ސްކޭޓްބޯޑު ދުއްވައިގެން ރަންވަނަތަކެއް ހޯދާ ތުއްތު ތުއްތު ޒާރާ

ޝާރްޖާގެ މާސިންގާ ރޭމްޕެއްގައި ތުއްތު ކުއްޖަކު، ސްކޭޓް ބޯޑެއްގައި ސްކޭޓް ކުރާތީ ފެނެއެވެ. ކަކޫ ލަންބާލައިގެން ބޯޑު މައްޗަށް ތިރިވެ އިނދެ ސްކޭޓް ކުރަމުން ދަނީ ނުވެއްޓި، ބެލަންސް ކުރުމަށާ އާ ހުނަރެއް ފައްކާ ކުރުމަށް ފިސާރި ސަމާލުކަން ދީ އިނދެކަން އެ މައުސޫމު މޫނުން ސާފުވެއެވެ.

އުމުރުން 6 އަހަރުގެ ޒާރާ އޭން ގްލޭޑިސް މަދަމްބީ އަށް ސްކޭޓްބޯޑް ތައާރަފުވީ މީގެ 2 އަހަރު ކުރިން، ކޮރޯނާވައިރަސް ޑިޒީޒް (ކޮވިޑް-1)ގެ ބަލިމަޑުކަން އެންމެ ހައްސާސް ވެގެން ދިޔަ ދުވަސްވަރު، އޭނާގެ ރައްޓެހިންތަކެއް ކުޅެން އުޅުމުގެ ތެރޭގައެވެ.

ޒާރާއަށް އޭނާގެ އަމިއްލަ ސްކޭޓްބޯޑެއް ލިބުނު ހިސާބުން ކޮންމެ ދުވަހަކުވެސް އެތައް ގަޑިއިރެއް އޭނާ ހޭދަކުރަނީ ސްކޭޑްބޯޑު ދުއްވުމުގެ ހުނަރުތައް ފައްކާ ކުރުމުގެ މަސައްކަތުގައެވެ. އާ ހުނަރުތައް ދަސްކުރަނީ ޔޫޓިއުބް ވީޑިއޯތައް ބަލައިގެންނެވެ. ފެންނަ މަންޒަރުތައް އެންމެ ފުރިހަމަވަންދެން ފަރިތަ ކުރެއެވެ.

އުމުރުން ކިތަންމެ ހަގެއް ކަމަކު ވާދަ ކުރުމަށް ޒާރާ ލޯބި ކުރެއެވެ. އަދި ކުރިމަތިލާ ކޮންމެ ކަމަކުން ކަންތައްތަކެއް އުނގެނި، ފިލާވަޅުތަކެއް ދަސްކުރުމަށްވެސް އޭނާ ލޯބި ކުރެއެވެ. ސަބަބަކީ، ޕްރޮފެޝަނަލް ފެންވަރުގައި ސްކޭޓްކުރާ މީހަކަށް ވުމަށް އޭނާ ދެކެމުންދާ ފޮނި ހުވަފެންތައް ހަގީގަތަކަށް ވުމާ ގާތަށް އެ ފިޔަވަޅުތައް އޭނާ ގެންގޮސްދޭ ކަމެވެ.

މި ދިޔަ 2 އަހަރެއްހާ ދުވަހަށް ބަލާއިރު ޒާރާ ވަނީ އެކުވެރި އަރަބި އިމާރާތާއި، އިންޑިއާ އަދި ބުޑަޕެސްޓުގައި ކުރިއަށް ގެންދިޔަ ދޭސީ އަދި ބައިނަލްއަގުވާމީ ގިނަ މުބާރާތްތަކެއްގައި ވާދަކޮށް، ރަން ވަނަތަކެއްވެސް ހާސިލު ކޮށްފައެވެ. އެގޮތުން ޔޫއޭއީގައި ކުރިއަށް ގެންދިޔަ މުބާރާތްތަކެއްގައި 2 ފަހަރެއްގެ މަތިން އޭނާ ވަނީ މޯސްޓް ވެލުއަބަލް ޕްލޭޔާ (އެމްވީޕީ)ގެ ޓައިޓަލް ހޯދާފައެވެ.

ސްކޭޓްބޯޑުގައި ޒާރާ ކުރަމުންދާ ދަތުރުގައި އޭނާއަށް އެންމެ ބޮޑު އެހީތެރިކަމެއް ފޯރުކޮށްދެނީ އޭނާގެ މައިންބަފައިންނެވެ. ކޮންމެ ދުވަހަކު އޮންނަ ތަމްރީނު ސެޝަންތަކުގައި އޭނާގެ މައިންބަފައިން ބައިވެރިވެ، ހިތްވަރު ދެއެވެ. ޒާރާގެ ސްކޭޓް ކުރުމުގެ ދަތުރު، އިންސްޓަގްރާމް މެދުވެރިކޮށް މުޅި ދުނިޔެއަށް ހިއްސާކޮށްދެއެވެ. މިއަދު ޒާރާގެ އެކައުންޓް ފޮލޯ ކުރާ މީހުންގެ އަދަދު 29000 އަށް ވުރެ މައްޗަށް އަރައެވެ.

މި ދުވަސްވަރަކީ އެކުވެރި އަރަބި އިމާރާތް (ޔޫއޭއީ)ގައިވެސް ސްކޭޓްބޯޑު ދުއްވުމުގެ ފޯރި ގަދަވަމުން އަންނަ ދުވަސްވަރެކެވެ. ކޮވިޑް-19ގެ ބަލިމަޑުކަމުގައި ދިރިއުޅުމަށް އައި ބޮޑު ބަދަލުތަކާއެކު، ޅަ އުމުރުގެ ގިނަ ކުދިންތަކެއްގެ މެދުގައި ސްކޭޓްބޯޑު ކުރުމުގެ ޖޯޝް ދަނީ ގަދަވަމުންނެވެ. އަދި ހަލުވިކަމާއެކު ކުރިއަރަމުން އަންނަ ކުޅިވަރަކަށްވެސް އެކަން ދަނީ ބަދަލު ވަމުންނެވެ.