ނިއުކްލިއާ އެއްބަސްވުމާ ބެހޭ ގޮތުން ސައުދީގެ ވާހަކަ އަޑު ނޭހުމަށް އިރާނުން ފްރާންސަށް ގޮވާލައިފި
13 އެޕްރީލު 2018 | ހުކުރު 05:03އެއްބަސްވުން ރޫޅާލަންޖެހޭ ސަބަބެއް ނެތް ކަމަށް ފްރާންސުން ބުނޭ
ސައުދީގެ ވަލީއަހްމަދު މުހައްމަދު ބިން ސަލްމާން އާއި ފްރާންސްގެ ރައީސް އެމަނުއެލް މެކްރޯން ޕެރިހުގައި އަންގާރަ ދުވަހު ބައްދަލުކުރައްވަނީ
ދަތިކުރުމުގެ ފިޔަވަޅުތަކަށް ލުޔެއް ދިނުމުގެ ބަދަލުގައި ނިއުކްލިއާ ޕްރޮގްރާމް ހުއްޓާލުމަށް ދުނިޔޭގެ ބޮޑެތި ބާރުތަކާ އެކު އީރާނުން ހަދާފައިވާ އެއްބަސްވުމާ ގުޅޭ ގޮތުން ސައުދީ އަރަބިއްޔާ އިން ދައްކާ ވާހަކަތައް އަޑުނޭހުމަށް އީރާނުން ފްރާންސަށް ގޮވާލައިފިއެވެ.
ނިއުކްލިއާ ޕްރޮގްރާމް ހުއްޓާލުމާ ގުޅޭ ގޮތުން އެމެރިކާ އާއި ފްރާންސް ހިމެނޭ ގޮތަށް ބޮޑެތި ބާރުތަކާ އެކު އީރާނުން 2015 ވަނަ އަހަރު ހެދި އެއްބަސްވުމާ ބެހޭ ގޮތުން ސައުދީގެ ވަލީ އަހްދު މުހައްމަދު ބިން ސަލްމާން ވަނީ ފްރާންސްގެ ރައީސް އެމަނުއޭލް މެކްރޯންއާ އެކު މަޝްވަރާކުރައްވާފައެވެ.
އީރާނުން މިހެން ބުނެފައި މިވަނީ ސައުދީގެ ވަލީއަހްދު ފްރާންސަށް ކުރައްވަމުން ގެންދަވާ ދަތުރުފުޅުގައި މެކްރޯންއާ ބޭއްވެވި ބައްދަލުކުރެއްވުމާ ގުޅިގެންނެވެ. އެ ބައްދަލުވުމަށް ފަހު މީޑިއާ އަށް މައުލޫމާތު ދެއްވަމުން މެކްރޯން ވިދާޅުވީ މެދުއިރުމަތީ ސަރަހައްދުގައި އީރާނުގެ ނުފޫޒު އޮތް މިންވަރު ދެނެގަނެވިދާނެ ކަމަށާއި ނަމަވެސް މިދަނޑިވަޅުގައި ނިއުކްލިއާ އެއްބަސްވުން ރޫޅާލަންޖެހޭ ކަމަށް ގަބޫލުނުކުރައްވާ ކަމަށެވެ.
އެ ވާހަކަތަކަށް ރައްދު ދެއްވައި އެ ބައްދަލުވުމުގައި ސައުދީ ވަލީހްއަހްމަދު ވިދާޅުވީ އެމަނިކުފާނު ދައްކަވާ ވާހަކަފުޅުން ފަހަރުގައި ހިއްޕުޅާ ނުވެދާނެ ކަމަށާއި ނަމަވެސް ދެ ވަނަ ބޮޑު ހަނގުރާމަ ފެށެން މެދުވެރިވި ސަބަބަކަށްވި ފަދަ އެއްބަސްވުމެއް ދެ ވަނަ ފަހަރަށް ތަކުރާރުވާން ނޭދޭ ކަމަށެވެ. ވަލީއަހްދު އިޝާރާތްކުރެއްވީ 1938 ވަނަ އަހަރު މިއުނިކާއި ހިޓްލަރާ ދެމެދު ގާއިމުކުރެވުނު އެއްބަސްވުމަށެވެ.
މި ވާހަކަތަކާ ގުޅިގެން އީރާނުގެ ޚާރިޖިއްޔާގެ ތަރުޖަމާން ބަހްރާމް ޤާސިމީ ވިދާޅުވީ ފްރާންސަކީ އެއްބަސްވުމުގެ އެންމެ މުހިންމު އެއް ބައިވެރިޔާ ކަމަށާއި އެ ހައިސިއްޔަތުން ވެސް ސައުދީގެ ނުފޫޒުން އެއްކިބާވާންޖެހޭ ކަމަށެވެ.
