ޕީއެސްޖީގައި ނޭމާ މަޑުކުރާނެ، އެމެރީގެ ކުރިމަގާ މެދު ގޮތެއް ނުނިމޭ

ބްރެޒިލްގެ ތަރި ނޭމާ ފްރާންސްގެ ޕެރިސް ސެއިންޓް ޖާމަން (ޕީއެސްޖީ) ގައި މަޑުކުރާނެ ކަމަށާއި އެހެން ނަމަވެސް އެ ޓީމުގެ ކޯޗުގެ މަގާމުން އަންނަ ސީޒަނުގައި ފެންނާނެ ކަމުގެ ޔަގީންކަން މިވަގުތު ދެވެން ނެތް ކަމަށް އެ ޓީމުގެ ކޯޗު އުނައި އެމެރީ ބުނެފިއެވެ.

މިދިޔަ ހޫނު މޫސުމުގެ ޓްރާންސްފާ މާކެޓުގައި ދުނިޔޭގެ ރެކޯޑު ޓްރާންސްފާ ފީއެއް ކަމަށްވާ 222 މިލިއަން ޔޫރޯއަށް ސްޕެއިންގެ ބާސެލޯނާ ދޫކޮށް ޕީއެސްޖީއަށް ބަދަލުވެ ނޭމާ އެ ޓީމުގައި މޮޅު ކުޅުމެއް ދެއްކިއިރު އަނިޔާގެ ސަބަބުން އޭނާއަށް ވަނީ ސީޒަން ނިމިފައެވެ. ޕީއެސްޖީއިން ފްރެންޗް ލީގު ހޯދާފައިވާއިރު އެ ޓީމަށް 20 ލަނޑު ނޭމާ ޖަހައިދިނެވެ. ރެއާލް މެޑްރިޑް އަތުން ބަލިވެ ޗެމްޕިއަންސް ލީގުން ޕީއެސްޖީ ކެޓިއިރު އެކަމުގެ ސަބަބުން އަންނަ ސީޒަނުގައި އޭނާ ފެންނާނީ ރެއާލްއިން ކަމަށް މީޑިއާތަކުން ވަނީ ރިޕޯޓުކޮށްފައެވެ.

ނޫސްވެރިންނާއި ވާހަކަ ދައްކަމުން ޕީއެސްޖީގެ ކޯޗު އެމެރީ ބުނީ އަންނަ ސީޒަނުގައި ވެސް ނޭމާ ފެންނާނީ ޕީއެސްޖީގެ ޖާޒީއިން ކަމަށާއި އެ ޓީމާއެކު އޭނާ ހަދާފައިވާ ކޮންޓްރެކްޓްގެ ނިޔަލަށް އޭނާ އެ ޓީމުގައި ހުންނާނެ ކަމަށެވެ. ހަމައެހެންމެ އޭނާ އެ ޓީމުގައި ހުރީ ވަރަށް ހިތްހަމަޖެހިގެން ކަމަށާއި އެހެން ނަމަވެސް ނޭމާ ފެންވަރުގެ ކުޅުންތެރިޔަކު ހޯދުމަށް އަބަދުވެސް ދުނިޔޭގެ އެންމެ ބޮޑު ޓީމުތަކުން މަސައްކަތްކުރާނެ ކަމަށެވެ.

އެމެރީ ބުނީ ނޭމާއާއެކު މަޝްވަރާތަކެއް ކުރިޔަށް ގެންދިޔަ ކަމަށާއި ކްލަބްގެ އެންމެ މަތީ ފަންތީގައި ހިމެނޭ މީހުންނާއެކު ވެސް ނޭމާ މަޝްވަރާތަކެއް ކުރިޔަށް ގެންގޮސްފައިވާ ކަމަށެވެ. އެ މަޝްވަރާތަކަކީ އޭނާ ކްލަބް ދޫކޮށްލުމާ ބެހޭ މަޝްވަރާތަކެއް ނޫން ކަމަށާއި އެހެން ނަމަވެސް އެއީ އޭނާގެ އަނިޔާއާ ގުޅޭގޮތުން ދެކެވުނު ވާހަކަތަކެއް ކަމަށް އެމެރީ ބުނެފައިވެއެވެ. އެމެރީ ބުނީ ނޭމާ އަންނަނީ ޝެޑިއުލާ އެއްގޮތަށް އަނިޔާއިން ރަނގަޅުވަމުން ކަމަށާއި ސީޒަނުގެ ފަހު މެޗުގައި ނުވަތަ އޭގެކުރިން ވެސް އޭނާ ފެނުމަކީ އެކަށީގެންވާ ކަމެއް ކަމަށެވެ.

މި ސީޒަނުގެ ފްރެންޗް ލީގު އެމެރީ ޕީއެސްޖީއަށް ކާމިޔާބުކޮށްދީފައިވާއިރު އޭނާއަށް ޗެމްޕިއަންސް ލީގު އެ ޓީމަށް ހޯދައިނުދެވުމާ ގުޅިގެން ގިނަ ބަޔަކު އަންނަނީ ފާޑުކިޔަމުންނެވެ. އެކަމާ ގުޅޭގޮތުން ވާހަކަ ދައްކަމުން އެމެރީ ބުނީ އަންނަ ސީޒަނުގައި އޭނާ އެ ޓީމުން ފެންނާނެ ކަމާމެދު އަދިވެސް ގޮތެއް ނިންމިފައިނުވާ ކަމަށާއި އަންނަ ސީޒަނަށް ތައްޔާރުވުމަށް މެނޭޖްމަންޓާއެކު އަދި ވާހަކަ ދެކެވިފައިނުވާ ކަމަށެވެ.

އެމެރީ ބުނީ ކްލަބް ވިސްނުން ބިނާކުރަން ޖެހޭނީ އެންމެ ފުރަތަމަ ފްރާންސްގައި ބާއްވާ މުބާރާތްތަކުން ކާމިޔާހުން ހޯދަން ކަމަށާއި ޗެމްޕިއަންސް ލީގަކީ ކްލަބަކަށް ޔޫރަޕުގައި ލިބޭ އެންމެ ބޮޑު ފަހުރު ކަމަށެވެ. އެގޮތުން ޗެމްޕިއަންސް ލީގު ހޯދުމަށް ބޭނުންވާނަމަ ފްރާންސްގެ ފުޓްބޯޅައިގެ ތާރީހުން އެންމެ ފުރަތަމަ ޖާގަ ހޯދަން ޖެހޭ ކަމަށާއި އަންނަ ސީޒަނުގައި އެ މުބާރާތް ކާމިޔާބުކުރުމުގެ ފުރުސަތު އަނެއްކާ ވެސް ހުޅުވިގެންދާނެ ކަމަށެވެ.

ނޭމާ ޕީއެސްޖީ ދޫކޮށްލާނެ ކަމަށް މީޑިއާ ރިޕޯޓުތައް ބުނަމުންދާއިރު އޭނާ އެ ޓީމުގައި މަޑުކުރާނީ އެމެރީގެ ބަދަލުގައި އާ ކޯޗެއް ގެނައުމުން ކަމަށް ވެސް ބައެއް މީޑިއާތަކުން ވަނީ ބުނެފައެވެ. އެހެންކަމުން އަންނަ ސީޒަނުގައި ޕީއެސްޖީގެ ކޯޗުގެ މަގާމުން އެމެރީ ފެނުމަކީ ވުމަށްވުރެން ނުވުން ގާތްކަމެއް ކަމަށް ފުޓްބޯޅަ ދިރާސާކުރާ ފަރާތްތަކުން ވަނީ ބުނެފައެވެ.