ދިވެހި ރާއްޖެއަށް އަންނަ އުޅަނދު ފަހަރުގެ ސަލާމަތާއި ރައްކާތެރި ކަމަށް ގެންނަ ހަތިޔާރު ރާއްޖެއަށް އެތެރެކުރެވޭނެ އުސޫލުތައް ކަނޑައަޅާ ޑިފެންސް މިނިސްޓްރީން އެކުލަވާލި ގަވާއިދަށް އަމަލުކުރަން ފަށަފިއެވެ.

މި ގަވައިދަކީ ދިވެހިރާއްޖޭގެ ސަރަޙައްދަށް ވަންނަ އުޅަނދު ފަހަރާއި، ދިވެހިރާއްޖޭގެ ސަރަޙައްދު ހުރަސްކޮށް ދަތުރުކުރާ އުޅަނދު ފަހަރު، ދަތުރުކުރުމުގައި ދިމާވެދާނެ ނުރައްކާތެރި ޙާދިސާތަކުން ސަލާމަތް ވުމަށް އުޅަނދު ފަހަރުގައި ބަހައްޓާފައި ހުންނަ ރާއްޖެއަށް އެތެރެކުރުން މަނާ ހަތިޔާރާމެދު ޢަމަލުކުރާނެ އުސޫލުތައް ކަނޑައެޅުމުގެ މަޤްޞަދުގައި އެކުލަވާލާފައިވާ ގަވައިދެކެވެ.

މި ގަވާއިދުގެ ދަށުން ދިވެހި ރާއްޖެއަށް ގެނެވީ 10 މިލިމީޓަރުން ފެށިގެން ދަށް ކެލިބަރގެ ރައިފަލާއި ހޭންޑްހަންއާއި ސޯޅަ ގޭޓުން ފެށިގެން ދަށުގެ ޝޮޓްގަން ފަދަ ހަތިޔާރެއެވެ. މި ނޫން ބާވަތެއްގެ ހަތިޔާރެއް ހުރިނަމަ އެ ތަކެތި ގާނޫނު ނަންބަރު 4/75 ( ދިވެހި ރާއްޖެއަށް ގެނައުން މަނާ ތަކެތީގެ ގާނޫނު) ގައިވާގޮތުގެ މަތިން އެމް.އެން.ޑީ.އެފް އަށް އަތުލެވޭނެ ކަމަށް އެގަވައިދުގައި ބުނެފައިވެއެވެ. އަދި ދިވެހި ރާއްޖެއަށް ގެނައުން މަނާ ހަތިޔާރު ހުރި ކޮންމެ އުޅަނދެއް ރާއްޖެއަށް އައުމުގެ ކުރިން ރާއްޖޭގެ ލޯކަލް ކޯޑިނޭޓިންގ އެޖެންޓެއް ހަމަޖައްސަންވާނެ ކަމަށާއި އެ އެޖެންޓަކީ މި ގަވައިދުގެ ދަށުން މިނިސްޓްރީގައި ރަޖިސްޓްރީ ކުރެވިފައިވާ ލޯކަލް ކޯޑިނޭޓިންގ އެޖެންޓަކަށް ވާންވާނެ ކަމަށް ގަވައިދުގައި ބުނެފައިވެއެވެ.
އެހެންކަމުން ލޯކަލް ކޯޑިނޭޓިންގ އެޖެންޓެއްގެ ގޮތުގައި ރަޖިސްޓަރީ ވުމަށްޓަކައި މި ގަވާއިދުގެ ޖަދުވަލު އެކެއްގައިވާ ފޯމް ފުރިހަމަ ކުރުމަށް ފަހު މިނިސްޓްރީއަށް ހުށައަޅަންވާނެ ކަމަށް ގަވައިދުގައި ބުނެފައިވެއެވެ.

މީގެ އިތުރުން ބޭރުން އަންނަ އެވެސް އުޅަނދެއްގައި ދިވެހި ރާއްޖެއަށް ގެނެއުން މަނާ ހަތިޔާރު ހުރިނަމަ އެ އުޅަނދެއް ދިވެހި ރާއްޖޭގައި ސަރަހައްދަށް ވަނުމުގެ ދެ ދެވަސް ކުރިން ބަންދު ދުވަސްތައް  ނުހިމަނާ ، އެ އުޅަނދަކާބެހޭ މައުލޫމާތު ޖަދުވަލު ތިނެން ގައިވާ ފޯމު މެދުވެރިކޮށް މިނިސްޓްރީންއަށް ހުށައަޅަންވާނެ ކަމަށް ބުނެފައިވެއެވެ.

މި ގަވައިދުގެ ދަށުން ރާއްޖެއަށް ގެނެއުން މަނާ ހަތިޔާރާއި، އާލާތްތަކުގެ ވައްތަރާއި، ޢަދަދާއި، އަދި އެތަކެތި އެމް.އެން.ޑީ.އެފްގެ ބެލުމުގެ ދަށަށް ގެނެއުމަށް ކުރަންޖެހޭ މަސައްކަތުގެ ކުޑަބޮޑުމިނަށް ބަލައި، ޙާއްސަ ފީއެއް ވެސް ނެގުމަށް ވަނީ ނިންމާފައެވެ.