ސީރިއާ އަށް ހަނގުރާމައަށް ދިޔަ ދިވެއްސަކު އެނބުރި ރާއްޖެއަށް އައުމުން ވެސް އޭނާ ހައްޔަރުނުކޮށް ދޫކޮށްލާފައިވާ ކަމަށް ބައެއް މީޑިއާތަކުގައި ރިޕޯޓް ކޮށްފިއެވެ.
ބައެއް މީޑިއާތަކުގައި ރިޕޯޓް ކޮށްފައިވާ ގޮތުގައި އެމީހާއަކީ މީގެ އަހަރެއްހާ ދުވަސް ކުރިން ސީރިއާ އަށް ހަނގުރާމައަށް ދިޔަ ކ. ގުރައިދޫ މީހެކެވެ. މިދިޔަ މަހުގެ 28 ވަނަ ދުވަހު އޭނާ އެނބުރި ރާއްޖެ އައިސްފައިވާކަމަށް ވެސް ބުނެފައިވެއެވެ.
އެނބުރި އައިސް އޭނާ މިވަގުތު ހުރީ މާލޭގައި ކަމަށް ވެސް މީޑިއާތަކުގައި ވަނީ ރިޕޯޓް ކޮށްފައެެވެ. ދާހިލީ ހަނގުރާމައިގައި ބައިވެރިވުމަކީ ރާއްޖޭގެ ގާނޫނު ބުނާގޮތުން ކުށެއް ނަމަވެސް މިހާތަނަށް އޭނާ ހައްޔަރުކޮށްފައެއް ނުވެ އެވެ. މިކަމާއި ގުޅިގެން ފުލުހުންގެ ބަހެއް ހޯދާލުމަށް ފުލުހުންގެ ތަރުޖަމާނު އަހުމަދު ޝިފާނަށް ގުޅާލުމުން ވިދާޅުވީ އެކަމާއި ގުޅޭ ގޮތުން އެއްޗެއް ދެންނެވެން ނެތް ކަމަށެވެ.
ސީރިއާ އަށް ދިޔަ ދިވެހިންގެ އަދަދު މީގެ ކުރިން އުޅެނީ 49 ގައި ނަމަވެސް މިއަހަރު އިއުލާން ކުރިއިރު އެ އަދަދު 61 އަށް އަރާފައިވެ އެވެ.
ޑިފެންސް މިނިސްޓަރު އާދަމް ޝަރީފް މީގެ ކުރިން ވިދާޅުވެފައިވަނީ ހަނގުރާމައިގައި ބައިވެރިވުމަށް ފަހު އެނބުރި ރާއްޖެ އަންނަން ބޭނުންވާ ދިވެހިންނަށް ރާއްޖެ އައުމުގެ ފުރުސަތު އެބައޮތް ކަމަށާއި އެ މީހުން ބޭނުން ވެއްޖެ ނަމަ އެކަން ކޮށްދޭނެ ކަމަށެވެ. އެކަމަކު ރާއްޖޭން ބޭރަށް ހަނގުރާމަ އަށް ދިޔުމަކީ ރާއްޖޭގެ ގާނޫނުތަކާ ހިލާފު ކަމަކަށް ވާތީ އޭގެ ދަށުން އެ މީހުންނާ މެދު ފިޔަވަޅު އަޅާނެ ކަމަށް ވެސް މިނިސްޓަރު ވިދާޅުވި އެވެ.
