ރާއްޖޭގެ ބޮޑުބަޔަކަށް މޫސުން ގޯސްވުމުން ވައިޓް އެލާޓް ނެރެފި
15 އެޕްރީލު 2018 | އާދީއްތަ 10:15ދ. އޮތޮޅާއި އައްޑޫ އަތޮޅާއި ދެމެދުގެ ރަށްތަކަށް މޫސުން ގޯސް
ރާއްޖޭގެ މޫސުން ފެންނަ ގޮތް ދައްކުވައިދޭ ސެޓްލައިޓް ފޮޓޯއެއް
ރާއްޖޭގެ ބޮޑު ބަޔަކަށް ގުގުރުމާއެކު ބޯކޮށް ވާރޭ ވެހޭނެ ކަމަށް ލަފާ ކުރެވޭތީ މޫސުމާ ބެހޭ ގައުމީ އިދާރާ މޯލްޑިވްސް މީޓިއޮރޮލޮޖިކަލް ސާރވިސް (މެޓް އޮފީސް)އިން ވައިޓް އެލާރޓް ނެރެފި އެވެ.
މެޓް އޮފީހުން ބުނީ ދ. އަތޮޅުން ފެށިގެން އައްޑޫ އަތޮޅާ ދެމެދުގެ ރަށްތަކަށް ގުގުރުމާއެކު ބޯކޮށް ވާރޭ ވެހޭނެ ކަމަށް ލަފާކުރެވޭތީ އާދިއްތަ ދުވަހުގެ 14:00 އިން ފެށިގެން 20:00 އާ ހަމައަށް ވައިޓް އެލާޓް ނެރެފައިވާ ކަމަށެވެ.
މެޓް އޮފީހުން ބުނީ ކުރިއަށް އޮތް 24 ގަޑިއިރު، ރާއްޖޭގެ އެކި ހިސާބުތަކަށް ވިއްސާރަ ކުރާނެ ކަމަށާއި އަދި ބައެއް ރަށްތަކަށް ގުގުރުން ވެސް އެކަށީގެންވާ ކަމަށެވެ. އަދި ރާއްޖޭގެ ދެކުނުގެ އަތޮޅުތަކަށް ބޯކޮށް ވާރޭވެހުން އެކަށީގެންވާ ކަމަށްވެސް މެޓް އޮފީހުން ބުނެއެވެ.
މެޓް އޮފީހުން ބުނީ ވައިޖެހޭނީ އާއްމު ގޮތެއްގައި ހުޅަނގު ދެކުނާއި ހުޅަނގުން ގަޑިއަކު 05 މޭލާއި 15 މޭލާ ދެމެދުގެ ބާރު މިނުގައި ކަމަށެވެ. އަދި ވިލާގަނޑުގައި 35 މޭލަށް ވައިގަދަ ވުމަކީ އެކަށީގެންވާ ކަމެއް ކަމަށްވެސް މެޓް އޮފީހުން ބުނެއެވެ.
މެޓް އޮފީހުން ބުނީ ރާއްޖޭގެ ކަނޑުތައް އާދައިގެ ވަރަކަށް މަޑުވެފައި، ވިލާގަނޑުގައި އާދައިގެ ވަރަކަށް ގަދަވާނެ ކަމަށް ލަފާ ކުރެވޭ ކަމަށެވެ.
ކަލަންޑަރު ބުނާގޮތުން މިހާރު ކުރިއަށް މިދަނީ ހުޅަނގުގެ ފުރަތަމަ ނަކަތް ކަމަށް އައްސިދަ ނަކަތުގެ 08 ވަނަ ދުވަހެވެ.
