ސޫރިޔާއިން އެމެރިކާ ސިފައިން ނުބޭލުމަށް ޓްރަމްޕަށް ވިސްނަވައިދެއްވިން: މެކްރޯން

ސޫރިޔާގައި ހަރަކާތްތެރިވާ އެމެރިކާގެ ދެހާހެއްހާ ސިފައިން އެޤައުމުން ނުބޭލުމަށް އެމެރިކާގެ ރައީސް ޑޮނަލްޑް ޓްރަމްޕަށް ވިސްނަވައިދެއްވިކަމަށް ފަރަންސޭސީވިލާތުގެ ރައީސް އެމަނުއަލް މެކްރޯން ވިދާޅުވެއްޖެއެވެ.

ސޫރިޔާގެ ރައީސް ބައްޝާރުލް އައްސަދުގެ ސަރުކާރުން ކެމިކަލް ހަތިޔާރު ރައްކާކުރާކަމަށް ތުހުމަތުކުރެވޭ މަރުކަޒުތަކަށް، ހަފްތާ ބަންދުގެ ތެރޭގައި އެމެރިކާއާއި އިނގިރޭސިވިލާތާއި ގުޅިގެން ފަރަންސޭސީވިލާތުން ވައިގެ ހަމަލާތައް ދިން ފަހުން ފުރަތަމަ ފަހަރަށް ދެއްވި ޓީވީ އިންޓަރވިއުގައި މެކްރޯން ވިދާޅުވީ ހަމަލާތައް ލިމިޓްކުރަންވެސް ޓްރަމްޕަށް ވިސްނަވައިދެއްވީ އޭނާކަމަށެވެ. އަދި އެހެން ހަދަން ޖެހުނީ ޓްވިޓަރ މެދުވެރިކޮށް ޓްރަމްޕް މާ ވަރުގަދަޔަށް ރަޝިޔާއަށާއި ސޫރިޔާއަށް އިންޒާރު ދެއްވަން ފެއްޓެވުމުންކަމަށް މެކްރޯން ވިދާޅުވިއެވެ.

އެމެރިކާ ސިފައިން ސޫރިޔާއިން ނުބޭލުމަށް ޓްރަމްޕަށް ދެންނެވިކަމަށް މެކްރޯން ވިދާޅުވެފައި މިވަނީ، އެމެރިކާ ސިފައިން ވަރަށް އަވަހަށް ސޫރިޔާއިން ފައިބާނެކަމަށް މިމަހުގެ ކުރީކޮޅު ޓްރަމްޕް ވިދާޅުވެފައިވަނިކޮށެވެ. އަދި ސޫރިޔާއަށް މިހަފްތާ ބަންދުގައި ދިން ހަމަލާތަކުގެ މައުލޫމާތު ހާމަކުރައްވަމުން ހުކުރު ދުވަހުގެ ރޭ ވެސް ޓްރަމްޕް ވަނީ އެމެރިކާ ސިފައިން ސޫރިޔާގައި ދާއިމަށް ނުތިބޭނެކަމަށް ވިދާޅުވެފައެވެ.

މެކްރޯންގެ ވާހަކަފުޅާއި ގުޅިގެން އެމެރިކާގެ ރިޔާސީ ގަނޑުވަރު ވައިޓް ހައުސްގެ ތަރުޖަމާނު ސާރާ ހަކަބީ ސެންޑަރސް ވިދާޅުވީ އެމެރިކާގެ މިޝަންއަށް ބަދަލެއް ނާންނަކަމަށާއި، ވީހާވެސް އަވަހަކަށް އެމެރިކާގެ ފައުޖުތައް އަނބުރާ ގެނައުމަކީ އެމެރިކާގެ ވިސްނުންކަމަށެވެ. އެހެންނަމަވެސް ސޫރިޔާގައި ހަރަކާތްތެރިވާ އިސްލާމިކް ސްޓޭޓްގެ ހަނގުރާމަވެރިން އެއްކޮށް ނެތިކޮށްލުމަކީ އެމެރިކާގެ އަމާޒުކަމަށް ސާރާ ވިދާޅުވިއެވެ.

އެމެރިކާގެ ސިފައިން އިރުމަތީ ސޫރިޔާގައި ހަރަކާތްތެރިވަމުން ދަނީ އިސްލާމިކް ސްޓޭޓްގެ ހަނގުރާމަވެރިންނާއި ދެކޮޅަށް ހަނގުރާމަކުރަމުންދާ ސީރިއަން ޑިމޮކްރެޓިކް ފޯސަސްއަށް ތަމްރީނުދިނުމަށާއި، އެމީހުންނަށް ބޭނުންވާ އެހީތެރިކަން ފޯރުކޮށްދިނުމަށެވެ. ސީރިއަން ޑިމޮކްރެޓިކް ފޯސަސް އަކީ ކުރުދީ އަދި ޢަރަބި ހަނގުރާމަވެރިންގެ މައްޗަށް އެކުލެވޭ ހަނގުރާމަވެރި އިއްތިޙާދެކެވެ.

ހަމަލާތަކުގެ ކުރިން ވަރަށް ގިނަ ފަހަރަށް ޓްރަމްޕާއި މެކްރޯން ފޯނުން ވާހަކަ ދެއްކެވިއިރު، މެކްރޯން އަކީ ހުޅަނގު ޔޫރަޕްގެ ވެރިންގެ ތެރެއިން ޓްރަމްޕާއި އެންމެ ގާތް ލީޑަރެވެ. އަދި ޓްރަމްޕްގެ ވެރިކަމުގައި އެމެރިކާއަށް "ސްޓޭޓް ވިޒިޓެއް" ކުރައްވާ ފުރަތަމަ ލީޑަރަށް މެކްރޯން މިމަހު ވެވަޑައިގަންނަވާނެއެވެ. ޓްރަމްޕް ވަނީ މިދިޔަ އަހަރު ފަރަންސޭސީވިލާތުގެ ޤައުމީ ދުވަހުގެ ޕެރޭޑްގައިވެސް ބައިވެރިވެވަޑައިގެންފައެވެ.

އާދިއްތަ ދުވަހު ފަރަންސޭސީ ރައީސް އެމަނުއަލް މެކްރޯން ބީ.އެފް.އެމް.ޓީ.ވީ އަށް ދެއްވި އިންޓަރވިއު 3 ގަޑިއިރަށް ދިގުދެމިގެން ދިޔައެވެ. އަދި އިންޓަރވިއު އާއި ގުޅޭ ހޭޝް ޓެގްތައް ޓްވިޓަރގައި އާދިއްތަ ދުވަހު ވައިރަލްވިއެވެ.

އަނެއްކޮޅުން ހޯމަ ދުވަހު ސޫރިޔާގެ ރައީސް ބައްޝާރުލް އައްސަދުގެ ސަރުކާރާއި ގުޅުން އޮންނަ ރަޝިޔާގެ ކުންފުނިތަކާއި ދެކޮޅަށް ދަތިކުރުމުގެ ފިޔަވަޅު އަޅާނެކަމަށް އެމެރިކާއިން އދ އަށް ކަނޑައަޅާފައި ހުންނަވާ މަންދޫބު ނިކީ ހޭލީ އާދިއްތަ ދުވަހު ވަނީ ވިދާޅުވެފައެވެ. އަދި ބައްޝާރުލް އައްސަދާއިއެކު ސީދާ ވާހަކަތައް ނުބާއްވާނެކަމަށް އެކަަމަނާ ވިދާޅުވިއެވެ.

ސޫރިޔާއިން އިތުރު ކެމިކަލް ހަމަލާއެއް ދީފިނަމަ އަނެއްކާވެސް ހަމަލާދޭން އެމެރިކާ ތައްޔާރަށް އޮތްކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެފައި ވަނިކޮށް، މިވަގުތު އިތުރު ހަމަލާއެއް ނުދޭނެކަމަށާއި، އެހެން ނަމަވެސް ސޫރިޔާއިން އިތުރު ކެމިކަލް ހަމަލާއެއް ދީފިނަމަ ރައްދު ހަމަލާ ދޭނެކަމަށް އިނގިރޭސި ޚާރިޖީ ވަޒީރު ބޮރިސް ޖޯންސަންވެސް ވަނީ ވިދާޅުވެފައެވެ.