އެމެރިކާގެ ރައީސް ޑޮނަލްޑް ޓްރަމްޕްގެ އިސް ގާނޫނީ ވަކީލްގެ މައްޗަށް ޖިނާއީ ތަހުގީގެއް ހިންގަމުންދާ ކަމަށް އެމެރިކާގެ ޖަސްޓިސް ޑިޕާޓްމަންޓުން ބުނެފިއެވެ.
ޕްރޮސިކިއުޓަރުން ވިދާޅުވީ އެ ބޭފުޅުންގެ ތަހުގީގު އަމާޒުކުރަނީ މައިކަލް ކޯއެންގެ ގާނޫނީ މަސައްކަތަށް ވުރެ ބޮޑަށް އޭނާގެ ވިޔަފާރިއަށް ކަމަށެވެ.
ކޯޓު އަމުރުގައި ބުނެފައިވާ ގޮތުގައި ކޯއެންގެ ތަހުގީގު ކުރިޔަށްގެންދަނީ ހަތަރު މަސްދުވަހެށެވެ.
ހަތަރު މަސްދުވަހުގެ މުއްދަތަށް ތަހުގީގު ކުރިޔަށް ގެންދެވޭނެ ކަމަށް ކޯޓުން ނިންމާފައި ވަނީ ހޯމަ ދުވަހު ކޯއެންގެ އޮފީސް ބަލައި ފާސްކުރުމަށް ފަހު އަތުލާފައިވާ ތަކެތި ޕްރޮސިކިއުޓަރުން ރިވިއު ކުރުން ހުއްޓުވުމަށް ކޯއެންގެ އަމިއްލަ ވަކީލު ކޯޓަށް ހުށަހެޅި މައްސަލައިގެ ތެރެއިންނެވެ.
ކޯއެންގެ ޓީމުން ވަނީ އެ ލިޔެކިއުންތަކަކީ އޭނާގެ މުވައްކިލުންގެ އިމްތިޔާޒަށް އަސަރުކުރާނެ ލިޔުންތަކެއް ކަމަށް ބުނެފައެވެ.
ނިއު ޔޯކްގައި ހުކުރު ދުވަހު ކުރިޔަށްދިޔަ ކޯޓުގެ އަޑުއެހުމުގައި ޕްރޮސިކިއުޓަރ ޓޮމް މެކީ ވަނީ ކޯއެން އުޅުއްވަނީ މުވައްކިލުގެ އިމްތިޔާޒުގެ ވާހަކަ ދައްކަވައިގެން އެއީ ހަތިޔާރެއްގެ ގޮތުގައި ބޭނުންކުރައްވައި ހެކިހޯދުމަށް ސަރުކާރަށް ލިބިފައިވާ ބާރުތަކަށް ގޮނެޖެއްސެވުމަށް ކަމަށް ތުހުމަތު ކުރައްވާފައެވެ.
މީގެ އިތުރުން ދައުލަތުގެ ވަކީލް ވަނީ ކޯއެންގެ ހުރީ އެންމެ މުވައްކިލެއް ކަމަށާއި އެއީ ރައީސް ޓްރަމްޕް ކަމަށް ވިދާޅުވެފައެވެ.
ރައީސް ޓްރަމްޕް ވަނީ އެ މަނިކުފާނުގެ ވަކީލުގެ އޮފީސް ބަލައި ފާސްކުރުމަކީ ކަންބޮޑުވެ ވަޑައިގަންނަވާ ކަމެއް ކަމަށާއި އެކަމަކީ ގައުމަށް ދެވުނު ހަމަލާއެއް ކަމަށް ސިފަ ކުރައްވާފައެވެ.
