ޔުނައިޓެޑްގެ އެންމެ މުހިންމު ކުޅުންތެރިޔާއަށް ޕޮގްބާ ވާންޖެހޭ

މެންޗެސްޓާ ޔުނައިޓެޑްގެ އެންމެ މުހިންމު ކުޅުންތެރިޔާއަށް ފްރާންސްގެ މިޑްފީލްޑަރު ޕައުލް ޕޮގްބާ ވާންޖެހޭ ކަމަށް އެ ޓީމަށް ކުޅެމުން އަންނަ ސާބިއާގެ މިޑްފީލްޑަރު ނެމެންޔާ މަޓިޗް ބުނެފިއެވެ.

ޔުވެންޓަސް ދޫކޮށް 2016 ވަނަ އަހަރު އޭރުގެ ރެކޯޑު ފީއެއް ކަމަށްވާ 89 މިލިއަން ޕައުންޑަށް ޔުނައިޓެޑަށް ބަދަލުވުމަށް ފަހު ޕޮގްބާއަށް ޔުނައިޓެޑްގައި އެންމެ އެދެވޭ ކުޅުން ދެއްކިފައެއް ނުވެއެވެ. އޭނާގެ ހުނަރާ މެދު މީހުން ސުވާލު ނުއުފެއްދި ނަމަވެސް އެއްވަރެއްގައި ކުޅުމުގެ ފެންވަރު އޭނާއަށް ނުހިފެހެއްޓުމާ އެކު އޭނާއަށް ގިނަ ބައެއްގެ ފާޑުކިޔުންތައް ދަނީ އަމާޒުވަމުންނެވެ. އެހެން ނަމަވެސް ޔުނައިޓެޑް އެންމެ ފަހުން މެންޗެސްޓާ ސިޓީއާ ދެކޮޅަށް ކުޅުނު މެޗުގައި ޕޮގްބާ ދެއްކި މޮޅު ކުޅުމާއެކު އޭނާއަށް އަންނަނީ ގިނަ ބައެއްގެ ތައުރީފް އޮހެމުންނެވެ.

ޔުނައިޓެޑްގެ ރަސްމީ ޓީވީ ޗެނަލާ ވާހަކަ ދައްކަމުން މަޓިޗް ބުނީ ޕޮގްބާ ކުޅެނީ ޓީމުގެ އެންމެ މުހިންމު މަގާމަށް ކަމަށާއި އެހެންކަމުން އޭނާއަކީ އެ ޓީމުގެ އެންމެ މުހިންމު ކުޅުންތެރިޔާއަށް ވާންޖެހޭ ކަމަށެވެ. ހަމައެހެންމެ އެ މަގާމުގެ ޒިންމާ އޭނާ ނަގަން ޖެހޭ ކަމަށާއި އެހެން ނަމަވެސް މި ސީޒަނުގައި އޭނާއަށް ދިމާވި އަނިޔާގެ މައްސަލަތަކުގެ ސަބަބުން އޭނާގެ ކުޅުން ވަރަށް ބޮޑަށް ދަށްވެގެންދިޔަކަން ގަބޫލުކުރަން ޖެހޭ ކަމަށް މަޓިޗް ބުނެފައިވެއެވެ.

މަޓިޗް ބުނީ ޔުނައިޓެޑަށް ކުޅޭ ކޮންމެ ކުޅުންތެރިއެއްގެ ފަރާތުން ވެސް އެންމެ މޮޅު ކުޅުން ފެންނަން އަބަދުވެސް މީހުން ބޭނުންވާ ކަމަށާއި ދުނިޔޭގެ އެންމެ މަޝްހޫރު ޓީމަކަށް ކުޅޭއިރު ކަންކަން ހިނގާނީ އެގޮތަށް ކަމަށެވެ. ޕޮގްބާއަކީ އަދިވެސް ޒުވާން ކުޅުންތެރިއެއް ކަމަށާއި އެހެންކަމުން އޭނާގެ ފަރާތުން މިހާރު ފެންނަމުންދާ ގޯސްތައް އޭނައަށް ރަނގަޅު ކުރެވޭނެ ކަމަށް މަޓިޗް ބުނެފައިވެއެވެ. އޭނާ ބުނީ ސިޓީއާ ދެކޮޅަށް ކުޅުނު މެޗުގެ ފަހު 10 މިނެޓު ބެލި ކޮންމެ މީހަކަށް ވެސް ޕޮގްބާގެ ފެންވަރު ފެންނާނެ ކަމަށާއި ޓީމު މޮޅު ކުރުމަށް ޕޮގްބާ ގިނަ މަސައްކަތްތަކެއް ކުރި ކަމަށެވެ.

ޕޮގްބާ އެ މެޗުގައި ޔުނައިޓެޑަށް ދެ ލަނޑު ޖަހައިދިން އިރު ފަހަތުން އަރައި ޔުނައިޓެޑުން އެ މެޗު ކާމިޔާބުކުރީ 3-2 ގެ ނަތީޖާއަކުންނެވެ. އެ މެޗު ސިޓީ އިން ކާމިޔާބުކުރި ނަމަ އެ ޓީމަށް ޕްރިމިއާ ލީގުގެ ތަށި ޔަގީންވެގެންދާނެއެވެ. އެ މެޗުގެ އެންމެ މޮޅު ކުޅުންތެރިޔާގެ އެވޯޑު ވެސް ލިބުނީ ޕޮގްބާ އަށެވެ. އެހެން ނަމަވެސް މަޓިޗް ވަނީ އެ ނިންމުމާ ދެކޮޅަށް ވާހަކަ ދައްކާފައެވެ.

މަޓިޗް ބުނީ އޭނާ ދެކޭ ގޮތުގައި އެ މެޗުގެ އެންމެ މޮޅު ކުޅުންތެރިޔަކަށް ހޮވެން ޖެހޭނީ އެ މެޗުން ޔުނައިޓެޑް މޮޅުވި ލަނޑު ޖެހި ކްރިސް ސްމޯލިން ކަމަށެވެ. މަޓިޗް ބުނީ އެ މެޗަކީ ވަރަށް މުހިންމު މެޗެއް ކަމަށާއި ސަޕޯޓަރުންނަށް ދެވުނު ވަރަށް ބޮޑު ހަދިޔާއެއް ކަމަށެވެ. އޭނާ ބުނީ އެ މެޗުން ޔުނައިޓެޑަކީ ޝަރަފުވެރި ޓީމެއް ކަން އެންމެނަށް ވެސް ދައްކާލެވުނު ކަމަށެވެ.