖެހޭ މައްސަލައަކަށް ވާތީ، އެ މައްސަލަތަކާ މެދު އަލުން ގޮތެއް ކަނޑައެޅެންދެން ރައީސް ނަޝީދާއި އެހުކުމުގައި ދެން ބަޔާންކޮށްފައިވާ އަށް ބޭފުޅުން މިނިވަން ކުރުމަށް އަމުރު ކުރާ ކަމަށެވެ. ސްޕްރީމް ކޯޓުގެ އެ އަމުރާ ގުޅިގެން ސަރުކާރުން ވަނީ ކުއްލި ނުރައްކަލުގެ ހާލަތު އިއުލާންކޮށް ސުޕްރީމް ކޯޓުގެ އުއްތަމަ ފަނޑިޔާރު އަބްދުﷲ ސައީދާއި އެކޯޓުގެ ފަނޑިޔާރު އަލީ ހަމީދު ހައްޔަރުކޮށްފަ އެވެ. އަދި އޭގެ ފަހުން ދެން ތިއްބެވި ތިން ފަނޑިޔާރުން ވަނީ އެ ނުވަ ބޭފުޅުން މިނިވަން ކުރުމަށް އަމުރުކޮށްފައި އޮތް ބައި ބާތިލުކޮށްފައެވެ. އަދި އޭގެ ފަހުން ރައްޔިތުންގެ މަޖިލީހުގެ 12 މެމްބަރުންގެ ބަޔަށް އަމަލު ކުރުން ފަސް ކުރުމަށް ވެސް ސުޕްރީމް ކޯޓުން އަމުރު ކޮށްފައި ވެއެވެ.
ގާޒީ ބާރީ ވަނީ ޖުވެނައިލް ކޯޓަށް ބަދަލުކޮށްފައެވެ. އޭގެ ފަހުން ސަރުކާރުގެ ބައެއް ކަންކަމާ މެދު ގެންދަވަނީ ފާޑުވިދާޅުވަމުންނެވެ.
