ހދ. ފިނޭ ކުޑަކުއްޖެއްގެ ހާލު ދެރަވެގެން އިތުރު ފަރުވައަށް މާލެ ގެންނަނިކޮށް ފްލައިޓް ތެރޭގައި މަރުވެއްޖެ އެވެ.
އެކުއްޖާގެ އާއިލާގެ މީހަކު "ރާއްޖެއެމްވީ"އަށް މައުލޫމާތު ދެމުންބުނީ ހަތަރު އަހަރުގެ އެކުއްޖާ ހާލު ދެރަވެގެން މިމަހުގެ 16 ވަނަ ދުވަހު ފިނޭ ސިއްހީ މަރުކަރަށް ދެއްކި ކަމަށާއި ނަމަވެސް އެކުއްޖާގެ ހާލަތު ރަނގަޅު ނުވުމުން ހަމަ އެދުވަހު ކުޅުދުއްފުށި ރީޖަނަލް ހޮސްޕިޓަލަށް ގެންދިއަ ކަމަށެވެ. އަދި ކުޅުދުއްފުށި ހޮސްޕިޓަލުން ޓެސްޓްތައް ހެދިއިރު ލޭގައި އިންފެކްޝަނެއް ހުރުމުންނާއި ކުއްޖާގެ ހާލަތު އިތުރު ގޯސްވަމުންދާތީ އާސަންދަ އެހީގައި އިތުރު ފާރުވާއަށް މާލެ ގެނައުމަށް ފްލައިޓެއް ޗާޓަރ ކޮށްގެން މާލެ އައުމަށް ފުރީ މިމަހުގެ 17 ވަނަ ދުވަހުގެ ރޭ ކަމަށް އޭނާ ބުންނެވެ.
އެކުއްޖާ މަރުވެފައިވަނީ ފްލައިޓް ތެރޭގައި މާލެއާ ކައިރިވެފައި ވަނިކޮށް ކަމަށް އޭނާ ބުންޏެވެ.
އޭނާ ބުނީ ހަތަރު އަހަރުގެ އެ ފިރިހެން ކުއްޖާއަކީ ބޮޑު ބައްޔަކަށް ބޭސްފަރުވާ ކުރަމުންދިޔަ ކުއްޖެއް ނޫން ކަމަށެވެ. އަދި ކުއްލިއަކަށް އެ ކުއްޖާގެ ހާލު ދެރަވާންދިމާވި ވަކި ސަބަބެއް ނޭނގޭކަމަށް ވެސް އޭނާ ބުންޏެވެ.
ނަމަވެސް ބައެއް އޮންލައިން ނޫސްތަކުން ބުނާ ގޮތުން އެކުއްޖާގެ ހާލު ދެރަވެފައިވަނީ ވިހަ ލަގޮނޑިއެއް ކެވިގެންނެވެ.
އެކުއްޖާ މަރުވި މައްސަލައާއި ގުޅިގެން ކުޅުދުއްފުށި ހޮސްޕިޓަލްގެ މެނޭޖަރ އިބްރާހީމް ވަހީދު ވިދާޅުވީ އެކުއްޖާ ކުޅުދުއްފުށި ހޮސްޕިޓަލަށް ގެނެސްފައިވަނީ ހާލު ދެރަވެގެން ކަމަށާއި ހާލު ދެރަވާން ދިމާވި ވަކި ސަބަބެއް އެކުއްޖާގެ އާއިލާއިން ބުނެފައިނުވާއިރު، އެކުއްޖާ ބެލި ޑޮކްޓަރުވެސް ވަކި ސަބަބެއް ވިދާޅުވެފައި ނުވާކަމަށް ވަހީދު ވިދާޅުވި އެވެ. ނަމަވެސް ވަހީދު ވިދާޅުވީ ޓެސްޓްތައް ހެދުމުން އެކުއްޖާގެ ލޭގައި އިންފެކްޝަނެއް އުޅޭކަމަށް ޑޮކްޓަރު ވިދާޅުވެފައިވާ ކަމަށާއި އެހެންކަމުން އެކުއްޖާގެ ހާލަތު އިތުރަށް ގޯސްވަމުންދާތީ އިތުރު ފަރުވާއަށް ފްލައިޓެއް ޗާޓަރ ކޮށްގެން މާލެ ފޮނުވީ ކަމަށެވެ.
